ހއ. ދިއްދޫގައި ސަރުކާރުން ގާއިމްކުރާ ޖޫނިއަރ ކޮލެޖް އިމާރާތް ކުރުމަށް 6 ފަރާތަކުން ބީލަން ހުށަހަޅައިފިއެވެ.

ހަޔަރ އެޑިއުކޭޝަން މިނިސްޓްރީން ބުނީ, މި މަޝްރޫއަކީ މިނިސްޓްރީ އޮފް ހަޔަރ އެޑިޔުކޭޝަނުގެ އިސްނެގުމަށް، ރާއްޖޭގެ އެކި ސަރަހައްދުތަކަށް އަމާޒުކޮށް, މަތީތައަލީމާއި ތަމްރީނުދޭ މަރުކަޒުތައް ބިނާކޮށް ހިންގުމަށް މި ސަރުކާރުގެ ސްޓްރެޓީޖިކް އެކްޝަން ޕްލޭންގައި ހިމަނައިގެން ކުރިޔަށް ގެންދާ ޕްރޮޖެކްޓްތަކުގެ ތެރެއިން ހއ. ދިއްދޫގައި ހިންގާ ޕްރޮޖެކްޓެކް ކަމަށެވެ. މި ޕްރޮޖެކްޓްގެ ކޮންސްޓަރަކްޝަން މަސައްކަތަށް ހުޅުވާލި ޓެންޑަރގެ ބީލަން ހުޅުވުން ބުރާސްފަތި ދުވަހު މިނިސްޓްރީ އޮފް ފިނޭންސްގައި އޮތްއިރު, 6 ފަރާތަކުން ބީލަން ހުށަހަޅާފައިވާ ކަމަށެވެ.

މި ޕްރޮޖެކްޓުގެ ދަށުން، ޖޫނިއަރ ކޮލެޖް އިމާރާތްކުރާނެ ފަރާތެއް ހޯދުމަށް ފުރަތަމަ ފަހަރަށް ޓެންޑަރ ކޮށްފައިވާ މަޝްރޫއުގެ ބީލަމާ ގުޅިގެން ދޫކޮށްފައިވާ އެޑެންޑަމާއެކު އިޝޫކޮށްފައިވާ ބީ.އޯ.ކިއުއާއި, ކުރެހުމުގައި އޮޅުންއަރާ ކަންތައްތަކެއް ހުރިކަން ފާހަގަކުރައްވައި، ކުރިން ހުށަހަޅައިފައިވާ ބިޑުތައް ބާތިލްކޮށް، އަލުން އިއުލާނުކުރުމަށް ނޭޝަނަލް ޓެންޑަރ ބޯޑުން ނިންމަވާފައިވާތީ، މި މަސައްކަތް ރީ-ޓެންޑަރކޮށްފައިވަނީ 06 މާރޗް 2022ގައެވެ.

ހއ. ދިއްދޫގައި ބިނާކުރާ ޖޫނިއަރ ކޮލެޖް ޚާއްސަ ކޮށްފައިވަނީ ފުޑް ޕްރޮސެސިންގ އަދި ޓެކްނޮލޮޖީ ދާއިރާގެ އެކި ލެވެލްތަކުގެ ކޯސްތައް ހިންގުމަށެވެ. އެހެނަސް ތަފާތު އެހެނިހެން ދާއިރާތަކުން ވޮކޭޝަނަލް ކޯސްތައް ވެސް މި އިންސްޓިޓިއުޓުގައި ހިންގުމަށް މަގުފަހިވާނެއެވެ.

މި ޖޫނިއަރ ކޮލެޖް ޢިމާރާތް ކުރުމަށް ހަމަޖެހިފައިވަނީ 30،000 އަކަފޫޓްގެ ޖާގައިގައެވެ. މި ޕްރޮޖެކްޓް އެއްކޮށް ނިމޭއިރު އިންސްޓިޓިއުޓްގައި ކިޔަވައިދިނުމަށް ބޭނުންކުރާނެ ބްލޮކެއްގެ އިތުރުން އެކޮމަޑޭޝަން ބްލޮކެއް ހުންނާނެއެވެ. މި ޖޫނިއަރ ކޮލެޖުގައި ފުޑް ޕްރޮސެސިންގ ލެބަކާއި، ފުޑް ޓެސްޓިންގ ލެބަކާއި، މަލްޓި-ޕަރޕަސް ވޯކްޝޮޕެއްގެ އިތުރުން 8 ކްލާސްރޫމާއި އައި.ސީ.ޓީ ލެބޯޓަރީއެއް ހުންނާނެއެވެ. އަދި އިދާރީ ޚިދުމަތްތަކަށް ޚާއްސަ އޭރިއާއަކާއި ސްޓާފް ރޫމަކާއި ދަރިވަރުންގެ ޚިދުމަތްތަކަށް ޚާއްސަ އޭރިއާގެ އިތުރުން އޮޑިޓޯރިއަމަކާއި މީޓިންގ ރޫމްތަކާއި ސްޓަޑީ ރޫމްތަކާއި ލައިބްރަރީ ވެސް ހުންނާނެއެވެ. މީގެ އިތުރުން ވެސް، މި އިމާރާތުގައި ދަރިވަރުންގެ ސިއްހީ ދުޅަހެޔޮކަމަށް އެކި ކަހަލަ ކުޅިވަރުކުޅެވޭނެ އެކްޓިވިޓީ ސެންޓަރަކާއެކު ޖިމެއް ހުރުމާއެކު ނަމާދުކުރާނެ ތަނަކާއި ފާޚާނާއާއި ލިފްޓްވެސް ހުންނާނެއެވެ.

