އެހެން ރަށްރަށުގެ ކައުންސިލްތަކާއި ޚިލާފަށް ހުރާގެ ކައުންސިލްއަކީ ނަމޫނާ ދައްކަމުންދާ ކައުންސިލްއެކެވެ. ރަށުގެ ތަރައްޤީއަށް މަސައްކަތް ކުރުމަށްޓަކައި ކައުންސިލްއަށް ފާއިސާ ލިބޭނެ ގޮތްތައް ހުރާ ކައުންސިލް ދަނީ ހޯދަމުންނެވެ. ރައްޔިތުންނަށް ފޯރުކޮށްދޭ އެންމެ ބޮޑު އަސާސީ ޚިދުމަތްކަމަށްވާ ކަރަންޓްގެ ޚިދުމަތަކީ ހުރާ ކައުންސިލްއިން ރަށުގެ ރައްޔިތުންނަށް ފޯރުކޮށްދޭ ޚިދުމަތެކެވެ.
މިމަސައްކަތް އެކައުންސިލްއިން ފެއްޓީ ކައިރި ރިސޯޓްތަކުގައި ތިބޭ މުވައްޒަފުން ބެހެއްޓުމަށް ކައުންސިލްއިން ހަދާފައިވާ އިމާރާތެއް ދިގު މުއްދަތަކަށް ކުއްޔަށް ދިނުމަށްފަހުގައެވެ. އެގޮތުން ކުޑަ ހުރާއަށްވެސް 21ހާސް އަކަ ފޫޓުގެ ބިމެއް ކުއްޔަށް ދޫކޮށްފައިވާއިރު، މިއީ ދެ ފަންގިފިލާގެ 50 ކޮޓަރީގެ އިމާރާތެކެވެ.
"އަޅުގަނޑުމެން ކައުންސިލްއަށް އައި އިރުވެސް މިތަން ހުރީ 10 އަހަރަށް ކުއްޔަށްދީފައި، ކައުންސިލްގެ ތިއްބާ މިމުއްދަތު ވަނީ ހަމަވެފައި، އެގޮތުން މިކަމާއި މަޝްވަރާކުރުމަށްފަހު ރަށުގެ ރައްޔިތުންނަށް އަސާސީ ޚިދުމަތް ދެވެން އަންނަނީ ކައުންސިލައަށް ފާއިސާގެ އެހީތެރިކަމެއް ލިބިގެން ކަމަށް. އެގޮތުން މަޝްވަރާކުރުމަށްފަހު ނިންމީ 15 މިލިއަން އެޑްވާންސްއަށް ނެގުމަށް" ކައުންސިލްގެ ނައިބް ރައީސް ފަޔާޒް އިބްރާހިމް ވިދާޅުވިއެވެ.
އެތަން ކުއްޔަށް ދޫކުރުމަށްފަހު ލިބުނު 15 މިލިއަން ރުފިޔާއިން ރަށުގެ ފެނާއި ނަރުދަމާގެ މަސައްކަތްވަނީ ކޮށްފައެވެ. އެގޮތުން އޭރު ނަރުދަމާގެ ޚިދުމަތް ނުލިބި ހުރި 160 ގެއަކަށް މިޚިދުމަތް ފޯރުކޮށްދީފައިވާނެ ކަމަށް ކައުންސިލްއިން ބުންޏެވެ. އަދި އެމަޝްރޫއުގެ މަސައްކަތް އެއްކޮށް ނިންމުމަށްޓަކައި ސަރުކާރުން 7.8 މިލިއަން ރުފިޔާ ކައުންސިލްއަށްވަނީ ދީފައެވެ.
މި އިމާރާތުން ކޮންމެ މަހަކު ހުރާ ކައުންސިލަށް ލާރި ލިބެމުންދާއިރު އެކައުންސިލަށް އެންމެ ބޮޑު އާމްދަނީ ވަންނަ އެއްތަނަކީ އެރަށުގެ ރައްޔިތުންގެ އިންޖީނުގެއިންނެވެ.
ކައުންސިލްގެ ބެލުމުގެ ދަށުގައި ތިބި އެތައް މުވައްޒަފުންނަކާއި އެކު މިއިންޖީނުގެ ހިންގަމުންދަނީ ވަރަށް ފުރިހަމައަށެވެ. 24 ގަޑިއިރު ރަށަށް ކަރަންޓްގެ ޚިދުމަތް ފޯރުކޮށްދެއެވެ. މިކަމުގައި ރައްޔިތުންގެ ޝަކުވާ އެއްވެސް ނެތެއެވެ.
އެހެންނަމަވެސް ކައުންސިލްއިން ބުނަމުންދަނީ ރަށުގެ އާބާދީ އިތުރުވަމުން ދިއުމުގެ ސަބަބުން އިންޖީނުގެ އަޕްގްރޭޑް ކުރަންޖެހޭ ކަމަށެވެ.
މިއިންޖީނުގެއިން ހުރާގެ ރައްޔިތުންނަށް ޚިދުމަތްދޭން ފެށީ 2000 ވަނަ އަހަރުއެވެ.
އިންޖީނުގެ ސުޕަވައިޒަރ އަބްދުﷲ ނާޒިމް ރާއްޖެއެމްވީ އާއި ވާހަކަދައްކަމުން ވިދާޅުވީ މި އިންޖީނުގެ އިމާރާތް މިހާރު ކުޑަކަމަށާއި އެހެންކަމުން އިމާރާތް ރިނޮވޭޓް ކުރުމުގެ މަސައްކަތް މިހާރު ކުރަން ޖެހިފައިވާ ކަމަށެވެ. އެހެންކަމުން މިހާރުވެސް މިމަސައްކަތް ކުރުމަށް ސަރުކާރުގައި އެދިފައިވާނެ ކަމަށް ނާޒިމް ވިދާޅުވިއެވެ.
