މިނިސްޓްރީން ކަނޑައަޅާފައިވާ އަގަށްވުރެން ބޮޑުކޮށް އަގު ނެގުމަށް ހިތްވަރެއް ނުދެން: އަވަސް ރައިޑް
8 އެޕްރީލު 2022 | ހުކުރު 18:53އެޕްލިކޭޝަނުން ދައްކާ އަގު އެކަނި ދެއްކުމަށް ކަސްޓަމަރުންނަށް ނަސޭހަތްތެރިވި
މާލޭގެ މަގުމަތި
ޓްރާންސްޕޯޓް މިނިސްޓްރީ ކަނޑައަޅާފައިވާ އަގަށްވުރެ ބޮޑުކޮށް އަގު ނެގުމަށް ޑްރައިވަރުންނަށް ހިތްވަރު ނުދޭ ކަމަށް އަވަސް ރައިޑުން ބުނެފިއެވެ.
އަވަސް ރައިޑުން ކުރި ޓުވީޓެއްގައި ވަނީ އެޕްލިކޭޝަނުން ދައްކާ އަގު އެކަނި ދެއްކުމަށް ކަސްޓަމަރުންނަށް ނަސޭހަތްތެރިވެފައިކަމަށެވެ. އަދި ޓްރާންސްޕޯޓް މިނިސްޓްރީ ކަނޑައަޅާފައިވާ އަގަށްވުރެން ބޮޑުކޮށް އަގު ނެގުމަށް ޑްރައިވަރުންނަށް ހިތްވަރު ނުދޭ ކަމަށް ވެސް ވަނީ ބުނެފައެވެ.
ބައެއް ޓެކްސީ ޑްރައިވަރުން އަމިއްލަ އަގުތަކުގައި ދަތުރު ކުރަމުންދާއިރު ޓެކްސީ ޑްރައިވަރުންނާމެދު ލިބިފައި ހުރި ޝަކުވާތައް ބަލާ، ފިޔަވަޅު އަޅާނެ ކަމަށް ޓްރާންސްޕޯޓް މިނިސްޓްރީއިން ވަނީ ބުނެފައެވެ.
ބައެއް ޓެކްސީ ޑްރައިވަރުންނާއި ސެންޓަރުތަކުން އަމިއްލަ އަގެއް ކަނޑައަޅައި އެއަގަށް ދަތުރުކުރަން ފެށި ފަހުން އެކަމާމެދު ފިޔަވަޅު އަޅާނެ ކަމަށް ބުނެ ޓްރާންސްޕޯޓް މިނިސްޓްރީން ވަނީ ފިނި އިންޒާރެއް ދީފައެވެ.
ތެލުގެ އަގު ބޮޑުވުމާއި ގުޅިގެން، ޓެކްސީ ސެންޓަރުތަކުންނާއި ޓެކްސީ ޑްރައިވަރުން ގުޅިގެން މަޝްވަރާކުރުމަށްފަހު އަމިއްލަ އަގެއް ކަނޑައަޅައި، އެ އަގުގެ މައްސަލައިގައި ޓްރާންސްޕޯޓު މިނިސްޓްރީގެ އިސްވެރިންނާއި ބައްދަލުކުރުމަށްފަހު އެކަމުގައި އެދެވޭ ޖަވާބެއް ނުލިބުމުން، ޓެކްސީ ސެންޓަރުތަކުން މުޒާހަރާ ކުރުމަށްފަހު އަމިއްލަ އަގުގައި ދަތުރުކުރަން ފެށިއެވެ. ނަމަވެސް މިނިސްޓްރީން އެކަމުގައި ވަކި އެއްޗެއް ބުނެފައެއް ނުވެއެވެ.
ޓެކްސީ ދަތުރުތަކުގެ އަގުގެ މައްސަލައިގައި މީޑިއާތަކުން މިނިސްޓްރީގެ މީޑިއާ ގްރޫޕުގައި ސުވާލުކުރިތާ 3 ދުވަސް ފަހުން، މި މައްސަލައިގައި ޓްރާންސްޕޯޓް މިނިސްޓްރީން ނެރުނު ނޫސްބަޔާނުގައި ބުނެފައިވަނީ ޓެކްސީގެ ޚިދުމަތަކީ ރައްޔިތުންނާއި ގުޅުން ހުރި އަސާސީ ޚިދުމަތަކަށްވެފައި ދުނިޔޭގެ ހުރިހާ ގައުމެއްގައިވެސް އަދި ދިވެހިރާއްޖޭގައި ވެސް މި ޚިދުމަތަކީ ރެގިއުލޭޓް ކުރެވިގެން ދެވޭ ޚިދުމަތަކަށްވާތީ، ޓެކްސީ ރަޖިސްޓްރީ ކުރުމާއި ޓެކްސީތަކަށް ހުއްދަ ދިނުމާއި ޓެކްސީ ދަތުރުތަކުގެ އަގު ކަނޑައެޅުމަކީ ޚިދުމަތް ހޯދާ ފަރާތާއި އަދި ޚިދުމަތް ލިބިގަންނަ ފަރާތުގެ ހައްގުތައް ހިމާޔަތްކުރެވޭ ގޮތަށް ކަނޑައަޅާފައިވާ ކަމެއް ކަމަށެވެ.
