މައްސަލައެއް ދިމާނުވާނަމަ ފޮނައްޑޫ އޮޕަރޭޝަނަށް ގެނައުމުގެ މަސައްކަތް 8 ނުވަތަ 9 މަސް ދުވަހުގެ ތެރޭގައި ނިންމާލެވޭނެ ކަމަށް މިފްކޯގެ ސީއީއޯ އިސްމާއިލް ފައުޒީ ވިދާޅުވެއްޖެއެވެ.
ސަރުކާރުގެ ބެލުމުގެ ދަށަށް ގެނައުމަށް ބޭންކަށް ދައްކަން ޖެހޭ ފައިސާ މާޗް މަހުގެ 6 ވަނަ ދުވަހު ސަރުކާރުން ބޭންކަށް ދެއްކުމަށްފަހު އެރަށް މިހާރު ވަނީ މިފްކޯއާ ހަވާލުކޮށްފައެވެ. ފޮނައްޑޫ އޮޕަރޭޝަނަސް ގެނައުމަށް މިހާރު ކުރަމުންދާ މަސައްކަތްތަކާ ގުޅިގެން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ފައުޒީ ވިދާޅުވީ ފޮނައްޑޫ އޮޕަރޭޝަނަށް ގެނައުމަށް ހަދަންޖެހޭ އެސެސްމެންޓްތަކުގެ މަސައްކަތް މިހާރު ކުރިއަށްދާ ކަމަށެވެ. އެތަން ސާފުކޮށް އެތަނުގައި ހުރި މެޝިނަރީތަކަށް ދިމާވެފައިވާ މައްސަލަތައް ދެނެގަތުމަށް މިފްކޯގެ ޓެކްނިކަލް މުވައްޒަފުން ހަރަކާތްތެރިވަމުންދާކަމަށް ފައުޒީ ވިދާޅުވިއެވެ.
ފައުޒީ ވިދާޅުވީ އެތަން ރަނގަޅު ހާލަތަކަށް ގެނެސް އެތަނުގެ ޚިދުމަތް އަވަހަށް ފެށުމަކީ އުންމީދެއް ކަމަށާއި، މި މަސައްކަތަށް ބޭނުންވާ ބަޖެޓު އެއްވެސް މައްސަލައެއް ނުޖެހި ހަމަޖެހޭނަމަ މި މަސައްކަތް އަވަހަށް ނިންމާލެވޭނެ ކަމަށް ފައުޒީ ވިދާޅުވިއެވެ. އަދި ފައިސާ ލިބޭ ވަރަކުން ތަނުގައި ވަސީލަތްތައް ގާއިމްކުރުމުގެ މަސައްކަތްވެސް ކުރިއަށްދާނެ ކަމަށް ފައުޒީ ވިދާޅުވިއެވެ.
ފޮނައްޑޫގައި މިހާރު އޮތް ބަނދަރަކީވެސް މަސްވެރިންނަށް ފަސޭހައިން ވަދެ، މަސް ކިރޭނެ ބަނދަރަކަށް ވާން ޖެހޭ ކަމަށާއި، އެހެންކަމުން ބަނދަރުގެ މަސައްކަތަށްވެސް ފުދޭވަރެއްގެ ޚަރަދުތަކެއް ދާނެ ކަމަށް ފައުޒީ ވިދާޅުވިއެވެ. މި މަސައްކަތްވެސް ފައިސާ ހަމަޖެހޭ ވަރަކުން ކުރިއަށްދާނެ ކަމަށާއި، މިހާރު ހުރި ޕްލޭންތަކާ އެއްގޮތަށް 8 ނުވަތަ 9 މަސް ދުވަހުގެ ތެރޭގައި މަސައްކަތް އެއްކޮށް ނިންމައި ޚިދުމަތްދޭން ފެށޭނެ ކަމަށް އުންމީދުކުރައްވާކަމަށް ފައުޒީ ވިދާޅުވިއެވެ.
މި މަސައްކަތް ނިމުމުން ތ. އަތޮޅުގައި މަސް ކިރުމަށް މަސްވެރިންނަށް ދިމާވާ ދަތިތައް ހައްލުވެގެންދާނެ ކަމަށާއި،ކައިރި އަތޮޅުތަކުގެ މަސްވެރިންނަށް ދިމާވާ ދަތިތަކަށްވެސް ވަރަށް ބޮޑު ލުޔެއް ލިބިގެންދާނެ ކަމަށް ފައުޒީ ވިދާޅުވިއެވެ.
ފޮނައްޑޫ ކުރިން ހަވާލުކޮށްފައި އޮތީ އަމިއްލަ ކުންފުންޏެއް ކަމަށްވާ އައިއޯއެސް ކޯޕަރޭޝަނާއެވެ. އެކުންފުންޏަށް އެތަން ނުހިންގި ބޭންކުން އެތަން ބީލަމުގައި ވިއްކާލުމަށް ތައްޔާރުވެފައިވަނިކޮށް، ތ އަތޮޅަށް ރައީސުލްޖުމްހޫރިއްޔާ ކުރެއްވި ދަތުރުފުޅުގެ ތެރެއިން މަސްވެރިންނާއި ބައްދަލުކުރައްވާ ރައީސް ވަނީ ފޮނައްޑޫ އަލުން އޮޕަރޭޝަނަށް ގެނައުމަށް މަސައްކަތް ކުރައްވާނެ ކަމަށް ވިދާޅުވެފައެވެ.
