ޗެލްސީ އެފްއޭކަޕް ސެމީއަށް

އުނދަގޫ ހާލަތެއްގައި އޮތް ޗެލްސީން އިނގިރޭސި އެފްއޭކަޕްގެ ސެމީފައިނަލުން ޖާގަ ހޯދައިފިއެވެ. ރަޝިޔާއާއި ޔުކްރެއިން ހަނގުރާމައިގެ ސަބަބުން ޗެލްސީގެ ވެރިޔާ އަބޮރޮހޮމްވިޗަށް ފިއްތުންތައް ކުރިމަތިވުމުން އުނދަގޫ ހާލަތަށް ވެއްޓިފައިވާ ޗެލްސީން ސެމީފައިނަލަށް ދަތުރުކުރީ ކްއާޓަރ ފައިނަލްގައި މިޑްލްސްބަރާ އަތުން މޮޅުވެގެންނެވެ.

ޗެމްޕިއަންޝިޕްގެ މިޑްލްސްބަރާގެ މައްވަށް ޗެލްސީން ކުރި ހޯދީ 2-0 ނެވެ. މެޗުގެ 15 ވަނަ މިނިޓްގައި ޗެލްސީއަށް ކުރި ހޯދައިދިނީ ލުކަކޫއެވެ. މިއީ ސީޒަންގައި ލުކަކޫގެ 12 ވަނަ ލަނޑެވެ. ދެވަނަ ލަނޑު ހަކީމް ޒިޔެޗް ޖެހީ އޭގެ 15 މިނިޓް ފަހުންނެވެ. މިޑްލްސްބަރާއަކީ މިމުބާރާތުގައި މެންޗެސްޓަރ ޔުނައިޓެޑާއި, ޓޮޓެންހަމް ކަޓުވާލި ޓީމެވެ.

ސެމީފައިނަލްގައި ޗެލްސީ ވާދަކުރަން ޖެހޭނީ މިރޭ ކުޅޭ ކްއާޓަރ ފައިނަލް މެޗުތަކަށްފަހުއެވެ. ކްއާޓަރ ފައިނަލްގައި ކްރިސްޓަލް ޕެލަސް ވާދަކުރަނީ އެވަޓަންއާއެވެ. މެންޗެސްޓަރ ސިޓީ ވާދަކުރާނީ ސައުތްހެމްޓަންއާއެވެ. ލިވަޕޫލް ވާދަކުރާނީ ނޮޓިންގހަމް ފޮރެސްޓާއެވެ.