ތެލުގެ އަގަށްއައި ބަދަލާއި ގުޅިގެން ޓެކްސީ ޑްރައިވަރުންގެ ފަރާތުން ޚިދުމަތުގެ އަގުތަކަށް ބަދަލު ގެނައުމާއި ގުޅޭގޮތުން 16 ޓެކްސީ ސެންޓަރެއް ހިމެނޭ ގޮތަށް 17 މާރޗުގައި ޓެކްސީ ޑްރައިވަރުންނާއި ޓެކްސީ ސެންޓަރުތަކުން ޓެކްސީގެ ޚިދުމަތުން އަގު ނަގާނެ ގޮތާއި ގުޅޭގޮތުން އެ މިނިސްޓްރީއަށް ސިޓީއެއް ހުށަހަޅާފައިވާ ކަމަށް ބުނެފައިވެއެވެ. އަދި ޓެކްސީ ސެންޓަރުތަކުން ހުށަހެޅި ކަންކަމާއި ގުޅިގެން އެމިނިސްޓްރީން ފާހަގަކޮށްފައިވަނީ ޓެކްސީގެ ޚިދުމަތަކީ ހުރިހާ ރައްޔިތުންނާވެސް ގުޅިލާމެހިފައިވާ އަސާސީ ޚިދުމަތަކަށްވެފައި ދެ ފަރާތުގެ ހައްގުތައް ހިމާޔަތް ކުރުމަކީ އެ މިނިސްޓްރީގެ ޒިންމާއެއް ކަމަށް ޓްރާންސްޕޯޓް މިނިސްޓްރީން ބުނެއެވެ.
އަދި އަގު ކަނޑައެޅުމަކީ ޓެކްސީ ގަވާއިދުގެ 15 ވަނަ މާއްދާގެ ދަށުން އެ މިނިސްޓްރީއަށް ލިބިގެންވާ ބާރެއްކަމަށާއި އަދި ޓެކްސީ ޚިދުމަތުގެ އަގު ކަނޑައެޅުމަކީ ޓެކްސީތަކަށާއި ސެންޓަރުތަކަށް ގަވާއިދުގެ ދަށުން ލިބިގެންވާ ބާރެއް ނޫންކަމަށްވެސް ބުނެފައިވެއެވެ. އަދި ޓެކްސީ ސެންޓަރުތަކުން ހުށަހެޅި އެހެނިހެން ކަންކަމުގައި ވަގުތުން ފިޔަވަޅު އަޅައިދެވެން ހުރިކަންކަމަށް ފިޔަވަޅު އަޅައި ދޭނެކަމަށާއި، އެހެންކަންކަން ހައްލުކޮށްދިނުމަށް ދެފަރާތުން މަޝްވަރާކޮށްގެން ގޮތެއް ހޯދާނެކަަމަށް މިނިސްޓްރީން ނެރުނު ނޫސްބަޔާނުގައި ވަނީ ބުނެފައެވެ.
ޓެކްސީ ޑްރައިވަރުން ކަނޑައަޅާފައިވާ އަގުތަކަށް ބަލާއިރު މާލޭ ސިޓީގެ އެތެރޭގެ ދަތުރަކަށް 30 ރުފިޔާ، ހުޅުމާލެ ފޭސް އެކެއް އަދި ފޭސް ދޭއްގެ އެތެރޭ ދަތުރަކަށް 25 ރުފިޔާ، ހުޅުމާލެ ފޭސް އެކަކުން ހުޅުމާލެ ފޭސް ދޭކަށް 40 ރުފިޔާ ނެގުމަށް ވަނީ ނިންމާފައެވެ. އަދި ހުޅުމާލެ ފޭސް ދޭކުން މާލެއަށް އަދި މާލެ އިން ހުޅުމާލެ ފޭސް ދޭކަށް 120 ރުފިޔާ، މާލެއިން ހުޅުމާލެއަށް އަދި ހުޅުމާލެއިން މާލެއަށް 100 ރުފިޔާ، އެއާޕޯޓުން މާލެއަށް އަދި މާލެއިން އެއާޕޯޓަށް 80 ރުފިޔާ، ހުޅުމާލެއިން އެއާޕޯޓްގެ ސީޕްލޭން ޓާމިނަލަށް 100 ރުފިޔާ، މާލެއިން ހުޅުލޭ އެއާޕޯޓްގެ ސީޕްލޭން ޓާމިނަލަށް 100 ރުފިޔާ އަދި، ހުޅުމާލެ ފޭސް ދޭކުން ހުޅުލެ ސީޕްލޭން ޓާމިނަލަށް 120 ރުފިޔާ ނެގުމަށް ވަނީ ނިންމާފައެވެ.
