އަންނަ ހަފްތާގައި ސައުދީ އަރަބިއްޔާއިން ކަދުރު ލިބޭނެ ކަމަށް ލަފާ ކުރެވޭ: އިސްލާމިކް މިނިސްޓަރު
24 މާރިޗު 2022 | ބުރާސްފަތި 06:32އުންމީދު ކުރަނީ 50 ޓަނުގެ ކަދުރު ލިބޭނެ ކަމަށް
އިސްލާމިކް މިނިސްޓަރު، ޑރ. އަހުމަދު ޒާހިރު އަލީ
އަންނަ ހަފްތާގައި ސައުދީ އަރަބިއްޔާއިން ކަދުރު ލިބޭނެކަމަށް ލަފާކުރެއްވޭ ކަމުގައި އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން އިސްލާމިކް މިނިސްޓަރު ވިދާޅުވީ ލިބޭނެ ކަމަށް އުންމީދު ކުރައްވަނީ 50 ޓަނުގެ ކަދުރު ކަމަށެވެ. އަދި މިހާތަނަށް ރާއްޖެއަށް ކަދުރު ލިބިފައިނުވާއިރު ކަދުރު ލިބުމާއެކު ސައުދީން ކަނޑައަޅާފައިވާ މިންގަޑަށް ބަލައިގެން ކަދުރު ބަހާނީ ފަޤީރުންނަށް އިސްކަންދެއްވައިގެން ކަމަށް ވިދާޅުވިއެވެ.
ހުރިހާ ގެތަކަށް ކަދުރު ނުބެހުނު ނަމަވެސް، ކަދުރު ބަހާނީ އެންމެ ބޭނުން ޖެހިފައިވާ ގޭބީސީތައް ކަނޑައެޅުމަށްފަހު، ހިސާބުކޮށް، އެގޭބީސީތަކަށް އިސްކަންދެއްވައިގެން ކަމުގައި މިނިސްޓަރު ވިދާޅުވިއެވެ.
މިދިޔަ އަހަރު ސަޢުދީ އަރަބިއްޔާއިން ވަނީ ރާއްޖެއަށް 25 ޓަނުގެ ކަދުރު ހަދިޔާކޮށްފައެވެ.
އިސްލާމިކް މިނިސްޓަރު މިހެން ވިދާޅުވެފައިވާއިރު މިނިސްޓްރީ އޮފް އިސްލާމިކް އެފެއާޒް އިން އެކުލަވާލާފައިވާ ފަގީރުންނާއި މިސްކީނުންގެ ދަފުތަރުގައި ހިމެނޭ އާއިލާތަކުގެ ފުދުންތެރިކަން އިތުރުކުރުމަށްޓަކައި، އެދަފުތަރަށް އަމާޒުކޮށް، އިސްލާމިކް މިނިސްޓްރީ އާއި މިނިސްޓްރީ އޮފް އިކޮނޮމިކް ޑިވެލޮޕްމަންޓާއި ގުޅިގެން 'ޒަކާތު ނަފާ' ގެ ނަމުގައި މާލީ އެހީތެރިކަން ފޯރުކޮށްދިނުމުގެ މަޤްޞަދުގައި ޕްރޮގްރާމެއް ފެށުމަށްވެސް ވަނީ ނިންމާފައެވެ.
ފަސް އަހަރަށް ރާވާފައިވާ މިޕްރޮގްރާމް ކުރިޔަށް ގެންދިޔުމަށް ހަމަޖެހިފައިވަނީ ކަނޑައެޅޭ ވަކި އުޞޫލެއްގެ ތެރެއިން އަދި ކަނޑައެޅޭ ވަކި ޢަދަދެއްގެ ބަޔަކަށް ޒަކާތު ފަންޑުން ހަރަދުކޮށް، ޒަކާތުގެ ފައިދާ އޭގެ އެންމެ ޙައްޤުވެރި ފަރާތްތަކަށް ފޯރުކޮށްދިނުމަށާއި، އެ ފަރާތްތަކަށް އާމްދަނީ ހޯދޭނެ މަގެއް ފަހިކޮށްދިނުމަށާއި އަދި ފުދުންތެރި މުޖުތަމަޢުއެއް ބިނާ ކުރުމަށް ކަމަށް މިނިސްޓްރީން ވަނީ ބުނެފައެވެ.
