ފަތުރުވެރިކަމުގެ ބައިގަރުނުގައި ޤާސިމްގެ ބައެއް ތަޖުރިބާ

ރާއްޖޭގެ ފަތުރުވެރިކަމަށް 50 އަހަރު ފުރުމުގެ މުނާސަބަތުގައި ޖުމްހޫރީ ޕާޓީގެ ލީޑަރު، އަދި ފަތުރުވެރިކަމުގެ ދާއިރާގައި ގިނަ ޚިދުމަތްތަކެއް ކުރައްވާފައިވާ ޤާސިމް އިބްރާހިމް ވަނީ އޭނާގެ ތަޖުރިބާއާ ގުޅޭ ގިނަ ވާހަކަފުޅުތަކެއް ހިއްސާ ކުރައްވާފައެވެ.

ޤައުމީ ފަތުރުވެރިކަމުގެ ދުވަހުގެ މުނާސަބަތުގައި ރާއްޖެޓީވީން ގެނެސްދިން "ރަން 50" ކަވަރޭޖަށް ދެއްވި ޚާއްސަ އިންޓަރވިއުއެއްގައި ޤާސިމް ވަނީ ފޮރިން އެކްސްޗޭންޖުގެ ތެރެއިން ގޮސް، ފަތުރުވެރިކަމުގެ ތެރެއަށް ވަދެވަޑައިގެންނެވި ގޮތް ވިދާޅުވެފައެވެ. އެގޮތުން އެ މަސައްކަތް ފުރަތަމަ ފެއްޓެވިއިރު ބޮޑެތި ގޮންޖެހުންތަކެއް ހުރިކަމަށް ޤާސިމް ވިދާޅުވިއެވެ.

ޤާސިމް ވިދާޅުވީ، ސަން އައިލެންޑް އެންމެ ފުރަތަމަ ހެއްދެވިއިރު، އެ މަރުހަލާގައި ބޭންކުން ލޯނެއް ވެސް ނުލިބުނު ކަމަށެވެ. ނަމަވެސް ފަހުން ކްރެޑިޓް ފެސިލިޓީ ވެސް ހަމަޖެހުނުކަމަށް ޤާސިމް ވިދާޅުވިއެވެ. އޭރު ޤާސިމްގެ އުމުރުފުޅުން ގާތްގަނޑަކަށް 36 އަހަރުކަމަށް އޭނާ ވިދާޅުވިއެވެ.

އޭގެ އިތުރުން، ފަތުރުވެރިކަން މާކެޓު ކުރުމުގައި ވެސް ފުރަތަމަ މަރުހަލާގައި ގޮންޖެހުންތަކެއް ހުރިކަމަށް ޤާސިމް ވިދާޅުވިއެވެ. ނަމަވެސް ފަހުން ރާއްޖެއަށް ވެސް ލިބިގެންދިޔަ މަޝްހޫރުކަމާއެކު، އެ މަސައްކަތުގައި ވެސް ލުއިތައް ލިބިގެން ދިޔަކަމަށް އޭނާ ވިދާޅުވިއެވެ.

ޤާސިމް ވިދާޅުވީ އޭރުވެސް ފަތުރުވެރިންގެ މެދުގައި ރާއްޖެ ނުހަނު މަޤުބޫލު ކަމަށެވެ. އެގޮތުން ކޮންމެ ގޮތެއް ހަދާފައިނަމަވެސް ރާއްޖޭގެ ހިތްފަސޭހަ ތަޖުރިބާ ކޮށްލުމަށް ފަތުރުވެރިން ކެތްމަދުވެފައިވާ މިންވަރަށް ޤާސިމްގެ ވާހަކަފުޅުގައި އަލިއަޅުވާލެއްވިއެވެ.

އޭގެ އިތުރުން، ރިސޯޓުތައް ތަރައްޤީ ކުރެއްވިއިރު ވެސް ކޮންމެ މަސައްކަތެއްގައި ވެސް އަމަލީ ގޮތުން ޙަރަކާތްތެރިވެ، ގާތުން އެ ކަންކަން ބައްލަވާފައިވާނެ ކަމަށް ޤާސިމް ވިދާޅުވިއެވެ. ޤާސިމް ވަނީ އެ މަސައްކަތުގައި އެކި ގޮތްގޮތުން އެހީތެރިކަން ދެއްވި ފަރާތްތައް ފާހަގަ ކުރައްވާފައެވެ. ޤާސިމް ވިދާޅުވީ، އޭރުވެސް އޭނާއަށް އެނގިވަޑައިނުގެން ރިސޯޓުތަކުގެ އެއްވެސް މަސައްކަތެއް ހިނގާފައިނުވާނެ ކަމަށެވެ.

"ވިލާ" ކުންފުނި އުފެދުނު ގޮތަށް އަލިއަޅުވާލައްވާ ޤާސިމް ވިދާޅުވީ، އެ ނަން ކިޔުއްވީ އޭނާގެ ގެ ކަމަށްވާ "މާފަންނު ވިލާ" އާވެސް ގުޅުވާލައިގެން ކަމަށެވެ. ނަމަވެސް އޭނާ އެ ނަން ނިސްބަތް ކުރެއްވީ އުޑުމަތީގައި ހުންނަ ވިލާތަކަށްކަމަށް ޤާސިމް ވިދާޅުވިއެވެ.

ޤާސިމް ވިދާޅުވީ، ދުނިޔެއަށް އަންނަ އެކިކަހަލަ ބަލިމަޑުކަމާއި، ހަލަބޮލިކަމާއެކު ފަތުރުވެރިކަމަށް އޭގެ އެކި ކަހަލަ ގޮންޖެހުންތައް ކުރިމަތިވެފައިވާ ކަމަށެވެ. އޭގެ އެއް މިސާލަކީ ކޮވިޑް-19 ގެ ހާލަތުކަން ޤާސިމް ފާހަގަ ކުރެއްވިއެވެ.