ރައީސް ޑުޓާޓޭގެ ޕާޓީއިން މާކޯސް ޖޫނިއަރ އެންޑޯޒްކޮށްފި

ފިލިޕީންސްގެ ރިޔާސީ އިންތިޚާބަށް ކުރިމަތިލާފައިވާ ކެންޑިޑޭޓުންގެ ތެރެއިން އެންމެ ކުރީގައި އުޅުއްވާ ފަރޑިނަންޑް މާކޯސް ޖޫނިއަރ، މިހާރުގެ ރައީސް ރޮޑްރިގޯ ޑުޓާޓޭގެ ޕާޓީއިން އެންޑޯޒްކޮށްފިއެވެ. ރައީސް ޑުޓާޓޭގެ ޕާޓީ ޕީޑީޕީ ލަބާން ޕާޓީއިން މިފަހަރުގެ އިންތިޚާބަށް ރިޔާސީ ކެންޑިޑޭޓެއް ނެރެފައި ނުވާއިރު، އަންގާރަ ދުވަހު ވެރިރަށް މެނީލާގައި ބޭއްވި ނޫސްކޮންފަރެންސެއްގައި އެޕާޓީއިން ބުނެފައިވަނީ އެޕާޓީއިން ސަޕޯޓް ކުރާނީ ކުރީގެ ރައީސް ފަރޑިނަންޑް މާކޯސްގެ ދަރިކަލުން ބޮބްގބޮންގ މާކޯސްއަށް ކަމުގައެވެ.

މާކޯސް ޖޫނިއަރގެ ރަނިންގމޭޓެއްގެ ގޮތުން ކުރިމަތިލައްވާފައިވަނީ މިހާރުގެ ރައީސް ޑުޓާޓޭގެ ދަރިކަނބަލުން ސާރާ ޑޫޓާޓޭ އެވެ. ސާރާ މިހާތަނަށް ހުންނެވީ ދަވާއޯ ސިޓީގެ މޭޔަރުގެ މަގާމްގައެވެ.

ޚިޔާލް ހޯދުމުގެ ޕޯލްތަކުން ދައްކާ ގޮތުން ރިޔާސީ ރޭހުގައި ބޮންގ ބޮންގ މާކޯސް އުޅުއްވަނީ އެހެން ކެންޑިޑޭޓުންނަށް ވުރެ ކުރީގައެވެ. އަދި ރަނިންގ މޭޓަށް ކުރިމަތިލެއްވި ސާރާގެ މަގްބޫލްކަންވެސް ފިލިޕީންސްގެ ރައްޔިތުންގެ މެދުގައި ވަރަށް ބޮޑެވެ.

ފިލިޕީންސްގެ ރިޔާސީ އިންތިޚާބު އޮންނާނީ މޭ މަހުގެ ނުވަނަ ދުވަހުއެވެ.