މިނިވަންކަމާއެކު މަސައްކަތް ކުރުމަށް އެއްވެސް ގޮންޖެހުމެއް ނެތް: އޭސީސީގެ ރައީސް
މަސައްކަތް ކުރުމުގައި މިނިވަންކަން ގެއްލޭނެ އެއްވެސް މާހައުލެއް ނެތް
އޭސީސީގެ ރައީސް އާދަމް ޝާމިލް ނޫސްވެރިންގެ ބައްދަލުވުމުގައި ވާހަކަ ދައްކަވަނީ
އެންޓި ކޮރަޕްޝަން ކޮމިޝަން (އޭސީސީގެ) މެމްބަރުންނަށް މިނިވަންކަމާއެކު މަސައްކަތް ކުރުމަށް އެއްވެސް ގޮންޖެހުމެއް ނެތްކަމަށް އެ ކޮމިޝަންގެ ރައީސް އާދަމް ޝާމިލް ވިދާޅުވެއްޖެއެވެ.
އޭސީސީއަށް ނަތީޖާ ނެރެވޭނީ މިނިވަންކަމާއެކު މަސައްކަތް ކުރުމުގެ ފުރުސަތު ލިބިގެންކަމަށް އެ ކޮމިޝަންގެ ކުރީގެ ރައީސް ވިދާޅުވުމާއި ގުޅިގެން ރާއްޖެއެމްވީން ކުރި ސުވާލަކަށް ޖަވާބު ދެއްވަމުން އެކޮމިޝަންގެ މިހާރުގެ ރައީސް ޝާމިލް ވިދާޅުވީ މަސައްކަތް ކުރުމުގައި މިނިވަންކަން ގެއްލޭނެ އެއްވެސް މާހައުލެއް ނެތް ކަމަށެވެ.
ޝާމިލް ވިދާޅުވީ ކޮމިޝަންގެ އަމާޒަކީ ދައުލަތުން ހިންގާ ކޮރަޕްޝަންގެ އަމަލުތައް ހުއްޓުވުން ކަމަށާއި ވަކި ފަރާތަކަށް ނުޖެހި، ރައްޔިތުންގެ މަސްލަހަތުގައި ކޮމިޝަނުން ދެމި އޮންނާނެ ކަމަށެވެ.
އޭސީސީން ވަނީ މި ނޫސްވެރިންގެ ބައްދަލުވުމުގައި ކުރު ރާސްތާ އޮޕަރޭޝަނަލް ޕްލޭނެއް ވެސް ތައާރަފު ކޮށްފައެވެ. މި ޕްލޭންއާ ގުޅޭގޮތުން ޝާމިލް ވިދާޅުވީ މި ޕްލޭންގެ މަޤްސަދަކީ ކަންތައްތައް ދެނެގަނެ، ދައުލަތުގެ ހުރިހާ މުއައްސަސާއެއް އެކުވެރިވެ މަސައްކަތް ކުރުން ކަމަށެވެ. އަދި މަސައްކަތް ކުރައްވާނީ ކޮރަޕްޝަން ނުހިންގާނެ ގޮތަކަށް އުސޫލުތައް އެކުލަވާލާ، ކޮޕަރްޝަން ހުއްޓުވުމަށް ކަމަށެވެ.
އޭސީސީން ތައާރަފުކޮށްފައިވާ މި ކުރު ރާސްތާ އޮޕަރޭޝަނަލް ޕްލޭންގައި ޖުމްލަ 6 ކަމެއް ވަނީ ހިމަނާފައެވެ. އޭސީސީން ބުނީ ދައުލަތަށް ލިބެންޖެހޭ ވަރަށް ގިނަ އަދަދެއްގެ ފައިސާ ނުލިބިވާ ކަމަށެވެ. އަދި ރާއްޖޭގައި އެސެޓް ރިކަވަރ ކުރެވޭނެ ނިޒާމެއް ޤާއިމުވެފައި ނެތް ކަމަށެވެ. އެހެންކަމުން އެ ނިޒާމު ހަރުދަނާ ކުރުމުގެ މަސައްކަތް ކުރާނެ ކަމަށް ވެސް އެ ކޮމިޝަނުން ވަނީ ބުނެފައެވެ.
އޭސީސީން ބުނީ މަސައްކަތްތައް ކުރިއަށް ގެންދިޔުމުގައި ޤާނޫނަށް ނުވަތަ ޤަވާއިދަކަށް އިސްލާހު ގެންނަން ޖެހުނަސް އެ ކޮމިޝަނުން އެ މަސައްކަތް ކުރާނެ ކަމަށެވެ.
އެންޓި-ކޮރަޕްޝަން ކޮމިޝަން (އޭސީސީ) ގެ ރައީސްގެ މަޤާމަށް އަލްއުސްތާޛު އާދަމް ޝާމިލް އަދި ކޮމިޝަނުގެ ނާއިބުރައީސްގެ މަޤާމަށް އަލްއުސްތާޛު ޢަބްދުއްސަލާމް ޢައްޔަންކުރައްވާފައިވަނީ މާރޗް މަހުގައެވެ. މިދެބޭފުޅުންނަށްވަނީ ބުރާސްފަތި ދުވަހު ބޭއްވި ކޮމިޝަނުގެ މެމްބަރުންގެ ޖަލްސާގައި، މެމްބަރުންގެ އިއްތިފާގުން ރުހުން ދީފައެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ، އެންޓިކޮރަޕްޝަން ކޮމިޝަނަށް އައު މެމްބަރުން ވެސް ޢައްޔަންކުރައްވާފައެވެ.
އެންޓި ކޮރަޕްޝަން ކޮމިޝަނަށް ރައީސުލްޖުމްހޫރިއްޔާ ޢައްޔަންކުރެއްވި އިތުރު ބޭފުޅުންނަކީ ޠާހާ މުޙައްމަދާއި ޝަޒްނާ ހާޝިމުގެ އިތުރުން ޝިޔާމާ މުޙައްމަދުއެވެ.
އޭސީސީގެ ރައީސްކަމަށް އައްޔަން ކުރެއްވި އާދަމް ޝާމިލް އެންމެފަހުން ހުންނެވީ ޗިލްޑްރަންސް އޮމްބަޑްސްޕަރސަންގެ އޮފީހުގެ އިންވެސްޓިގޭޝަން އެންޑް ލީގަލް ޑިޕާޓްމަންޓުގެ ޑިރެކްޓަރެއްގެ މަޤާމުގައެވެ. އަލްއުސްތާޛު އާދަމް ޝާމިލް ވަނީ ދިވެހިރާއްޖޭގެ ޤައުމީ ޔުނިވަރސިޓީން މާސްޓަރ އޮފް ލޯ ހާސިލު ކުރައްވާފައެވެ.
ނައިބުރައީސް ކަމަށް އައްޔަން ކުރެއްވި ޢަބްދުއްސަލާމް އެންމެފަހުން ހުންނެވީ އެންޓިކޮރަޕްޝަން ކޮމިޝަނުގެ ސީނިއަރ އިންވެސްޓިގޭޝަން އޮފިސަރގެ މަޤާމުގައެވެ. އަލްއުސްތާޛު ޢަބްދުއްސަލާމް ވަނީ ޤައުމީ ޔުނިވަރސިޓީން ބެޗްލަރ އޮފް ޝަރީޢާ އެންޑް ލޯ ހާސިލު ކުރައްވާފައެވެ.
