132 މީހުންނާއެކު ދަތުރު ކުރަމުން ދިޔަ ޗައިނާ އީސްޓާރން އެއަރލައިންގެ ފްލައިޓެއް ވެއްޓިއްޖެއެވެ.

މި ހާދިސަގައި މީހުންނަށް ލިބުނު ގެއްލުން އަދި ހާމައެއް ނުކުރެއެވެ.

ޗައިނާގެ ސިވިލް އޭވިއޭޝަނާއި ހަވާލާދީ ރޮއިޓާރސްގައި ރިޕޯޓުކޮށްފައިވާ ގޮތުން އެފްލައިޓް ދަތުރުކުރަމުން ދިޔައީ ޗައިނާގެ ކުންމިން ސިޓީން ގުއަންޒޯ ސިޓީއަށެވެ. ފްލައިޓް ވެއްޓުނީ، ޗައިނާގެ ހުޅަނގު ދެކުނުގެ ސަރަހައްދުގެ ފަރުބަދަތަކުގެ ތެރެއަށެވެ. ސިވިލް އޭވިއޭޝަނުން ބުނެފައިވަނީ، ފްލައިޓާއި ގުޅުން ކެނޑުނީ ވޫޒޯ ސިޓީއާއި ހިސާބުން ކަމަށެވެ. ފްލައިޓް ވެއްޓުނު އިރު އޭގައި ތިބީ 123 ޕަސިންޖަރުންނާއި، 9 ކްރޫއިން ކަމުގައި ޗައިނާގެ ސިވިލް އޭވިއޭޝަނުން ބުނެއެވެ.

ޗައިނާގެ ދައުލަތުގެ ބްރޯޑްކާސްޓަރ، ސީސީޓީވީ އިން ކުރިން ރިޕޯޓު ކޮށްފައިވަނީ އެ ފްލައިޓުން 133 ޕަސިންޖަރުން ދަތުރުކުރި ކަމަށެވެ. ވެއްޓިފައިވަނީ ބޮއިން 737 މަރުކާގެ ފްލައިޓެކެވެ. ފްލައިޓް ވެއްޓުމާއެކު އިމަރޖެންސީ ޓީމުވަނީ އެ ސަރަހައްދަށް ފޮނުވާފައެވެ.

ޗައިނާގެ ބައެއް މީޑިއާތަކުން ރިޕޯޓުކޮށްފައިވާ ގޮތުގައި، ފްލައިޓް ފުރާފައިވަނީ ހޯމަ ދުވަހުގެ މެންދުރު، ގަޑިން 1:11 ހާއިރުއެވެ.

މި ފްލައިޓް ވެއްޓުމުގެ ހާދިސާ އާއި ގުޅިގެން، އެއަރލައިނުންވެސް އެއްވެސް މައުލޫމާތެއް ހަމަކޮށްފައެއް ނުވެއެވެ.