ޗައިނާގެ އީސްޓާރން އެއާރލައިންގެ ދެވަނަ ކަޅުފޮށި ފެނިއްޖެ

މިމަހުގެ 21 ވަނަ ދުވަހު ޗައިނާގެ އީސްޓާރން އެއާރލައިން ވެއްޓި ހިނގި ހާދިސާގައި ހޯދަމުންދިޔަ ދެވަނަ ކަޅުފޮށި ފެނިއްޖެއެވެ.

ޗައިނާގެ ސިވިލް އޭވިއޭޝަނާއި ހަވާލާދީ ރޮއިޓާރސްގައި ރިޕޯޓުކޮށްފައިވާ ގޮތުން އެފްލައިޓް ދަތުރުކުރަމުން ދިޔައީ ޗައިނާގެ ކުންމިން ސިޓީން ގުއަންޒޯ ސިޓީއަށެވެ. ފްލައިޓް ވެއްޓުނީ، ޗައިނާގެ ހުޅަނގު ދެކުނުގެ ސަރަހައްދުގެ ފަރުބަދަތަކުގެ ތެރެއަށެވެ. ސިވިލް އޭވިއޭޝަނުން ބުނެފައިވަނީ، ފްލައިޓާއި ގުޅުން ކެނޑުނީ ވޫޒޯ ސިޓީއާއި ހިސާބުން ކަމަށެވެ. ފްލައިޓް ވެއްޓުނު އިރު އޭގައި ތިބީ 123 ޕަސިންޖަރުންނާއި، 9 ކްރޫއިން ކަމުގައި ޗައިނާގެ ސިވިލް އޭވިއޭޝަނުން ވަނީ ބުނެފައެވެ.

މި ހާދިސާގައި މަރުވި މީހުންގެ ހަށިތަކާއި، ފްލައިޓުގެ ބައެއް ބައިތައް ހޯދުމުގެ މަސައްކަތް ކޮށްފައިވާއިރު، މިދިޔަ ބުދަ ދުވަހު ފްލައިޓުގެ ކަޅުފޮއްޓެއް އަދި ކޮކްޕިކް ވޮއިސް ރެކޯޑަރު ފެނިފައިވާކަމަށް ނޫސްތަކުގައި ރިޕޯޓުކޮށްފައިވެއެވެ. އަދި މި ފްލައިޓުގެ ދެވަނަ ކަޅުފޮށި ފެނުމާއެކު މިހާރު ފްލައިޓުގެ ދެކަޅުފޮށިވެސް ވަނީ ބެއިޖިންގް އަށް ފޮނުވާފައެވެ.

މިފްލައިޓުން ދަތުރުކުރި ޕަސިންޖަރުންނާއި، ކްރޫއިން ހިމެނޭ ގޮތަށް އެއްވެސް މީހަކު ސަލާމަތްވެފައި ނުވާކަމަށް އޮފިޝަލުން ވަނީ ބުނެފައެވެ.