އަތޮޅުގެ އެހެން ދެ ރަށަކާއެކު ހޮޅުދޫ ބާފާ ސޮކަރ ކަޕް އީދު ދުވަހު ފަށަނީ

ނ.ހޮޅުދޫ ބާފާ ޖަމްއިއްޔާއިން ބާއްވަމުން އަންނަ "ބާފާ ސޮކަރ ކަޕް" އަތޮޅުގެ އެހެން ދެރަށެއްގެ ޓީމްތައް ހިމަނައިގެން އީދު ދުވަހު ފަށަން ނިންމައިފިއެވެ.

ކޯވިޑްގެ ސަބަބުން ދެ އަހަރުގެ މެދު ކެނޑުމަކަށްފަހު އަލުން މުބާރާތް ބާއްވާއިރު ނ.އަތޮޅު މަގޫދޫއާއި, ހެނބަދޫގެ ޓީމެއް ބައިވެރިވެއެވެ. ހޮޅުދޫގެ ތިން ޓީމާއެކު މުބާރާތުގައި ފަސް ޓީމް ވާދަކުރާނެއެވެ. މުބާރާތުގެ ފައިނަލްގެ ފުރަތަމަ ޖާގަ ލިބޭނީ ލީގު ބުރެއް ނިމޭއިރު އެންމެ ގިނަ ޕޮއިންޓް ހޯދާ ޓީމަށެވެ. ފައިނަލްގެ ދެވަނަ ޖާގަ ލިބޭނީ ލީގު ބުރުގެ ދެވަނަ އަދި ތިންވަނަ ޓީމް ވާދަކުރާ ޕްލޭއޮފްއިން މޮޅުވާ ޓީމެވެ.

މިއީ މީގެ 15 އަހަރު ކުރިން ބާފާ ޖަމްއިއްޔާއިން ބާއްވަމުން އަންނަ މުބާރާތެކެވެ. މިފަހަރުގެ މުބާރާތް ކުޅޭނީ ސަރުކާރުން އެރަށުގައި އަޅާފައިވާ ޓާފް ބޮޑު ފުޓްބޯޅަ ދަނޑުގައެވެ. މުބާރާތުގެ ފައިނަލް މެޗު ކުޅޭނީ މެއި 14 ވަނަ ދުވަހުއެވެ.