މާވިންއަށް ކުރާ ދައުވާ ރަނގަޅަށް ތަރުޖަމާ ކޮށްނުދެވިގެން އަޑުއެހުން އެހެން ދުވަހަކަށް
މޭރީގެ އާއިލާއިން އެދޭނަމަ މާވިންގެ ކިބައިން ޤިސާސް ހިފިދާނެކަމަށް ދައުލަތުން ދެކޭ
މޭރީގެ ފިރިމީހާ ފިލިޕީންސްގެ ރައްޔިތެއްކަމަށްވާ މާރވިން އެސް.ވައި ވާރގަސް
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި އޭނާގެ ފިރިމީހާގެ މައްޗަށް އުފުލާފައިވާ ދައުވާގެ އިބްތިދާއީ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ބުދަ ދުވަހު ކުރިއަށްދިޔަ އަޑުއެހުމުގައި އޮތީ ދައުލަތުން މާވިންގެ މައްޗަށް އުފުލާފައިވާ ދައުވާ ހުށައެޅުމެވެ.
އަޑުއެހުން ފަށަމުން ދިފާއުން ކުރި ސުވާލުތަކަށް ޖަވާބު ދެއްވަމުން ދައުލަތުގެ ވަކީލު ވަނީ މި މައްސަލައިގައި ހުށައަޅާފައިވާ ހެކިތަކުގެ ތެރެއިން ޝަރީއަތަށް ހުށައެޅިފައި ނުވާ ހެއްކަކީ މޭރީގެ ދަރިފުޅުގެ ސައިކޮލޮޖިކަލް އެސެސްމަންޓް ރިޕޯޓު ކަމަށާއި، އެ ރިޕޯޓު ތައްޔާރުކުރަނީ ފިލިޕީންސްއިންކަން ފާހަގަކޮށްފައެވެ. ވުމާއެކު، ސީދާ ހެކި ހުށައެޅޭނެ ތާރީޚެއް ދައުލަތަށްވެސް ބުނެދެވިފައެއް ނުވެއެވެ.
އެހެންނަމަވެސް، މި މަރުޙަލާއަކީ ދައުވާ އިއްވައި، ޖަވާބުދާރީ ވުމުގެ މަރުޙަލާކަން ފާހަގަކުރައްވައި ދައުލަތުގެ ވަކީލު ވަނީ އެ ލިޔުން ނެތް ނަމަވެސް ދައުވާއަށް ޖަވާބުދާރީ ވެވޭނެ ކަމަށެވެ. ސީދާ އެ ހެކި ނެތުމަކީ ދައުވާއަށް ޖަވާބުދާރީ ނުވެވޭނެ ސަބަބެއް ނޫންކަމަށްވެސް ދައުލަތުން ދެކެއެވެ.
ބުދަ ދުވަހު ބޭއްވި އަޑުއެހުމުގައި ދައުލަތުން ވަނީ ދައުވާ އިއްވާފައެވެ. އެގޮތުން މާވިންގެ މައްޗަށް އުފުލާފައިވަނީ އެނގި ހުރެ މީހަކު މެރުމުގެ ކުށުގެ ދައުވާއެވެ. އެހެންނަމަވެސް، ދައުލަތުން އިއްވި ދައުވާ މާވިންއަށް ޓްރާންސްލޭޓަރަކު މެދުވެރިކޮށް ތަރުޖަމާ ކޮށްދިންއިރު، އެންމެ ރަނގަޅަށް ތަރުޖަމާ ކޮށްނުދެވޭކަން ދައުލަތާއި، ދިފާއުން އަދި ޝަރީއަތުންވެސް ޤަބޫލު ކުރެއެވެ.
ދައުލަތާއި ދިފާއުންވެސް އެދުނީ އެހެން ޓްރާންސްލޭޓަރަކު ހޯދައިދިނުމަށެވެ.
ވުމާއެކު، ދައުވާ ހުށައެޅުން އެހެން ދުވަހަކަށް ވަނީ ފަސްކޮށްދީފައެވެ.
މި މައްސަލައިގައި މާރވިންގެ މައްޗަށް އެނގިހުރެ މީހަކު މެރުމުގެ ކުށުގެ ދައުވާ އުފުލާފައިވާއިރު، ސަބަބެއްގެ ގޮތުން ޕީޖީ އޮފީހުން ބުނީ މާރވިން 19 އޮކްޓޫބަރު 2021 ދުވަހުގެ 12:00 އާއި 12:49 އާ ދެމެދުގެ ވަގުތެއްގައި، އޭނާ ދިރިއުޅޭ މއ.އުދުހޭކޮކާގޭގެ ފުރަތަމަ ފަންގިފިލާގެ ތެރޭގައި އޭނާގެ އަންހެނުން، ފިލިޕީންސްގެ ރައްޔިތެއްކަމަށްވާ މޭރީ ގްރޭސް އޮނެޑް ޕިނެޑާގެ ބޮލާއި ކަރަށް ހަމަލާދީގެންނާއި، ނޭވާ ހާސްކޮށްގެން މަރާލާފައިވާ ކަމަށެވެ.
މި ކުށުގެ އަސާސީ އަދަބަކީ 10 އަހަރަށް ޖަލަށްލުމެވެ. ނަމަވެސް މޭރީގެ އާއިލާއިން އެދޭނަމަ މާވިންގެ ކިބައިން ޤިސާސް ހިފިދާނެކަމަށް ދައުލަތުން ދެކެއެވެ.
