ސާބިޔާގެ ވެރިރަށް ބެލްގްރޭޑް ގައި "43 އިންޓަނޭޝަނަލް ޓޫރިޒަމް ފެއަރ – ސަޔަމް ޓޫރިޒްމާ 2022" ގައި ދިވެހިރާއްޖޭގެ ފަރާތުން ބައިވެރިވެއްޖެއެވެ.

މިއީ ސާބިޔާގައި ބޭއްވޭ އެންމެ ބޮޑު ޓޫރިޒަމް ފެއަރ އެވެ. އަދި މިއީ މީގެ 43 ވަނަ ފެއަރއެވެ.

މި ފެއަރ ގައި ދިވެހިރާއްޖޭގެ ޑެލިގޭޝަންގެ އިސްބޭފުޅެއްގެ ގޮތުގައި ވަޑައިގެންނެވީ ޓޫރިޒަމް މިނިސްޓަރ ޑރ.އަބްދުﷲ މައުސޫމްއެވެ. މީގެ އިތުރުން ރާއްޖޭގެ ޑެލިގޭޝަންގައި އެމް.އައި.ޓީ.ޑީ.ސީގެ މެނޭޖިންގ ޑިރެކްޓަރ މުހައްމަދު ރާއިދު، އެމްޓީޑީސީގެ މެނޭޖިންގ ޑިރެކްޓަރ ތަޒްމީލް އަބްދުއް ސަމަދު، އެމް.އެމް.ޕީ.އާރު.ސީ ގެ ޑެޕިޔުޓީ މެނޭޖިންގ ޑިރެކްޓަރ އައިޝަތު ނީޝާ މުޙައްމަދު ޝާހިދު، ގެ އިތުރުން ޕްރައިވެޓް ސެކްޓަރގެ ބައެއް ބޭފުޅުން ބައިވެރިވެވަޑައިގެންނެވިއެވެ.

މާރޗް 24 ން 27 އަށް ބާއްވާ ސާބިޔާގެ ފެއަރ ގައި ރާއްޖޭ ތަމްޞީލު ކުރައްވަނީ ސްލޮވޭނިޔާގައި ދިރިއުޅެމުންދާ އައިޝަތު ނުޒުހާއެވެ. ނުޒުހާ ދަނީ ސްލޮވޭނިޔާގައި ރާއްޖެ މާކެޓްކޮށް އިޝްތިހާރުކުރުމަށް ގިނަ މަސައްކަތްތައް ކުރަމުންނެވެ. އެގޮތުން ''މޮއި މަލްދިވީ" (މައި މޯލްޑިވްސް) ގެ ނަމުގައި ކުންފުންޏެއް އުފައްދައި، ރާއްޖޭގެ އިޝްތިހާރުކުރުމަށް މަޖައްލާ ވެސް ނެރެމުން ގެންދެއެވެ.

މިމަސައްކަތްތަކާއި ގުޅޭގޮތުން މޮއި މަލްދިވީ ގެ މެނޭޖިން ޑިރެކްޓަރ ނުޒުހާ ވިދާޅުވީ މަގުސަދަކީ އަދި އުއްމީދަކީ، މުޅި ދެކުނު އިރުމަތީ ޔޫރަޕްގައި (ބޯލްކަންސް ސަރަހައްދު) ރާއްޖެ މާކެޓްކޮށް، އެސަރަހައްދުން ރާއްޖެއަށް ޒިޔާރަތްކުރާ ފަތުރުވެރިން އިތުރުކޮށް، އިގްތިސާދީ އެކިއެކި ހަރަކާތްތައް ރާއްޖެ އާއި އެ ސަރަހައްދުގެ ގައުމުތަކާއިއެކު ކުރިއަށް ގެންދިޔުން ކަމަށެވެ.

އެމްއެމްޕީއާރުސީ އާއި އެމް.އައި.ޓީ.ޑީސީގެ އެހީތެރިކަން ލިބިގެން، ބެލްގްރޭޑް ފެއަރ ގައި ގާއިމްކޮށްފައިވާ ރާއްޖޭގެ ސްޓޯލަށް ވަރަށް ބޮޑު ތަރުހީބެއް ލިބެމުންދާކަން ފާހަގަކުރައްވައި ނުޒުހާ ވިދާޅުވީ ސާބިޔާއިން އެންމެ ފަސޭހައިން ރާއްޖެއަށް ދެވޭނެ ގޮތުގެ ސުވާލު ވަރަށް ގިނަ މީހުން ކުރާ ކަމަށެވެ. މި ފެއަރއަށް ޒިޔާރަތްކުރާ މީހުންނަށް ރާއްޖެއަށް ދަތުރުކުރެވޭނެ އެންމެ ފަސޭހަ މަގުތަކާއި އަދި ރިސޯޓްތަކާއި ގެސްޓްހައުސްތަކުގެ ފުރިހަމަ މައުލޫމާތު ފޯރުކޮށްދެމުންދާކަން ނުޒުހާ ފާހަގަކުރެއްވިއެވެ.

ރާއްޖެ މާކެޓްކުރުމަށް ކުރާ ބުރަ މަސައްކަތުގައި، އެމްއެމްޕީއާރުސީ އާއި އެމްއައިޓީޑީސީ ގެ ފަރާތުން ފޯރުކޮށްދެއްވި އެހީތެރިކަން ފާހަގަކޮށްފައިވެއެވެ.

މި ފެއަރ ގައި ބައިވެރިވި އެކިއެކި ގައުމުތަކުގެ މަންދޫބުންނާއެކު، ފެއަރ ގެ ހަވާސާގައި، ތަފާތު ބައްދަލުވުންތައް އަންނަނީ ބާއްވަމުންނެވެ.