ސިންގަޕޫރުގެ ބޮޑުވަޒީރު އޭނާގެ ގޮނޑި ދެއްވަން ބޭނުންފުޅުވަނީ ފިނޭންސް މިނިސްޓަރު ލޮރެންސްއަށް
ބޮޑުވަޒީރު ލީ ވިދާޅުވީ، އޭނާއަކީ މިހާރު އުމުރުން 70 އަހަރުވެފައިވާ ބޭފުޅެއްކަމަށާއި، ލޮރެންސް އެމަގާމާ ހަވާލުވެވަޑައިގަތުމަށް ތައްޔާރުވުމުން މަގާމު ހަވާލުކުރައްވަން ތައްޔާރަށް ހުންނެވިކަމަށް
ސިންގަޕޫރުގެ ފިނޭންސް މިނިސްޓަރު ލޮރެންސް ވޮންގް | ރޮއިޓާސް
ސިންގަޕޫރުގެ ބޮޑުވަޒީރުކަމުގެ މަގާމު ދެއްވަން ބޭނުންފުޅުވަނީ އެގައުމުގެ މިހާރުގެ ފިނޭންސް މިނިސްޓަރު ލޮރެންސް ވޮންގްއަށް ކަމަށް ބޮޑުވަޒީރު ލީ ސިއެން ލޫންގް ވިދާޅުވެއްޖެއެވެ.
ލީ ސިއެން ލޫންގްއަށްފަހު ބޮޑުވަޒީރުކަމުގެ މަގާމަށް ލޮރެންސް އައްޔަން ކުރައްވަން ބޭނުންފުޅުވާކަމަށް އޭނާ އިއުލާނުކުރައްވާފައިވަނީ ބުރާސްފަތި ދުވަހުއެވެ.
ލީ ވަނީ އޭނާގެ ޕްލޭނަކީ 2025 ވަނަ އަހަރުގެ އިންތިހާބު އޭނާގެ ޕާޓީ، ޕީޕަލްސް އެކްޝަން ޕާޓީން ކާމިޔާބު ކުރުމުގެ ކުރިން ނުވަތަ ފަހުން, ބޮޑުވަޒީރުކަމުގެ މަގާމު ލޮރެންސްއަށް ދެއްވުންކަމަށެވެ. އޭނާ ވަނީ, މި އިންތިޚާބަކީ ފޯރިގަދަ އިންތިޚާބަކަށް ވާނެކަމަށްވެސް ވިދާޅުވެފައެވެ.
ސިންގަޕޫރުގެ ބޮޑުވަޒީރުކަމުގެ މަގާމާ ލީ ހަވާލުވެވަޑައިގެންފައިވަނީ 2004 ވަނަ އަހަރުއެވެ.
ކޮވިޑް-19 ބަލިމަޑުކަމާއެކު ގައުމަށް ކުރިމަތިވި ގޮންޖެހުންތައް ހައްލުކުރުމަށް އެކުލަވާލެވުނު ޓާސްކްފޯހުގައި ލޮރެންސް ކުރެއްވި މަސައްކަތްތަކާއެކު, ބޮޑުވަޒީރުކަމުގެ މަގާމަށް އޭނާ އައްޔަނުކުރެއްވުމަކީ އެކަށީގެންވާކަމެއް ކަމަށް މަސްރަހު ދިރާސާކުރާ ފަރާތްތަކުން ދިޔައީ ބުނަމުންނެވެ.
ބޮޑުވަޒީރު ލީ ވަނީ, އޭނާއަކީ މިހާރު އުމުރުން 70 އަހަރުވެފައިވާ ބޭފުޅެއްކަން ފާހަގަކޮށް، ލޮރެންސް އެމަގާމާ ހަވާލުވެވަޑައިގަތުމަށް ތައްޔާރުވުމުން މަގާމު ހަވާލުކުރައްވަން ތައްޔާރަށް ހުންނެވިކަމަށްވެސް ވިދާޅުވެފައެވެ.