ދިއްދޫގައި ޖޫނިއަރ ކޮލެޖެއް ގާއިމުކުރުމަކީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ރިޔާސީ ވައުދުފުޅެކެވެ.

ޖޫނިއަރ ކޮލެޖުގެ މަސައްކަތް ލަސްވާ މައްސަލާގައި ހަޔަރ އެޑިއުކޭޝަން މިނިސްޓަރ މަޖިލީހަށް ހާޒިރުކޮށް މެންބަރުން ކުރެއްވި ސުވާލުގެ ޖަވާބުގައި މިނިސްޓަރ ވިދާޅުވީ, ދިއްދޫގެ ޖޫނިއަރ ކޮލެޖްގެ މަސައްކަތް 2022ގެ ފަހުކޮޅަށް ނިމި ކޯސްތަކަށް އިއުލާން ކުރެވޭވަރުވާނެ ކަމަށެވެ. އަދި 2023ވަނަ އަހަރު އެތަނުގައި ކޯސްތައް ފެށި, ކިޔަވައިދޭން ފަށާނެ ކަމަށެވެ. މިނިސްޓަރ ވިދާޅުވީ, ކޮލެޖްގެ މަސައްކަތް ޕީއެސްއައިޕީގެ ދަށުން ކުރިއަށް ގެންގޮސް ނިންމާލުމަށް ދިގު މުއްދަތެއް ނަގާނެ ކަމަށެވެ. ފަހަރަކު ތަންކޮޅެއްގެ މަސައްކަތް ކުރުމުގެ ބަދަލުގައި އެއްކޮށް މަސައްކަތް ގެންދިޔުމަށްޓަކައި, ޕީޕީއައިގެ ދަށުން އިންވެސްޓަރެއް ހޯދުމުގެ މަސައްކަތް މިހާރު ކުރިއަށްދާކަމަށާއި, މިގޮތަށް ނިންމީ ސަރުކާރާ މަޝްވަރާ ކުރުމަށްފަހު ކަމަށްވެސް ވިދާޅުވިއެވެ.

ޖޫނިއަރ ކޮލެޖްގެ މަސައްކަތް ކުރިއަށްދަނީ ކައުންސިލާވެސް މަޝްވަރާ ކުރުމާއެކުގައި ކަމަށާއި, ޖޫނިއަރ ކޮލެޖް ވަކި ދާއިރާއަކަށް ޚާއްސަ ކުރުުމަށް މަސައްކަތްތަކެއްވެސް ކުރެވެމުން އަންނަ ކަމަށް ވިދާޅުވިއެވެ. ކޮލެޖް އެޅުމަށް ބޭނުންވާ ބިން ހޯދުމަށްވެސް ކައުންސިލާއެކު މަޝްވަރާކުރެވި, ބިން ހަމަޖެހިފައިވާކަމަށް ވިދާޅުވިއެވެ. އެހެންކަމުން އިންވެސްޓަރެއް ހަމަޖެހުމާއެކު އަމަލީ މަސައްކަތް ފަށައިގަނެވޭނެ ކަމަށްވެސް މިނިސްޓަރ ވިދާޅުވިއެވެ.

ސަރުކާރުން ވެފައިވާ ވައުދު ފުރިހަމަ ގޮތުގައި ގެނެސް ދިނުމަށް މަސައްކަތް ކުރިން 11 އޮކްޓޯބަރގައި ރައީސާއެކު މަޝްވަރާ ކުރެއްވިކަންވެސް މިނިސްޓަރ ފާހަގަކުރެއްވިއެވެ. ދިއްދޫގައި ޖޫނިއަރ ކޮލެޖް އެޅުމުގެ މަސައްކަތަށް 2019 ވަނަ އަހަރު 1.6 މިލިއަން ރުފިޔާ އަދި 2020 ވަނަ އަހަރުގެ ބަޖެޓުގައި 3 ލައްކަ ރުފިޔާ ކަނޑައެޅިއެވެ. މި ބަޖެޓުގެ ތެރެއިން ޑިޒައިންގެ މަސައްކަތްތައް ދަނީ ކުރިއަށެވެ.

ޖޫނިއަރ ކޮލެޖުގެ މަސައްކަތަކީ ރާއްޖޭގެ ތައުލީމީ ނިޒާމަށް މުޅިން އަލަށް ތައާރަފްވާ މޮޑެލްއެކެވެ. މި މޮޑެލްގެ ކޮލެޖުތައް ޚާއްސަކުރާނީ އޯލެވެލް ނިންމާފައި ނުކުންނަ އުމުރުން 16 އަހަރާއި 21 އަހަރާ ދެމެދުގެ ދަރިވަރުންނަށް ފައުންޑޭޝަން ލެވަލްތަކުގެ ކޯސްތައް ކުރިއަށްގެންދިއުމަށެވެ. މި ކޮލެޖްތަކުގައި ހިންގާނީ 2 އަހަރުގެ މުއްދަތުން ހިންގާ ކޯސްތަކާއި ތަމްރީންތަކެވެ.