ކޮންމެ ސަރުކާރަކުން ވެސް ދައްކާ ވާހަކަ އަކީ ރައްޔިތުންނަށް އަވަސް މިނެއްގައި ހިދުމަތް ފޯރުކޮށްދޭން މަސައްކަތް ކުރާ ވާހަކައެވެ. ރައްޔިތުންނަށް ފޯރުކޮށްދޭ ކިދުމަތްތައް އަވަސްކޮށްދިނުމަށް ކަމަށް ބުނެ އެކި އޮންލައިން ޕްލެޓްފޯމްތައް ތައާރަފު ކުރެއެވެ. އަދި އެ ޕްލެޓްފޯމްތައް މެދުވެރިކޮށް އެކި ޚިދުމަތްތަކަށް ފެސޭހަކަމާއެކު އެދުމުގެ ފުރުސަތު ހުޅުވާލައެވެ.
އެހެންނަމަވެސް ހަޤީޤަތަކީ މިފަދަ އޮންލައިން ޕްލެޓްފޯމްތަކުގެ ސަބަބުން ވެސް ޚިދުމަތްތައް އަވަސްވެގެން ނުދާކަމެވެ. ޙިދުމަތަށް މާބޮޑު ބަދަލުތަކެއް އަންނަތަނެއް ނުފެންނަ ކަމެވެ. އޮންލައިންކޮށް ޚިދުމަތަށް އެދިގެން ވެސް އެތައް ދުވަހެއް ފާއިތުވާއިރު ވެސް ޖަވާބެއް ނުލިބެއެވެ. ވާނުވާއެއް ނޭނގެއެވެ. މައުލޫމާތެއް ސާފުކުރުމަށް ރައްޔިތު މީހާ ގުޅާ ވަރުބަލިވާ ފަހުން ވެސް ފޯނަށް ޖަވާބެއް ނުލިބެއެވެ. ފޯނަށް ޖަވާބު ލިބޭ ފަހަރު ވެސް އެތައް އިރަކު ހޯލްޑްގައި މަޑުކުރަން ޖެހޭ ފަހަރު ވެސް އާދެއެވެ. މިހެން މިކަންތައްތައް ދިމާވުމުން ރައްޔިތުންގެ ރުޅިވެރިކަން އިންތިހާއަށް އިތުރުވެގެންދެއެވެ. އެ މުއައްސަސާއަކުން ފޯރުކޮށްދޭ ޚިދުމަތްތަކާމެދު ހިތްހަމަ ނުޖެހޭތަން ވެސް އެބައާދެއެވެ.
އަނެއްބައި ފަހަރު ބައެއް މުއައްސަސާތަކުގައި އެ ޑިޕާޓްމަންޓްއަކަށް ބޭނުންވާ މިންވަރަކަށް މުވައްޒަފުން ނުތިބެއެވެ. މިހެންވުމުން ވެސް ރައްޔިތުންނަށް ކަމެއް ސާފުކުރަން ނުވަތަ މައުލޫމާތެއް އޮޅުން ފިލުވުން ވަނީ އުނދަގޫކަމަކަށްވެފައެވެ. އެ ޑިޕާޓްމަންޓެއްގައި އުޅޭ މީހަކު ސަލާމް ބުނުމުން ދެން އެތަނެއްގައި އެ މައުލޫމާތު ފޯރުކޮށްދެވޭނެ އެއްވެސް ގޮތެއް ނޯވެއެވެ. އެމީހަކު ސަލާމުން ނިކުންނަން ދެން ރައްޔިތު މީހާ އެބަ އިންތިޒާރު ކުރަން ޖެހެއެވެ. ސަރުކާރުގެ މުއައްސަސާތަކުން އެތައް ގިނަ ރައްޔިތުންނެއް ޚިދުމަތް ހޯދާއިރު މިހާލަތަށް އެތަނެއްގެ ހާލަތު ދިޔުމުން މިއީ ހިތާމަ ކުރަން ޖެހޭ ކަމެކެވެ. ހިތުގައި އެތަކެއް ސުވާލުތަކެއް ވެސް އުފެދޭނެ ކަމެކެވެ.
މުއައްސަސާތަކުގެ އިސްވެރިން ވެސް އެންމެ ބޮޑަށް ސަމާލުކަން ދޭން ޖެހޭނެކަމަކީ އެމީހެއްގެ ބެލުމުގެ ދަށުގައިވާ މުއައްސަސާއަކުން ރައްޔިތުން އެބޭނުންވާ އަވަސް މިނުގައި އެންމެ އެދެވިގެންވާ މިންވަރަށް ޚިދުމަތްތައް ފޯރުކޮށްދެވޭތޯއެވެ. ޚާއްސަކޮށް ރައްޔިތުންނާއި ގުޅުންހުރި ކަންކަމުގައި މައުލޫމާތު ފޯރުކޮށްދޭން ތިބޭ ޑިޕާޓްމަންޓްތަކަށް ދަތިވާ ކަންތައްތައް ބަލާ، އެ ދިމާވާ ގޮންޖެހުންތައް ހައްލު ކުރުމަށް މަސައްކަތް ކުރަން ޖެހޭނެއެވެ.
އެހެންނޫންނަމަ ކިތަންމެ އޮންލައިން ޙިދުމަތެއް ތައާރަފު ކުރިޔަސް، މި ނިޒާމު މިގޮތަށް ބައްޓަން ނުވާހާ ހިނދަކު އެކަމުން ކުރާނެ ފައިދާއެއް ނޯންނާނެއެވެ. ކިތަންމެ ނަމެއްގައި ވެސް އެކި ޚިދުމަތްތައް ތައާރަފު ވެސް ކުރެވިދާނެއެވެ. އެހެންނަމަވެސް މި ޙިދުމަތްތައް ދޭނެ ބަޔަކު އެތަނުގައި ނެތްނަމަ ކައުންޓަރުން ފޯރުކޮށްދޭ ޚިދުމަތެކޭ އޮންލައިންކޮށް ފޯރުކޮށްދޭ ޚިދުމަތެކޭ ވަކި ތަފާތެއް ނޯންނާނެއެވެ. ރައްޔިތުން ބޭނުންވާ ހަލުވި މިނުގައި އެ ރައްޔިތުންނަށް ޚިދުމަތްތައް ފޯރުކޮށްދިނުމަކީ އެ މުއައްސަސާއެއްގެ ޒިންމާއެކެވެ.
