މިދިޔަ މަހު އެންމެ ގިނަ މީހުން ޖަލަށްލާފައިވަނީ މަސްތުވާތަކެތީގެ މައްސަލާގައި
ފެބްރުއަރީ މަހު އެކި މައްސަލަތަކުގައި 80 މީހަކު ޖަލަށް ގެންގޮސްފައިވޭ
ގައިދީއަކު ޖަލަށް ގެންދަނީ
މިދިޔަ މަހު އެންމެ ގިނަ މީހުން ޖަލަށް ލާފައިވަނީ މަސްތުވާތަކެތީގެ މައްސަލާގައި ކަމަށް މޯލްޑިވްސް ކަރެކްޝަނަލް ސަރވިސަސްއިން ބުނެފިއެވެ.
ކަރެކްޝަންސުން އާންމުކޮށްފައިވާ ފަހުގެ ތަފާސްހިސާބުތައް ދައްކާގޮތުން, ފެބްރުއަރީ މަހު އެކި މައްސަލަތަކުގައި 80 މީހަކު ޖަލަށް ގެންގޮސްފައިވެއެވެ. އޭގެ ތެރެއިން 16 މީހެއްގެ ޝަރީއަތް މިހާރު ކުރިއަށްދާއިރު، 64 މީހަކަށް ހުކުމް އިއްވާފައިވެއެވެ.
އަލަށް ޖަލަށް ލާފައިވާ މީހުންގެ ތެރެއިންވެސް 51.6 އިންސައްތަ މައްސަލައަކީ މަސްތުވާތަކެއްޗާ ގުޅުންހުރި މައްސަލަތަކެވެ. ފޭރުމާއި ވައްކަމުގެ 21.9 އިންސައްތަ, ކުޑަކުދިންނާއި ޖިންސީ ގޯނާކުރި 6.3 އިންސައްތަ، ކޯޓުގެ ގާނޫނަށް ހުރަސްއެޅުމާއި ގުޅިގެން 1.6 އިންސައްތަ، ކޯޓުގެ އަމުރަށް ނުކިޔަމަންތެރިވުމުގެ 1.6 އިންސައްތަ، އެހެން މީހެއްގެ މުދަލަށް އަރައިގަތުމުގެ 7.8 އިންސައްތަ، އިންޒާރު ދިނުމުގެ 1.6 އިންސައްތަ، އާއްމުންގެ ތެރޭގައި ނުރައްކާތެރި ހަތިޔާރު ގެންގުޅުމުގެ ކުށުގައި 3.1 އިންސައްތަ، ޓެރަރިޒަމްގެ 1.6 އިންސައްތަ އަދި އެހެނިހެން 3.1 އިންސައްތަ މައްސަލަ ހިމެނެއެވެ.
މީގެ އިތުރުން ފެބްރުއަރީ މަހުގެ ތެރޭގައި 52 މީހުން ޖަލުން ދޫކޮށްލާފައިވެއެވެ. އޭގެ ތެރެއިން 17 މައްސަލަ ކުރިއަށްދާއިރު، 35 މީހަކު މިނިވަންކޮށްފައިވަނީ ހުކުމް ތަންފީޒު ކުރުމުންނެވެ.
ކަރެކްޝަންސުން ކުރިއަށް ގެންދިޔަ އޮޕަރޭޝަންތަކުގައި އަތުލައިގަތް ތަކެއްޗަށް ބަލާއިރު، މާފުށީ ޖަލުން 11 ފޯނު، އައްސޭރި ޖަލުން 13 ފޯނު އަތުލާފައިވެއެވެ. މީގެ ތެރޭގައި ސިމް ކާޑާއި، ޗާޖަރާއި، ބޭނުން ކުރުން މަނާ ބޭސް، ހެޑްސެޓް، އަދި ފޯނުގެ ބެޓަރީތައް ހޯދާފައިވެއެވެ.
ކަރެކްޝަންސުން ދަނީ ގައިދީންނަށް ފޯނުން ގުޅުމުގެ ފުރުސަތު ވެސް ދެމުންނެވެ.
އެގޮތުން މިދިޔަ މަހު މާފުށީ ޖަލުން 682 ގައިދީންނަށް ފޯނުން ގުޅުމުގެ ފުރުސަތު ދީފައިވާއިރު، 241 ގައިދީންނަށް ވީޑިއޯ ކޯލް ކުރުމުގެ ފުރުސަތު ދީފައިވެއެވެ. މާލެ ޖަލުން 394 ގައިދީންނަށް ފޯނުން ގުޅުމުގެ ފުރުސަތު ދީފައިވެއެވެ. އަދި 137 ގައިދީންނަށް ވީޑީއޯ ކޯލު ކުރުމުގެ ފުރުސަތު ދީފައިވެއެވެ. މީގެ އިތުރުން އައްސޭރި ޖަލުން 169 ގައިދީންނަށް ފޯނު ކޯލު ކުރުމުގެ ފުރުސަތު ދީފައިވާއިރު، 30 ގައިދީންނަށް ވީޑިއޯ ކޯލު ކުރުމުގެ ފުރުސަތު ދީފައިވެއެވެ. އަދި ހުޅުމާލެ ޖަލުން 151 ގައިދީންނަށް ފޯނު ކޯލު ކުރުމުގެ ފުރުސަތު ދީފައިވާއިރު، ވީޑީއޯ ކޯލު ކުރުމުގެ ފުރުސަތު 2 ގައިދީއަކަށް ދީފައިވެއެވެ.
