އެމްއެމްޕީއާރްސީގެ މައްސަލައިގެ ސްޕީޑް އަވަސްކުރުމަށް 12 މެމްބަރުންގެ ޓީމެއް
ޖޮއިންޓް އިންވެސްޓިގޭޝަންގެ ބޭފުޅުންނާއި ބައްދަލުކޮށްފައިވޭ
އޭސީސީއިން ބޭއްވި ނޫސްވެރިންގެ ބައްދަލުވުމުގެ ތެރެއިން
އެމްއެމްޕީއާރްސީގެ ހިޔާނާތުގެ މައްސަލައިގެ ސްޕީޑް އަވަސްކުރުމަށް 12 މެމްބަރުންގެ ޓީމެއް އެކުލަވާލާފައިވާކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.
އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި އޭސީސީގެ ނައިބު ރައީސް ޢަބްދުއް ސަލާމް ވިދާޅުވީ ރައްޔިތުންގެ މަސްލަހަތު ހިމެނޭ މައްސަލަތަކުގައި ވަރަށް ބައިވަރު ބަދަލުތައް ގެންނަ އެބަހުރި ކަމަށެވެ. އަދި ޕްރައިރޮޓައިޒް އުސޫލު އިސްލާހު ކުރުމުގެ މަސައްކަތް ކުރަމުންދާ ކަމަށާއި ދައުލަތުން ގެއްލިފައި ހުރި ފައިސާގެ މައްސަލަތައް ދެނެގަތުމަށް މިކަމުގެ ސަބަބުން ފަސޭހަވެގެންދާނެ ކަމަށެވެ.
އެމްއެމްޕީއާރްސީގެ ޖޮއިންޓް އިންވެސްޓިގޭޝަންގެ ބޭފުޅުންނާއި ބައްދަލު ކުރެއްވިކަން ފާހަގަކުރައްވާ ސަލާމް ވިދާޅުވީ ކުރިއަށްދާން ހުރި ގޮންޖެހުންތައް ދެނެގަނެ، ހެކި ބަދަލުކުރުމަށް އަމަލު ކުރާނެ ގޮތުގެ މަޝްވަރާކޮށްފައިވާ ކަމަށެވެ. އަދި ޖޮއިންޓް އިންވެސްޓިގޭޝަންގެ އެމްއޯޔޫ ރިވިއުކުރުމުގެ މަސައްކަތް ކުރަމުންދާ ކަމަށެވެ.
ފައިސާ ރިކަވަރ ކުރުމުގެ ބަޔަކީ އެންމެ އިސްކަންދޭނެ އެއްބައި ކަމަށާއި އެމްއެމްޕީއާރްސީގެ ހިޔާނާތުގެ މައްސަލައިގެ ސްޕީޑް އަވަސްކުރުމަށް 12 މެމްބަރުންގެ ޓީމެއް އެކުލަވާލާފައިވާކަމުގައި ވެސް ސަލާމް ވިދާޅުވިއެވެ. މި 12 މެމްބަރުންގެ އިތުރުން ފުލުހުންނާއި ޕްރޮސެކިއުޓަރ ޖެނެރަލްގެ އޮފީހުގެ މުވައްޒަފުންނާއި އިތުރު އިދާރާތައް ބައިވެރިވާނެ ކަމަށްވެސް ސަލާމް ވިދާޅުވިއެވެ.
ސަލާމް ވިދާޅުވީ 1124 މައްސަލަ ކޮމިޝަނުން ތަހުޤީޤު ކުރަން އެބަހުރި ކަމަށެވެ. 162 މައްސަލައިގެ އިވެލުއޭޝަން ނިންމާފައިވާ ކަމަށް ވެސް ސަލާމް ވިދާޅުވިއެވެ.
