ރާއްޖެ އާއި ދެކޮޅަށް ނުކުންނަ މެޗުގައި އުންމީދަކީ ކުރިއަށްވުރެ ރަނގަޅު ކުޅުމެއްދައްކައި، ކުރިއަށްވުރެ ރަނގަޅަށް މޮޅުވުންކަމަށް ބަންގްލަދޭޝް ޓީމުގެ ކޯޗު ހަވިއޭ ކަބްރޭރާ ބުނެފިއެވެ.

މާދަމާރޭ ގަލޮޅު ދަނޑުގައި ކުޅޭ މި މެޗުގެ ކުރިން ބޭއްވި ޕްރީމެޗް ޕްރެސްގައި ވާހަކަދައްކަމުން ކަބްރޭރާ ބުނީ ފޯނޭޝަންސް ކަޕްގައި ރާއްޖެއަތުން ލިބުނު މޮޅަކީ ވަރަށް މުހިންމު މޮޅެއް ކަމަށެވެ. ފޯނޭޝަންސް ކަޕްގައި ބަންގްލަދޭޝް އަތުން ރާއްޖެ ބަލިވީ 2-1 ގެ ނަތީޖާ އަކުންނެވެ. އެއީ ފާއިތުވި 18 އަހަރުގެ ތެރޭގައި ބަންގްލަދޭޝް އަތުން ރާއްޖެ ބަލިވި ފުރަތަމަ ފަހަރެވެ.

ކަބްރޭރާ ބުނީ ފޯނޭޝަންސް ކަޕްގައި ރާއްޖެ އަތުން މޮޅުވުމަކީ މިރޭގެ މެޗަށް ނުކުންނައިރު ކުޅުންތެރިންނަށް ލިބޭނެ އިތުރު ހިތްވަރަކަށް ވާނެ ކަމަށެވެ.

މީގެ އިތުރުން ކޯޗުބުނީ ކުރިން ބަންގްލަދޭޝް ކުޅުނު ކުޅުމާއި މިހާރުގެ ކުޅުން ވަރަށް ތަފާތުވާނެ ކަމަށެވެ. އަދި ބޭނުމަކިީ މާދަމާ ރޭގެ މެޗަށް ނުކުންނައިރު އޭނާގެ ކުޅުމަށް އެޓީމު ހޭނިފައިވާ މިންވަރު ބަލާލުން ކަމަށް ކަބްރޭރާ ބުނެފައިވެއެވެ. މިއީ ކަބްރޭރާ ބަންގްލަދޭޝްގެ ޓީމާއި ހަވާލުވިފަހުން އެޓީމު ކުޅޭނެ ފުރަތަމަ މެޗެވެ. ކަބްރޭރާ ވަނީ އޭނާގެ ކުރިން ބަންގްލަދޭޝްގެ ޓީމަށް ކޯޗުކަން ކޮށްދިން ދެކޯޗުންނަށްވެސް ޝުކުރު އަދާކޮށްފައެވެ.

ރާއްޖޭގެ ކުޅުންތެރިން ގެ ކުޅުން ވަރަށް ރަނގަޅަށް ދަސްކޮށްފައި ވާނެކަން ފާހަގަކޮށް ކަބްރޭރާ ބުނީ ވަކިން ޚާއްސަކޮށް ފާރަވެރިވާންޖެހޭ ކުޅުންތެރިންތަކެއް އެބަތިބި ކަމަށެވެ. އަދި ރާއްޖޭގެ ޓީމްއަކީ ސްޕީޑް ބާރު، ޓެކްނިކަލީ މޮޅު ކުޅުންތެރިންތަކެއް ތިބި ޓީމެއް ކަމަށެވެ. އެހެންކަމުން ވީޑިއޯތައް ބަލައިގެން އެކަމަށް ވަރަށް ބޮޑަށް ތައްޔާރުވެފައި ވާނެކަމަށެވެ.

ފަހަކަށް އައިސް ބަންގްލަދޭޝްގެ ޓީމަށް އެންމެ ބޮޑަށް ދިމާވެފައިވަނީ ލަނޑު ޖެހުމުގެ މައްސަލައެވެ. މާދަމާރޭގެ މެޗުގައި މި މައްސަލަ ހައްލުވާނެކަން ފާހަގަކޮށް ކަބްރޭރާ ބުނީ ފަރިތަކުރުންތަކުގައި އޭނާގެ ފޯވާޑުންގެ ފަރާތުން ހިތްހަމަޖެހޭވަރުގެ ކުޅުމެއް ފެނިފައިވާ ކަމަށެވެ.