"އިންޖީނުގެ އޮނިގަނޑުވެސް ވަރަށް ބޮޑަށް ބާވެ ހަލާކުވެފައި ހުރީ. އޭރުގެ ހާލަތަށް ބަލާއިރު ރަނގަޅުވި ނަމަވެސް މިހާރު ހޫނު ގަދަވުމާއި، ސައުޑް ޕުރޫފް ކުރަން މިވަނީ ޖެހިފައި. ޒަމާނީ ފެންވަރަށް މިތަން ބަދަލުކުރަން ޖެހޭ. ސަރުކާރުން ވަނީ މިމަސައްކަތް ކުރިށްގެންދާނެ ކަމުގެ އިޝާރާތެއް ދީފައި" ނާޒިމް ވިދާޅުވިއެވެ.
އޭނާ ވިދާޅުވީ މިވަގުތު ކަރަންޓްގެ ޚިދުމަތް ފޯރުކޮށްދެމުންދަނީ ހަތަރު އިންޖީނުން ކަމަށާއި އޭގެ ތެރޭގައި އެހެންކަމުން 500 ކޭވީއޭއާއި، 450 ކޭވީގެ ދެ އިން އިންޖީނާއި އަދި 100 ކޭވީއޭގެ އެއް އިންޖީނު ކަމަށެވެ.
މިވަގުތަށް ކަރަންޓްގެ ޚިދުމަތް ފޯރުކޮށްދެމުންދާ ގޮތާއި މެދު ހިތްހަމަޖެހޭ ކަމަށް ފާހަގަކުރަމުން ނާޒިމް ވިދާޅުވީ ރަށުން އަލަށް ގޯތި ދޫކުރަން ތައްޔާރުވަމުންދާއިރު، އައު އިންޖީނުތައް ހޯދުމަށް ކައުންސިލްގެ ވިސްނުން އެބަހުރި ކަމަށެވެ.
ނާޒިމް ވިދާޅުވީ މިހާރު ކަރަންޓް ދިނުމުގެ ޚިދުމަތް އިތުރަށް ރަނގަޅު ކުރުމަށްޓަކައި ރަށުގައި ކުރިން ހުރި ކޭބަލްތައް ނެގުމަށްފަހު އަލުން ކޭބަލް ވަޅުލުމުގެ މަސައްކަތް ކުރިއަށްދާ ކަމަށެވެ. އަދި ޑިސްޓްރިބިއުޝަން ބޮކްސްތައް ހަރުކުރުމުގެ މަސައްކަތްވެސް ބަޔަކާއި ހަވާލުކޮށްގެން ކުރިއަށް އެބަދެއެވެ. މިހުރިހާ ކަމަކީވެސް އިންޖީނުގެ ހިންގައިގެން ހޯދަމުންދާ ފާއިދާއިން ކައުންސިލްއިން ކުރަމުންގެންދާ މަސައްކަތްތަކެވެ.
ކަރަންޓްގެ ތިން ވަނަ ފޭސް އަޕްގްރޭޑް ކުރުމަށްޓަކައި ތިން ކައުންސިލަރުންނާއި އިންޖީނުގޭ މުވައްފަޒުންގެ އިތުރުން މިކަމުގައި ބައިވެރިވާ ޒުވާންކުދިން ކުރަމުންދާ ކަން ފާހަގަކުރެއްވިއެވެ.
މިމަސައްކަތް ކުރިއަށް އޮތް މަހެއްހާ ދުވަސްތެރޭގައި ނިންމާ ރައްޔިތުންނަށް ކުރިން ދެމުންއައި ޚިދުމަތަށްވުރެ ރަނގަޅަށް ޚިދުމަތް ފޯރުކޮށްދެވޭނެ ކަމަށްވެސް ފަޔާޒް ވިދާޅުވިއެވެ.
ފެނުގެ ޚިދުމަތަކީވެސް ކައުންސިލުން ފޯރުކޮށްދެމުންދާ ޙިދުމަތަކަށްވާއިރު ރަށުގެ ހުރިހާ ގެޔަކަށްވެސް މިކީދުމަތުން އަގުނަގާ ގޮތަށް؛ ޚިދުމަތް ފޯރުކޮށްދެމުންދަނީ 50 ޓަނާއި 70 ޓަނުގެ ޕްލާންޓަކުންނެވެ. އަދި ކައިރި މުސްތަޤްބަލެއްގައި އިތުރު ދެ ފެން ޕްލާންޓް ގެނައުމުގެ މަސައްކަތް ކުރާނެ ކަމަށް ވެސް ނާޒިމް ވިދާޅުވިއެވެ.
ފެނާއި ނަރުމާއާއި ކަރަންޓްގެ ޚިދުމަތް މެދު ނުކެނޑި ފޯރުކޮށްދެމުންދާއިރު މިޚިދުމަތްތައް މެދުނުކެނޑި އެންމެ ފުރިހަމައަށް ދިނުމަށްޓަކައި އެއިރެއްގައި އޮންނަ ސަރުކާރެއްގެ ފުރިހަމަ އެއްބާރުލުން އަބަދުވެސް ދެއްވުމަށް ކައުންސިލްގެ ނައިބް ރައީސް ފަޔާޒް އެދިވަޑައިގެންނެވިއެވެ.
