ހުޅުމާލޭ ފޭސް 2 ގައި ދެ ސްކޫލެއް އަޅަން ބޭނުންވާ ބިން ހައުސިންގ ޑިވޮލޮޕްމަންޓް ކޯޕަރޭޝަން (އެޗްޑީސީ) އިން އެޑިއުކޭޝަން މިނިސްޓްރީއާ ހަވާލުކޮށްފިއެވެ.

އެކަމަށްޓަކައި ބޭއްވި ޚާއްސަ ރަސްމިއްޔާތެއްގައި މި އެއްބަސްވުންތަކުގައި ސޮއިކޮށްފައިވާއިރު، އެޗްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ސުހައިލް އަހުމަދެވެ. އަދި މިނިސްޓްރީގެ ފަރާތުން މި އެއްބަސްވުމުގައި ސޮއިކުރައްވާފައިވަނީ ސްޓޭޓް މިނިސްޓަރު އަހްމަދު ރިޔާޒުއެވެ.

އެކަމާ ގުޅޭގޮތުން އެޗްޑީސީން ފޯރުކޮށްދިން މައުލޫމާތުތަކަށް ބަލާއިރު، މިނިސްޓްރީއާ ޙަވާލު ކޮށްފައިވަނީ 60،720 އަކަފޫޓުގެ ބިމަކާއި، 65،534 އަކަފޫޓުގެ ބިމެކެވެ. އެގޮތުން ފޭސް 2 ގައި އަލަށް އިމާރަތް ކުރާ މި ދެ ސްކޫލަކީ 1200 އާއި 1500 ގެ ޖާގައިގެ ސްކޫލުތަކެއްކަމަށް އެޗްޑީސީން މައުލޫމާތު ދެއެވެ.

ހުޅުމާލޭގައި މިހާރު ތިން ސްކޫލު ހުރެއެވެ. އެެއީ ޣާޒީ ސްކޫލާއި، ރެހެންދި ސްކޫލް އަދި ހުރަވީ ސްކޫލް އެވެ. ހުޅުމާލޭ ފޭސް 2ގައި އިމާރާތް ކުރާ ފުރަތަމަ ސްކޫލު ކަމަށްވާ ސަލާހުއްދީން ސްކޫލް އިމާރާތް ކުރުމަށް މިދިޔަ އަހަރުގެ ފެބްރުއަރީ 7 ވަނަ ދުވަހު ވަނީ އަމީން ކޮންސްޓްރަކްޝަނާ ހަވާލުކޮށްފައެވެ.

ދެވަނަ ފިޔަވަހީގައި އިތުރު ސްކޫލުތައްވެސް އެޅުމުގެ މަޝްވަރާތައް ކުރަމުންދާއިރު، ސަލާހުއްދީން ސްކޫލަކީ 2020 ވަނަ އަހަރުގެ ޕީއެސްއައިޕީ ބަޖެޓުން ޚަރަދުކޮށްގެން އިމާރާތް ކުރަން ހަމަޖެއްސި ސްކޫލެކެވެ. ނަމަވެސް ކޮވިޑު-19ގެ ސަބަބުން ސްކޫލުގެ މަސައްކަތް، 2021 ވަނަ އަހަރަށް ފަސްކުރީ އެވެ.

އެޗްޑީސީން ބުނެފައިވަނީ ހުޅުމާޅޭ ދެވަނަ ފިޔަވަހީގައި ބޭރު ފަރާތަކުން ތަރައްގީކުރާ އިންޓަރނޭޝަނަލް ސްކޫލެއްވެސް ހުންނާނެކަމަށެވެ.