މި އަހަރުގެ ރަމަޟާން މަހު މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އިން ޚިދުމަތް ފޯރުކޮށްދޭނެ ގަޑިތައް އާންމުކޮށްފިއެވެ.

މި އަހަރުގެ ރަމަޟާންމަހު މީރާގެ ޓެކްސްޕޭޔަރ ސަރވިސް ސެންޓަރުން ނަންބަރު ދޫކުރުމަށް ހަމަޖެހިފައިވާ ގަޑިއަކީ އާދިއްތަ ދުވަހުން ފެށިގެން ބުރާސްފަތި ދުވަހަށް, ހެނދުނު 9:00ން މެންދުރުފަހު 12:00ށް ކަމަށް މީރާއިން ވަނީ ބުނެފައެވެ. އަދި، ޝައްވާލު މަހުގެ ފުރަތަމަ 7 ދުވަހު ވެސް މީރާއިން ނަންބަރު ދޫކުރުމަށް ހަމަޖެހިފައިވަނީ މި ގޮތަށް ކަމަށް ވެސް ބުނެފައިވެއެވެ.

މި ދުވަސްތަކުގައި މީރާގެ ޓެކްސްޕޭޔަރ ސަރވިސް ސެންޓަރުން ޚިދުމަތް ހޯދާ ފަރާތްތަކަށް މީރާގެ ސަރވިސް ސެންޓަރުން ނަންބަރު ނެގުމުގެ އިތުރުން، މީރާގެ މޯބައިލް އެޕްލިކޭޝަން އަދި ކިއުބީ އެޕްލިކޭޝަން މެދުވެރިކޮށް އޮންލައިންކޮށް ނަންބަރު ނެގޭނެކަމަށް ވަނީ ބުނެފައެވެ.

މީރާއަށް ބަލައިގަންނަ ހުރިހާ ޓެކްސްތަކާއި ގިނަ ފީތައް އޮންލައިންކޮށްވެސް ދެއްކޭނެ އިންތިޒާމް ހަމަޖެހިފައިވުމާއެކު، މީރާއިން ޚިދުމަތް ހޯދުމުގައި މި އޮންލައިން ޚިދުމަތްތައް ހިޔާރުކުރުމަށް މީރާއިން ވަނީ އިލްތިމާސް ކޮށްފައެވެ.

ރަމަޟާންމަހު މީރާއިން ޚިދުމަތް ފޯރުކޮށްދޭ ގަޑިތައް އާންމުކޮށްފައިވާއިރު, ޓެކްސް ދެއްކުމުގައި ޒިންމާތައް އަދާނުކުރާ ފަރާތްތަކާމެދު އަންނަ މަހުގެ 1ން ފެށިގެން ފިޔަވަޅު އަޅާނެކަމަށް ވެސް މީރާއިން ވަނީ ބުނެފައެވެ.

މީރާއިން ވަނީ ކޮވިޑް-19ގެ ސަބަބުން ޓެކްސް ދައްކާ ފަރާތްތަކާ އާންމު ފަރުދުންގެ ވިޔަފާރިތަކަށް ދިމާވި ހީނަރުކަމަށް ރިއާޔަތްކޮށް، އެ ފަރާތްތަކަށް ދެވުނު ލުޔެއްގެ ގޮތުން، ވޭތުވެދިޔަ 2 އަހަރުގެ ތެރޭގައި އެންފޯސްމަންޓް ފިޔަވަޅު އެޅުން މެދުކަނޑާލާފައެވެ.

އެހެންނަމަވެސް އޭޕްރިލް މަހުގެ ފުރަތަމަ ދުވަހުން ފެށިގެން, ޓެކުހުގެ ޒިންމާތައް އަދާނުކުރާ ފަރާތްތަކާ މެދު ފިޔަވަޅުއަޅަން ފަށާނެކަމަށް މީރާއިން ބުނެފައިވެއެވެ. އެހެންކަމުން ޓެކްސް ދައްކާ ފަރާތްތަކުން އެ ފަރާތްތަކުގެ ޓެކުހުގެ ހުރިހާ ކަމެއް ފުރިހަމައަށް އަދާކުރުމަށް ވަނީ އިލްތިމާސްކޮށްފައެވެ.

މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އަށް ބަލައިގަންނަ ޓެކްސް އަދި އެހެނިހެން ފައިސާތަކުގެ ތެރެއިން, ނުލިބިވާ ފައިސާ ހޯދުމުގެ ގޮތުން މީރާއިން އަމަލުކުރާނެ ގޮތް ބަޔާންކުރާ 5 (ފަސް) އުސޫލެއް މިހާރު ވަނީ އާންމުކޮށްފައެވެ.

މި އުސޫލުތަކަށް އަމަލުކުރަން ފެށުމާއެކު މިހާރު ތަންފީޒުކުރަމުންދާ "މީރާގެ އެންފޯސްމަންޓް ޕޮލިސީ" އުވިގެންދާނެކަމަށް މީރާއިން ބުނެފައިވެއެވެ.