އޭސީސީން މިހެން ބުނެފައިވާއިރު އެމްއެމްޕީއާރްސީ މައްސަލައާއި ގުޅުންހުރި ފައިސާތަކެއް ދައުލަތަށް އަނބުރާ ދައްކަން ހައި ކޯޓުން ވަނީ ހުކުމްކޮށްފައެވެ. ހައި ކޯޓުން ހުކުމްކޮށްފައިވަނީ އދ. ފުށިދިއްގާ (ރަށްދިއްގާ) 50 އަހަރަށް ކުއްޔަށް ނެގުމަށްޓަކައި، އެޗް.އެމް.އެޗް.އައި ކޮމްޕެނީ ޕްރައިވެޓް ލިމިޓެޑުން ދެއްކި 50,000 ޑޮލަރު އޭރު އެމްއެމްޕީއާރްސީގެ މެނޭޖިންގ ޑިރެކްޓަރ އަބްދުﷲ ޒިޔަތުގެ އާއިލާގެ މީހެއްގެ ކުންފުންޏަކަށް ޖަމާކޮށްފައިވާތީ، އެ ފައިސާ ދައުލަތަށް އަނބުރާ ދެއްކުމަށެވެ.
ކުރީގެ ރައީސް ޔާމީންގެ ވެރިކަމުގައި އެމްއެމްޕީއާރްސީ މެދުވެރިކޮށް ހިންގި ބޮޑު ޚިޔާނާތުގެ މައްސަލައިގައި އެމަނިކުފާނުގެ މައްޗަށް ފަސް އަހަރުގެ ޖަލު ހުކުމެއް އިއްވައި، ފަސް މިލިއަން ޑޮލަރުން އެމަނިކުފާނު ވަނީ ޖޫރިމާނާ ވެސް ކޮށްފައެވެ. މިހާރު އެ މައްސަލައިގެ ޖަލު ޙުކުމް ތަންފީޒު ކުރައްވަމުން ގެންދަވާއިރު، ރިސޯޓެއްގެ ގޮތުގައި ތަރައްގީކުރުމަށް ވ. އާރަށް ބޭރުގެ ބަޔަކަށް ވިއްކައިގެން ލިބުނު ފައިސާ ރައީސް ޔާމީންގެ އަމިއްލަފުޅު އެކައުންޓަށް ޖަމާކޮށްފައިވާ ކަމަށް ބުނާ މައްސަލައެއްގައި ވެސް ދައުވާ ކޮށްދިނުމަށް އެދި ޕީޖީ އޮފީހަށް ވަނީ ފޮނުވާފައެވެ.
އާރަށުގެ އަގުގެ ގޮތުގައި ލިބުނު އެއް މިލިއަން ޑޮލަރު އަމިއްލަފުޅު އެކައުންޓަށް ޖަމާކޮށްފައިވާ ކަަމަށް ތަހުގީގު ރިޕޯޓުގައިވެއެވެ. ރައީސް ޔާމީންގެ މައްޗަށް މިފަހަރު ކުރަނީ ރިޝްވަތު ނެގުމާއި ކަޅުފައިސާ ދޮވުމުގެ ތުހުމަތެވެ.
ވ. ތިނަދޫ ކައިރީގައި އޮތް އާރަށަކީ ޕިކްނިކް ދާ ކުޑަ ރަށެކެވެ. އެ ރަށަކީ، ޑީއާރްޕީގެ ކުރީގެ ލީޑަރު، އަހްމަދު ތަސްމީނު އަލީގެ ހިއްސާ އޮންނަ ކުންފުންޏަކަށް ކުރިން ދީފައި އޮތް ރަށެކެވެ. ތަސްމީންގެ އަތުން އޮގަސްޓް 2015 ގައި އެރަށް އަތުލައި، ހަމަ އެ އަހަރުގެ ސެޕްޓެމްބަރު މަހު އެރަށް ހަވާލުކޮށްފައިވަނީ ވ. ފެލިދޫ ދާއިރާގެ ކުރީގެ މެމްބަރު ޔޫސުފް ނައީމާއެވެ.
ރައީސް ޔާމީނާއި ގާތް ގުޅުމެއް އޮންނަ ޔޫސުފް ނައީމަށް އެރަށް ހަވާލުކުރިތާ އެއްމަސްތެރޭގައި ބޭރުގެ ކުންފުންޏަކަށް ރަށް ވިއްކާލުމަށްފަހު ލިބުނު އެއް މިލިއަން ޑޮލަރު އެޗްއެސްބީސީގައި ހުރި ރައީސް ޔާމީންގެ އަމިއްލަފުޅު އެކައުންޓަކަށް ޖަމާކޮށްފައިވާކަމަށް ވެއެވެ.
