ޔުވެންޓަސް ބަލިކޮށް, އިންޓަރ މިލާނުން ތަށި ދިފާއުކުރުމުގެ އުއްމީދު ދަމަހައްޓައިފި

އިޓާލިއަން ލީގުގައި ޗެމްޕިއަން އިންޓަރމިލާނުން ޔުވެންޓަސް ބަލިކޮށް, ލީގު ދިފާއުކުރުމުގެ އުއްމީދު ދަމަހައްޓައިފިއެވެ. ޔުވެންޓަސްގެ މައްޗަށް އިންޓަރމިލާނުން ކުރި ހޯދީ 1-0 ނެވެ.

އިންޓަރމިލާނަށް މެޗުގައި ލަނޑު ޖަހައިދިނީ ޕެނަލްޓީއަކުން ހަކާން ޗަނޮނޯގްލޫއެވެ. މިއީ ފުރަތަމަ ހާފްގެ އިތުރު ވަގުތުގައި ޑެންޒެލް ޑަމްފްރީސްއަށް އަލެކްސް ސަންޑްރޯ ކުރި ފައުލަކަށް ދިން ޕެނަލްޓީއެކެވެ. ޕެނަލްޓީ ދިނީ ވީއޭއާރުން ބެލުމަށްފަހުއެވެ. މިމޮޅާއެކު އިންޓަރމިލާނަށް ވަނީ 30 މެޗުން 63 ޕޮއިންޓް ލިބިފައެވެ. ތާވަލްގައި އޮތީ 3 ވަނާގައެވެ. ދެވަނާގައި ނަޕޯލީ އޮތީ 31 މެޗުން 66 ޕޮއިންޓް ހޯދައިގެންނެވެ. ނަޕޯލީ ވަނީ ރޭ 3-1 ން އެޓްލާންޓާ ބަލިކޮށްފައެވެ.

އެއްވަނާގައި އޭސީމިލާން އޮތީ 30 މެޗުން 66 ޕޮއިންޓް ހޯދައިގެންނެވެ. ޔުވެންޓަސް ހަތަރު ވަނާގައި އޮތީ 31 މެޗުން 59 ޕޮއިންޓާއެކުއެވެ.