130 ކިލޯ ޑްރަގް މައްސަލައިގައި އިސްކޮށް އުޅުނުކަމަށް ތުހުމަތުވާ 2 މީހުން ބޭސްފަރުވާއަށް ދޫކޮށްލައިފި
6 އެޕްރީލު 2022 | ބުދަ 09:03އަހުމަދު މޫސާގެ ޝަރީއަތުގެ ކުރީގެ ހުށައެޅުންތަކުގެ ބައި ވަނީ ކުރިއަށް ގެންދަވާފައި
ކަނޑުމަގުން ރާއްޖެއަށް އެތެރެކުރި 130 ކިލޯގެ މަސްތުވާތަކެތީގެ މައްސަލައިގައި އިސްކޮށް އުޅުނުކަމުގެ ތުހުމަތުވާ 2 މީހުން
ދިވެހިންގެ ބަޔަކު ބޭރުގެ ބަޔަކާއި ގުޅިގެން ރާއްޖެއަށް އެތެެރެކުރިކަމަށް ތުހުމަތު ކުރެވޭ 130 ކިލޯގެ މަސްތުވާތަކެތީގެ މައްސަލަައިގައި ދައުލަތުން ދައުވާކޮށްފައިވާ މީހުންގެ ތެރެއިން އެކަމުގައި އިސްކޮށް އުޅުނުކަމުގެ ތުހުމަތުވާ ދެ މީހުން ބޭސްފަރުވާއަށް ދޫކޮށްލުމަށް ކްރިމިނަލް ކޯޓުން ނިންމައިފިއެވެ.
އެ މައްސަލައިގައި އިސްކޮށް އުޅުނުކަމުގެ ތުހުމަތުކޮށް، އެކަމާއި ގުޅޭ ދައުވާ އުފުލާފައިވަނީ ގއ. ވިލިނގިލި، ލައިޓްހައުސް، ޝަހީބް އިބްރާހިމްއާއި، ހއ. ހޯރަފުށި، ވައިލެޓްވިލާ އަހުމަދު މޫސާގެ މައްޗަށެވެ.
އެމީހުން ބޭސްފަރުވާއަށް 2 މަހަށް ދޫކޮށްލެއްވުމަށް ނިންމެވީ ކްރިމިނަލް ކޯޓުގައި ބުދަ ދުވަހު ކުރިއަށްދިޔަ އަޑުއެހުމުގައެވެ. މި އަޑުއެހުމުގައި އޮތީ ޝަރީއަތުގެ ކުރީގެ ހުށައެޅުންތައް ހުށައެޅުމެވެ. އެހެންނަމަވެސް، ޝަހީބުގެ ފަރާތުން ޝަރީއަތުގެ ކުރީގެ ހުށައެޅުންތައް ހުށައަޅުއްވާ ވަކީލު ހާޒިރުވެވަޑައިގެންފައި ނުވާތީ އެ ބައި ކުރިއަށް ގެންގޮސްފައެއް ނުވެއެވެ.
މި އަޑުއެހުމުގައި ދައުވާ ލިބޭ އަހުމަދު މޫސާގެ ޝަރީއަތުގެ ކުރީގެ ހުށައެޅުންތަކުގެ ބައި ވަނީ ކުރިއަށް ގެންދަވާފައެވެ.
ބުދަ ދުވަހުގެ އަޑުއެހުމުގައި އެދެމީހުންގެ ބަންދު މުރާޖައާ އަޑުއެހުން ކުރިއަށް ގެންދެވިއެވެ.
މި އަޑުއެހުމުގައި ޝަހީބުގެ ފަރާތުން ވަނީ އޭނާގެ ބޭސްފަރުވާގެ ކަންކަމުގައި އިހުމާލުވާކަމަށް ބަޔާންކޮށްފައެވެ. އެގޮތުން އޭނާގެ ނަފްސާނީ މައްސަލަތަކާއި، ކަށީގެ މައްސަލަތައް ހުރިއިރު، އެ ކަންކަމުގައި އެކަށީގެންވާ ފަރުވާ ދެވިފައިނުވާކަން ދިފާއުން ފާހަގަ ކުރެއެވެ. އޭނާގެ މައިބަދައިގެ 2 ޑިސްކް ގުޑާފައިވާއިރު، އެކަމާއި ގުޅިގެން ދޭންޖެހޭ ފަރުވާވެސް ދެވިފައިނުވާކަމަށް ދިފާއުން ބުނެއެވެ.
މީގެއިތުރުން، އޭނާ ނަފްސާނީ ޑޮކްޓަރަކަށް ދެއްކުމުން އޭނާއަށް ކައުންސެލިން ދޭންޖެހޭނެކަމަށް ބުނެފައިވީ ނަމަވެސް އެކަންވެސް ކުރިއަށް ނުދާކަން ދިފާއުން ފާހަގަކުރެއެވެ.
އަހުމަދު މޫސާގެ ނޭވާލާ ނިޒާމުގެ މައްސަލަތަކެއް ހުރިއިރު، އެކަމާ ގުޅިގެން ހަދަންޖެހޭ ޓެސްޓުތައް ހެދިފައި ނުވާކަމަށް އޭނާގެ ވަކީލު ވިދާޅުވިއެވެ. ދައުލަތުންވެސް ވަނީ އެ ޓެސްޓުތައް ހެއްދިފައި ނެތްކަމަށް ބުނެފައެވެ.
ޖުމުލަ ގޮތެއްގައި އެ ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވަނީ އެ ދެމީހުން ފުރުން މަނާކޮށް، ބޭސްފަރުވާއަށް 2 މަހަށް ދޫކޮށްލެއްވުމަށް ނިންމަވާފައެވެ.
