ޓެކްސް ދެއްކުމުގައި ޒިންމާތައް އަދާނުކުރާ ފަރާތްތަކާމެދު އަންނަ މަހުގެ އެކަކުން ފެށިގެން ފިޔަވަޅު އަޅަނީ

ޓެކްސް ދެއްކުމުގައި ޒިންމާތައް އަދާނުކުރާ ފަރާތްތަކާމެދު އަންނަ މަހުގެ އެކަކުން ފެށިގެން މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ފިޔަވަޅު އެޅުމަށް ނިންމައިފިއެވެ.

މީރާ އިން ވަނީ ކޮވިޑް-19ގެ ސަބަބުން ޓެކްސް ދައްކާ ފަރާތްތަކާ އާންމު ފަރުދުންގެ ވިޔަފާރިތަކަށް ދިމާވި ހީނަރުކަމަށް ރިޢާޔަތްކޮށް، އެ ފަރާތްތަކަށް ދެވުނު ލުއިއެއްގެ ގޮތުން، ވޭތުވެދިޔަ 2 އަހަރުގެ ތެރޭގައި އެންފޯސްމަންޓް ފިޔަވަޅު އެޅުން މެދުކަނޑާލާފައެވެ.

އެހެންނަމަވެސް އޭޕްރިލް މަހުގެ އެއްވަނަ ދުވަހުން ފެށިގެން ޓެކުހުގެ ޒިންމާތައް އަދާނުކުރާ ފަރާތްތަކާ މެދު ފިޔަވަޅު އަޅަން ފަށާނެ ކަމަށް މީރާ އިން ބުނެފައިވެއެވެ. އެހެންކަމުން ޓެކްސް ދައްކާ ފަރާތްތަކުން އެ ފަރާތްތަކުގެ ޓެކުހުގެ ހުރިހާ ކަމެއް ފުރިހަމައަށް އަދާ ކުރުމަށް ވަނީ އިލްތިމާސްކޮށްފައެވެ.

މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ބަލައިގަންނަ ޓެކްސް އަދި އެހެނިހެން ފައިސާތަކުގެ ތެރެއިން ނުލިބިވާ ފައިސާ ހޯދުމުގެ ގޮތުން މީރާއިން ޢަމަލުކުރާނެ ގޮތް ބަޔާންކުރާ 5 (ފަސް) އުސޫލެއް މިހާރު ވަނީ އާންމުކޮށްފައެވެ.

މި އުސޫލުތަކަށް ޢަމަލުކުރަން ފެށުމާއެކު މިހާރު ތަންފީޒުކުރަމުންދާ "މީރާގެ އެންފޯސްމަންޓް ޕޮލިސީ" އުވިގެންދާނެ ކަމަށް މީރާ އިން ބުނެފައިވެއެވެ.