ދޫގަސް ހުރި އިމާރާތުގައި ހޮޓަލެއް އެޅުމަށް ގަން އިންޓަރނޭޝަނަލް އެއަރޕޯޓަށް ދިނުމަށް ރައީސް ނިންމަވައިފި
120 ކޮޓަރީގެ ގެސްޓްް ހައުސްއެއްގެގޮތަށް އަލުން އެތަން ތަރައްގީކުރުމަށް ރަސްމީކޮށް އެމްޕީއެލްއާ ހަވާލުކުރީ 2018 ޖޫން 14ގައި
ދޫގަސް ތަރައްގީކުރުމަށް އެމްޕީއެލްއާ ހަވާލުކުރީ ރައީސް ޔާމިންގެ ވެރިކަމުގައި
އައްޑޫސިޓީ ގަމުގައި ދޫގަސް ހުރި އިމާރާތުގައި ހޮޓަލެއް ތަރައްގީކުރުމަށް ގަން އިންޓަރނޭޝަނަލް އެއަރޕޯޓަށް ދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ނިންމަވައިފިއެވެ.
މިކަން އިއުލާން ކުރެއްވީ، އައްޑޫ ސިޓީ ރައްޔިތުންގެ މާހެފުން ފައްޓަވައިދެއްވައި ރައީސް ދެއްކެވި ވާހަކަފުޅުގައެވެ.
ދޫގަސް ހުރި އިމާރާތުގައި 120 އެނދުގެ ހޮޓަލެއް އަންނަ އަހަރު މެއި ނުވަތަ ޖޫން ހިސާބުގައި ހުޅުވިގެންދާނެ ކަމަށް ރައީސް ވިދާޅުވިއެވެ. އެއީ ވަރަސް ފުރިހަމަ ހޮޓަލަކަށް ވެގެންދާނެ ކަމަށާއި، އެތަން ތަަރައްގީކުރާނީ ކޮންވެންޝަންތައް ބޭއްވޭފަދަ ގޮތަކަށް ކަމަށް ރައީސް ވިދާޅުވިއެވެ. މީގެ އިތުރުންވެސް ތަފާތު ވަސީލަތްތަކާއެކު ތަރައްގީވެގެންދާނެ އެ ހޮޓަލަކީ، އައްޑޫ ސިޓީގެ ޒުވާނުންނަށް އިތުރުވަޒީފާތަކެއް އުފެދިގެންދާނެ ވަސީލަތަކަށް ވެގެންދާނެ ކަމަށް ރައީސް ވިދާޅުވިއެވެ.
ރަށްވެހި ފަތިސް ކެމްފެއިން ބައްދަލުވުމުގައި 2021 ވަނަ އަހަރު ވާހަކަދައްކަވަމުން ފިނޭންސް މިނިސްޓަރ އިބްރާހިމް އަމީރު ވަނީ, ގަމު ދޫގަސް ގެސްޓް ހައުސް ދެން ތަރައްގީކުރާނީ އައްޑޫ އިންޓަރނޭޝަނަލް އެއަރޕޯޓުން ކަމަށް ވިދާޅުވެފައެވެ.
މިނިސްޓަރ ވިދާޅުުވެފައިވަނީ، އެމްޕީއެލްއިން ދައްކަންޖެހޭ ލޯނެއް އޮތުމާއެކު މިއަހަރު ސަރުކާރުގެ ބަޖެޓުގެ ތެރެއިން ކޮންމެވެސް މިންވަރެއް ދީގެން އެކަން ހަމަޖެއްސުމަށް މަސައްކަތް ކުރައްވަމުން އަންނަ ކަމަށެވެ.
ކުރީގެ ރައީސް މައުމޫންގެ ވެރިކަމުގައި ސަރުކާރުގެ ގެސްޓް ހައުސްއެއްގެ ގޮތުގައި ހިންގި ދޫގަސް، ކުރީގެ ރައީސް ނަޝީދުގެ ވެރިކަމުގައި، 2009ގައި އޮތީ އެމްވީކޭއާ ހަވާލު ކޮށްފައެވެ. އެއީ ދެކުނު ދަތުރުފަތުރުގެ ޚިދުމަތްދޭން ހަވާލުކުރުމާއެކު، ސަބްސިޑީއެއްގެ ގޮތުގައި 50 އަހަރަށެވެ.
އެމްވީކޭއާ ދޫގަސް ހަވާލު ކުރުމުން އެ ކުންފުނިން ވަނީ އެތަނުގެ ނަން "ގޭން ރިޓްރީޓް އައިލެންޑް"އަށް ބަދަލުކޮށް، ތަނުގެ ޑިޒައިނަށް ވެސް ބައެއް ބަދަލުތައް ގެނެސްފައި ވެއެވެ. އަދި ފަހުން އެމްވީކޭއިން 2014ގައި އެތަން ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރުގެ ޖޭ ހޮޓެލްސްއަށް ވެސް ދިނެވެ. ކުޑަ ދުވަސްކޮޅަކަށް އެ ކުންފުނިން އެތަން ހިންގީ "ޖޭ ޕެލަސް"ގެ ނަމުގައެވެ.
ނަމަވެސް އެމްވީކޭއާ ހަވާލުކޮށްގެން ދޫގަސް ހިންގޭ ގޮތް ނުވުމުން ރައީސް ޔާމީންގެ ސަރުކާރުން އެމްވީކޭ އަތުން ދޫގަސް ނެގީ 2015ގައެވެ. 120 ކޮޓަރީގެ ގެސްޓްް ހައުސްއެއްގެގޮތަށް އަލުން އެތަން ތަރައްގީކުރުމަށް ރަސްމީކޮށް އެމްޕީއެލްއާ ހަވާލުކުރީ 2018 ޖޫން 14ގައެވެ.
