ޤަތަރާ ގުޅުން ކަނޑާލިޔަސް އުރީދޫގެ ޚިދުމަތް ނުހުއްޓޭނެ: ހޯމް މިނިސްޓްރީ
އުރީދޫގެ މައި ކުންފުންޏަކީ ޤަތަރު ސަރުކާރު ހިއްސާވާ ކުންފުންޏެއް
އުރީދޫ އާއި އެކު ހޯމް މިނިސްޓްރީން ކުރިއަށް ގެންދިޔަ ބައްދަލުވުން
ޤަތަރާއި ސިޔާސީ ގުޅުން ކަނޑާލި ނަމަވެސް، ޤަތަރުގެ އޫރިދޫ ކުންފުނީގެ ޚިދުމަތް ރާއްޖޭގައި ނުހުއްޓޭނެ ކަމަށް ސަރުކާރުން ބުނެފިއެވެ.
މައުލޫމާތު ލިބިފައިވާ ގޮތުގައި އަންގާރަ ދުވަހު ހޯމް މިނިސްޓަރ އަޙުމަދު އަޒްލީން ވަނީ އުރީދޫގެ ސީއީއޯ ނަޖީބް ޚާން އާއި ބައްދަލުކުރައްވާފައެވެ. އަދި މި ބައްދަލުވުމުގައި ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) ގެ ޗީފް އެގްޒެކްޓިވް އިލްޔާސް ހުސައިންވެސް ވަނީ ބައިވެރިވެ ވަޑައިގެންފައެވެ.
ހޯމް މިނިސްޓްރީގް އޮފިޝަލަކު ވިދާޅުވި ގޮތުގައި މި ބައްދަލުވުމުގައި އުރީދޫއިން ވަނީ، އެ ކުންފުންޏާއި ރާއްޖެއާއި ދެމެދު އޮތް ވިޔަފާރީގެ ގުޅުމަށް ބަދަލެއް ނައިސް، އެ ގުޅުން އޮންނާނެ ކަމުގެ ޔަޤީންކަން ދީފައެވެ.
މި ބައްދަލުވުމާއި ގުޅޭ މައުލޫމާތެއް ހޯމް މިނިސްޓްރީންވެސް، އަދި އުރީދޫއިންވެސް މިހާތަނަށް ރަސްމީ ސިފައެއްގައި ހާމަކޮށްފައެއް ނުވެއެވެ.
އުރީދޫއަކީ ނިމިގެންދިޔަ 2016 ވަނަ އަހަރުގެ އޮކްޓޯބަރ 13 ވަނަ ދުވަހުން ފެށިގެން، ރާއްޖޭގައި ޕަބްލިކް ލިމިޓެޑް ކުންފުންޏެއްގެ ގޮތުގައި ރަޖިސްޓްރީކޮށް، ރާއްޖޭގެ ހިއްސާގެ ބާޒާރުގައިވެސް ހަރަކާތްތެރިވަމުން އަންނަ ކުންފުންޏެކެވެ.
ވަތަނިޔާ މޯލްޑިވްސްގެ ނަމުގައި 2005 ވަނަ އަހަރު ޜާއްޖޭގައި ޚިދުމަތް ދޭން ފަށައި، 2014 ވަނަ އަހަރު އުރީދޫ މޯލްޑިވްސްއަށް ރީބްރޭންޑް ކުރި އެ ކުންފުނިން މިހާތަނަށް ވަނީ ރާއްޖެއަށް ޒަމާނީ އެކި ޚިދުމަތްތައް ހެޔޮ އަގުގައި ތަޢާރުފުކޮށްފައެވެ.
