އިންޑިޔާ ސިފައިން ރާއްޖޭގައި ތިބުމަކީ ބޮޑު ނޮހޮރޮއްޕާނެއް: ޔާމީން
12 މާރިޗު 2022 | ހޮނިހިރު 03:37ރައީސް ޔާމީން ވިދާޅުވީ، ރާއްޖޭގައި ތިބި އިންޑިއާ ސިފައިން ބޭރުކުރުމަށް ގޮވާލައި ފަށާފައިވާ ހަރަކާތް އިތުރަށް ފުޅާކުރަން މަޖުބޫރުވެއްޖެކަމަށް
ރައީސް އަބްދުﷲ ޔާމީން
އިންޑިޔާ ސިފައިން ރާއްޖޭގައި ތިބުމަކީ ބޮޑު ނޮހޮރޮއްޕާނެއް ކަމަށާއި, އެއީ ދިވެހި ގައުމާއި ރައްޔިތުންނަށް ޖެހިފައިވާ މުސީބާތެއްކަމަށް ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
އދ. މަހިބަދޫގައި އޮތް "އިންޑިއާ އައުޓް" ހަރަކާތުގައި ބައިވެރިވެވަޑައިގެން ދެއްކެވި ވާހަކަފުޅުގައި ރައީސް ޔާމީން ތަކުރާރުކޮށް ވިދާޅުވީ, މުޅި ރާއްޖޭގައި އިންޑިޔާގެ އަސްކަރިއްޔާ އެބައޮތް ކަމަށާއި, ހަތިޔާރާއެކު އިންޑިޔާ ސިފައިން ރާއްޖޭގައި ހަރަކަތާތްރެރިވަމުން އަންނަކަމަށެވެ. ޔާމީން ވިދާޅުވީ ވެރިރަށް މާލޭގައިވެސް ހަތިޔާރާއެކު ސިފައިން ހަރަކާތްތެރިވަމުންދާ ކަމަށެވެ.
ޔާމީން ވިދާޅުވީ ދިވެހިންގެ ރައީސަކު ވެރިކަމުގައި ހުންނެވިނަަމަވެސް ހަގީގީ ވެރިކަން އޮތީ އެ ރައީސްގެ އަތްޕުޅުގައި ނޫންކަމަށެވެ. ސަރުކާރުން ވެރިކަން ކުރަނީ އަތިރީގޭގައި ހިންގަމުންދާ އިންޑިއާ އެމްބަސީގައި އިންނަވާ އެ ގައުމުގެ ސަފީރު އަންގަވާގޮތަކަށް ކަމަށެވެ. އަދި ރާއްޖޭގައި ތިބި އިންޑިއާ ސިފައިން ބޭރުކުރުމަށް ގޮވާލާ ފަށާފައިވާ ހަރަކާތް އިތުރަށް ފުޅާކުރަން މަޖުބޫރުވެއްޖެ ކަމަށެވެ.
ރާއްޖެއާ އިންޑިޔާގެ ގުޅުން މިއަދާ ހަމައަށް ދެމި އޮތީ މާ މޮޅު ޚާރިޖީ ސިޔާސަތެއް އޮވެގެން ނޫން ކަމަށް ވިދާޅުވެ ރައީސް ޔާމީން ވަނީ އިންޑިޔާއަށް ފާޑުވިދާޅުވެފައެވެ. އެމަނިކުފާނު ވިދާޅުވީ ދިވެހީން އަބަދުވެސް ތިބެން ޖެހިފައި އޮތީ އިންޑިޔާއަށް ޖިޒީ ދައްކައިގެން, "ޒާތަަކަށް އަޅުވެތި ވެގެން" ކަމަށެވެ. އަދި އެކަން މިހާތަނަށް ވެރިކަން ކުރެއްވި އެއްވެސް ބޭފުޅަކަށް ދޮގު ނުކުރެއްވޭނެކަމަށް ވިދާޅުވިއެވެ.
ޔާމީން ވަނީ އެމަނިކުފާނުގެ ވެރިކަމުގައި ސުޕްރީމް ކޯޓުން 2018 ވަނަ އަހަރުގެ ފެބްރުއަރީ 1ގައި ނެރުނު ބޮޑު އަމުރަކީ އިންޑިއާ ސަރުކާރުން އަންގައިގެން ނެރެފައިވާ އަމުރެއް ކަމަށް ވިދާޅުވެފައެވެ. ޔާމީން ވިދާޅުވީ އެއީ "ގައްދާރު"ވި ފަނޑިޔާރުންތަކެއް މެދުވެރިވެގެން އިންޑިއާ އެމްބަސީން ލިޔެ ނެރުނު އަމުރެއް ކަމަށެވެ. އެ އަމުރު ލިޔުނު މީހާ މިއަދުވެސް އިންޑިއާ އެމްބަސީގައި އެބަހުރި ކަމަށް ވިދާޅުވިއެވެ.
