މިއަހަރު ޤަތަރުގައި އޮންނަ ވޯލްޑްކަޕުންވެސް އިޓަލީއަށް ފުރުޞަތު ގެއްލި, ޕޯޗްގަލް ފަހު ފިޔަވަޅާއި ހަމައަށް ދަތުރުކޮށްފިއެވެ. އިޓަލީއަށް ފުރުޞަތު ބަންދުވީ ފީފާ ވޯލްޑްކަޕް ކޮލިފައިންގ ޕްލޭއޮފް ސެމީގައި ނޯތު މެސެޑޯނިޔާ އަތުން ބަލިވެގެންނެވެ.

ޔޫރަޕްގެ ޗެމްޕިއަން އިޓަލީން މެޗުގައި ގިނަ ވަގުތު ބޯޅަ ގެންގުޅެ, ފުރުޞަތު ހޯދިޔަސް ނަތީޖާ ނެރުނީ މުޅި މެޗުގައި ދެ ފުރުޞަތު ލިބުނު ނޯތު މެސެޑޯނިޔާއިންނެވެ. އެޓީމުން މެޗު ކާމިޔާބުކުރީ 1-0 ނެވެ. މެޗުގެ ހަމައެކަނި ލަނޑު އަދި އިޓަލީ ސަޕޯޓަރުން ރޮއްވާލި ލަނޑު ޖެހީ މެޗުގެ ފުރިހަމަ ވަގުތު ހަމަވެ ދެއްކި އިތުރު ވަގުތުގެ ތެރޭގައެވެ. ލަނޑު ޖެހީ އެލެކްސަންޑާ ޓްރަޖޯވްސްކީއެވެ. މިނަތީޖާއާއެކު ވިދިވިދިގެން ދެ ވޯލްޑްކަޕުން އިޓަލީއަށް ފުރުޞަތު ގެއްލުނީއެވެ. ކުރިއަށް އޮތް ވޯލްޑްކަޕުން އިޓަލީއަށް ފުރުޞަތު ގެއްލިފައި މިވަނީ މަންޗީނީއާއެކު ޓީމް އަލުން ބައްޓަންކޮށް, ނަތީޖާތައް ރަނގަޅުކުރުމުގެ އިތުރުން ޔޫރަޕްގެ ޗެމްޕިއަންކަންވެސް ހޯދާފައިވަނިކޮށެވެ.

އިޓަލީ ކެޓިނަމަވެސް ރޮނަލްޑޯއަށް އަދި ވޯލްޑްކަޕް ކުޅުމުގެ އުއްމީދު ބޮޑެވެ. ޕޯޗްގަލް ވަނީ 3-1 ން ތުރުކީ ބަލިކޮށްފައެވެ. ވޯލްޑްކަޕްއަށް ކޮލިފައިވާން ޕޯޗްގަލްއަށް ދެން އޮތީ އެންމެ ހަރުފަތެކެވެ. އެއީ ރޭ އިޓަލީ ބަލިކުރި ނޯތު މެސެޑޯނިޔާ އަތުން މޮޅުވުމެވެ. ތުރުކީ އަތުން ޕޯޗްގަލް މޮޅުވީ އަނިޔާއާއި ސަސްޕެންޝަންގެ ސަބަބުން ޓީމްގެ މުހިއްމު ކުޅުންތެރިންތަކެއް ނުލައި ކުޅެއެވެ. މެޗުގައި ޕޯޗްގަލްގެ ފުރަތަމަ ލަނޑު ޖެހީ އޮޓާވިއޯއެވެ. ދެވަނަ ލަނޑު ޖެހީ ލިވަޕޫލަށް ކުޅެމުން އަންނަ ޖޮޓާއެވެ. ތިންވަނަ ލަނޑު ޖެހީ މަތިއު ނޫނިއޭޒްއެވެ. ތުރުކީގެ ލަނޑު ޖެހީ ޔިލްމާޒްއެވެ. ތުރުކީއަށް ލިބުނު ޕެނަލްޓީއެއް ޔިލްމާޒް އަތުން ބޭކާރުވެސް ވިއެވެ.

ވޯލްޑްކަޕް ޖާގަ ޔަޤީންކުރަން ނޯތް މެސެޑޯނިޔާއާއި ދެކޮޅަށް ޕޯޗްގަލް ނިކުންނަން ޖެހޭނީ އަންނަ އަންގާރަ ދުވަހުގެ ރޭއެވެ.