ސައިކަލް ލައިސަންސަށް އެދި ހުށަހެޅޭނީ 40 ގަޑިއިރު ދުއްވުމަށްފަހުކަމަށް ބުނާ މާއްދާ އުވާލައިފި
މީގެ ކުރިން އެކި ގިންތީގެ އުޅަނދުތަކަށް ވަކި މުއްދަތުތަކެއް ކަނޑައަޅާފައި އޮވޭ
ވަކި މުއްދަތެއް ވަންދެން އުޅަނދު ދުއްވުމުގެ އަމަލީ ތަމްރީނު ފުރިހަމަ ކުރާކަށް ނުޖެހޭނެ
އެއްގަމު އުޅަނދު ދުއްވަން ދަސްކުރުމަށް، ޑްރައިވިންގ ސްކޫލެއްގައި ވަކި މުއްދަތެއް ވަންދެން އުޅަނދު ދުއްވުމުގެ އަމަލީ ތަމްރީނު ފުރިހަމަކުރުމަށްފަހު ލައިސަންސް ހޯދުމަށް އެދި ހުށަހަޅާ ގޮތަށް "ޑްރައިވިންގ ސްކޫލް ހިންގުމާއި ޑްރައިވިންގ އިންސްޓްރަކްޓަރުންގެ ގޮތުގައި ހަރަކާތްތެރިވުމުގެ ގަވާއިދަށް" އިތުރުކުރި މާއްްދާ އުވާލައިފިއެވެ.
ޓްރާންސްޕޯޓު މިނިސްޓްރީން 11 ޖެނުއަރީ 2022 ގައި އާންމުކުރި ޤަވާއިދުގައި ވަނީ އެކި ގިންތީގެ އުޅަނދުތަކަށް ވަކި މުއްދަތުތަކެއް ކަނޑައަޅާފައެވެ. އެގޮތުން އެންމެ ގިނަ ގަޑިއިރު ކަނޑައަޅާފައިވަނީ ސައިކަލަށެވެ. އެއީ 40 ގަޑިއިރެވެ.
ގަވާއިދުގައި ބުނެފައިވަނީ މިމުއްދަތަށް ދުއްވަން ދަސްކުރާ ފަރާތުން އުޅަނދު ދުއްވިކަމުގެ ރިކޯޑާއި ޓްރެއިނިންގ ލޮގު ޑްރައިވިންގ ސްކޫލުން ނުވަތަ ޑްރައިވިންގ އިންސްޓްރަކްޓަރު ބަލަހައްޓަންވާނެ ކަމަށެވެ.
އެހެންނަމަވެސް، އެ މާއްދާ އުވާލައި 10 އޭޕްރީލް 2022 ގައި ވަނީ ސަރުކާރުގެ ގެޒެޓުގައި އެ އިސްލާޙު ޝާއިއުކޮށްފައެވެ. އެގޮތުން ޑްރައިވިންގ ސްކޫލެއްގައި ވަކި މުއްދަތެއް ވަންދެން އުޅަނދު ދުއްވުމުގެ އަމަލީ ތަމްރީނު ފުރިހަމަ ކުރުމަށްފަހު ލައިސަންސް ހޯދުމަށް އެދި ހުށަހަޅާ ގޮތަށް އޮންނަ މާއްދާ ވަނީ އުވާލާފައެވެ.
މިގަވާއިދުގައި ޑްރައިވިންގ ސްކޫލާއި ޑްރައިވިންގ އިންސްޓްރަކްޓަރުންނާއި ގުޅޭ ގޮތުންވެސް ވަނީ ވަކި ޝަރުތުތަކެއް ކަނޑައަޅާފައެވެ. ޑްރައިވިންގ އިންސްޓްރަކްޝަނުންނަށް ބަލާއިރު ޑްރައިވިންގ އިންސްޓަރަކްޓަރަކަށް ވެވޭނީ އުމުރުން 18 އަހަރާއި 60 އަހަރާއި ދެމެދުގެ މީހަކަށެވެ.
އަދި ދުއްވަން ދަސްކޮށްދޭ ގިންތީގެ އުޅަނދު ދުއްވުމުގެ ލައިސަންސް ލިބި ދުއްވުމުގައި މަދުވެގެން 3 އަހަރު ދުވަހުގެ ތަޖުރިބާ ލިބިފައި ވާންވާނެކަމަށް ކުރިން ބަޔާންކޮށްފައި އޮތް ނަމަވެސް،މިހާރު އެ މުއްދަތުވަނީ 2 އަހަރަށް ކުޑަކޮށްފައެވެ.
މީގެ އިތުރުން، އެއްގަމު ދަތުރުފަތުރުގެ ޤާނޫނާއި އެ ޤާނޫނުގެ ދަށުން ހަދައިފައިވާ ގަވާއިދަކާއި ޚިލާފުވެގެން ފާއިތުވި 5 އަހަރު ދުވަހުގެ ތެރޭގައި ލައިސަންސް ހިފަހައްޓައިފައިވާ މީހެއް ކަމުގައި ނުވުން މީގެ ކުރިން ޝަރުތު ކޮށްފައިވާއިރު،އެ މުއްދަތުވެސް މިހާރުވަނީ 1 އަހަރަށް ކުޑަކޮށްފައެވެ.
