ސީފުޑް އެކްސްޕޯގައި ބައިވެރިވެވަޑައިގަތުމަށް ފިޝަރީޒް މިނިސްޓަރ ބޮސްޓަންއަށް

އެމެރިކާގެ ބޮސްޓަންގައި މާރިޗް 13އިން 15އަށް ކުރިއަށްދާ ސީފުޑް އެކްސްޕޯގައި ބައިވެރިވެވަޑައިގަތުމަށް މިނިސްޓަރ ޑރ. ހުސައިން ރަޝީދު ހަސަން ބޮސްޓަންއަށް ވަޑައިގެންފިއެވެ.

މިދަތުރުގައި އެމަނިކުފާނުގެ އަރިހުގައި ފިޝަރީޒް ޑިޕާޓްމަންޓްގެ ޑިރެކްޓަރ ޖެނެރަލް އާދަމް ޒިޔާދުވެސް ވަނީ ބައިވެރިވެވަޑައިގެންފައެވެ. މި އެކްސްޕޯގައި, ރާއްޖޭގައި މަހުގެ އުފެއްދުންތައް އުފައްދައި އެކްސްޕޯޓްކުރާ ގިނަ ކުންފުނި ތަކަކުން ބައިވެރިވެފައިވެއެވެ. މި އެކްސްޕޯއިން ރާއްޖޭގެ މަސްވެރިކަމުގެ އުފެއްދުންތައް ބޭރުގެ ބާޒާރުތަކަށް އިޝްތިހާރުކޮށް މާކެޓް ކުރުމުގެ ފުރުސަތު ހުޅުވިގެންދާނެއެވެ. އަދި ރާއްޖެއިން އެކްސްޕޯޓް ކުރާ މަހުގެ ބާވަތްތަކަށް ބޭރުގެ ބާޒާރުތަކުގައި އޮތް ފުރުސަތުތައް ދެނެގަނެވި, ދިވެހި މަސް އެކްސްޕޯޓްކުރުމަށް އިތުރު ބާޒާރުތައް ހޯދުމަށް މަގުފަހިވެގެންދާނެއެވެ.

މިފަދަ އެކްސްޕޯތަކުގައި ބައިވެރިވުމަކީ، މަސްވެރިން ބާނާ މަހަށް ރަނގަޅު އަގެއް ހޯދައިދިނުމަށް ސަރުކާރުން ކުރަމުންދާ މަސައްކަތްތަކަށް އިތުރަށް މަގުފަހިވާނެކަމެކެވެ.

މީގެ އިތުރުން، މި ދަތުރުފުޅުގައި މިނިސްޓަރ ހުސައިނާއި ޑިރެކްޓަރ ޖެނެރަލް ޒިޔާދު ކެލިފޯނިޔާގެ ޔުނިވަރސިޓީ އޮފް ސެންޓަަ ބާރބަރާގެ ސައިންޓިސްޓުންނާއި ބައްދަލުކުރައްވައި، ހިމާޔަތްކުރެވިފައިވާ ތަންތަނާއި ދެމެހެއްޓެނިވި ގޮތެއްގައި މަސްވެރިކަން ތަރައްގީކުރުމާ ގުޅޭގޮތުން މުހިންމު މަޝްވަރާތަކެއް ކުރެއްވުމަށްވެސް ވަނީ ހަމަޖެހިފައެވެ.