އައްޑޫސިޓީގައި ގާއިމްކުރާ "ވޭސްޓް ޓު އެނަރޖީ" ޕްލާންޓް އިންސްޓޯލްކުރަން ފަށައިފި

ރާއްޖޭގެ އެންމެ ދެކުނު ސަރަހައްދަށް އަމާޒުކޮށްގެން އެންވަޔަރަމެންޓް މިނިސްޓްރީން ކުރިއަށް ގެންދާ މަޝްރޫއުގެ ތެރެއިން އައްޑޫސިޓީ ރީޖަނަލް ވޭސްޓު މެނޭޖްމަންޓް ފެސިލިޓީ ގައި ގާއިމް ކުރުމަށް ހަމަޖެހިފައިވާ ކުނިން ހަކަތަ އުފައްދާ ޕްލާންޓް އިންސްޓޯލް ކުރުމުގެ މަސައްކަތް ފަށައިފިއެވެ.

އިންސްޓޯލް ކުރުމުގެ މަސައްކަތް ފަށާފައިވާކަން ހާމަކޮށް މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީން ބުނީ، އެ ޕްލާންޓަކީ ރާއްޖެއިން ބޭރުގައި ޑިޒައިންކޮށް މެނުފެކްޗަރ ކުރެވިގެން ރާއްޖެ ގެނެސްފައިވާ ޕްލާންޓެއް ކަމަށެވެ.

ކުނިން ހަކަތަ އުފައްދާ މި ޕްލާންޓަކީ ދުވާލަކު 50 ޓަނުގެ ކުނި އަންދައިގެން ހަކަތަ އުފެއްދުމަށް ފަރުމާ ކުރެވިފައިވާ ޕްލާންޓެކެވެ. މިއިން 1.5މެގަވަޓް ކަރަންޓު އުފައްދާނެ ކަމަށްވެސް އެ މިނިސްޓްރީން ބުނެއެވެ. އެންވަޔަރަންމަންޓް މިނިސްޓްރީން ބުނީ މި ޕްލާންޓުން އުފައްދާ ކަރަންޓްގެ 1މެގަވަޓް އައްޑޫ ސިޓީގެ ސެންޓްރަލް ގްރިޑް ފޯރުކޮށްދެވޭނެ ކަމަށާއި، 500ކިލޯވަޓް ބޭނުން ކުރާނީ އެ ފެސިލިޓީގެ ބޭނުންތަކަށް ކަމަށެވެ.

މިއީ މޯލްޑިވްސް ގްރީން ފަންޑުން 16 މިލިއަން ޑޮލަރު ޚަރަދު ކޮށްގެން ހިންގާ މަޝްރޫއެކެވެ.

މި ފްރޮޖެކްޓްގެ މައިގަނޑު ބޭނުމަކީ ދެކުނުގެ ކުނި ރަނގަޅު ގޮތުގައި މެނޭޖް ކުރުމެވެ. އިންސްޓޯލްކޮށް ނިމި ޕްލާންޓްގެ ބޭނުން އޮކްޓޯބަރ މަހު ބޭނުން ކުރެވޭނެ ކަމަށް އެމިނިސްޓްރީން މައުލޫމާތުދެއެވެ.