މުޒާހަރާ ނުކުރުމަށް ނިންމާ، ޓެކްސީ ޑްރައިވަރުން ކަނޑައެޅި އަގަށް ދަތުރުތައް ކުރަން ފަށައިފި
ދެން ދަތުރުތައް ކުރާނީ ޑްރައިވަރާއި ޚިދުމަތް ހޯދާ މީހާއާއި ދެމެދު ރުހޭ އަގެއްގައި
ހުޅުމާލެ
މުޒާހަރާ ނުކުރުމަށް ނިންމާ، ޓެކްސީ ޑްރައިވަރުން އަމިއްލައަށް ކަނޑައެޅި އަގަށް ދަތުރުތައް ކުރަން ނިންމައިފިއެވެ.
ޓެކްސީ ޑްރައިވަރުން ބުނީ ޓްރާންސްޕޯޓު މިނިސްޓްރީން ވަކި ގޮތެއް ނާންގާތީ އެމީހުން އަމިއްލައަށް ކަނޑައެެޅި އަގަށް ދަތުރުކުރަން ނިންމާފައިވާ ކަމަށެވެ. އެމީހުން ބުނީ ދެން ދަތުރުތައް ކުރާނީ ޑްރައިވަރާއި ޚިދުމަތް ހޯދާ މީހާއާއި ދެމެދު ރުހޭ އަގެއްގައި ކަމަށެވެ. އަދި އެއީ އެމީހުން ކަނޑައަޅާފައިވާ އަގަށްވުރެ ކުޑަ އަގަކަށް ނުވާނެ ކަމަށާއި އެ އަގަށްވުރެ އަގުތައް ބޮޑުވުމަކީ ވެސް އެކަށީގެންވާ ކަމެއް ކަމަށެވެ.
ހުރިހާ ޓެކްސީތަކުގައި ވެސް ދެން އައު އަގުތައް ފެންނަން ހުންނާނެ ކަމަށާއި، އެހެންކަމުން ޚިދުމަތް ހޯދާ ކަސްޓަމަރުން އެ ޚިދުމަތް ހޯދާނީ އެ އަގުތަކަށް ރުހި ގަބޫލުވާކަމުގައިވާނަމަ ކަމަށް ވެސް ޑްރައިވަރުން ބުނެއެވެ.
ޓެކްސީ ޑްރައިވަރުން ވަނީ ބުރާސްފަތި ދުވަހު މުޒާހާރާކޮށް، ސެންޓަރުތައް ވެސް ބަންދުކޮށް ބައެއް ޓެކްސީ އެޕްލިކޭޝަންތައް ވެސް ޑައުންކޮށްފައެވެ. އެހެންނަމަވެސް މިހާރު ވަނީ ޚިދުމަތްދޭން ފަށާފައެވެ.
ޓެކްސީ ޑްރައިވަރުން ކަނޑައަޅާފައިވާ އަގުތަކަށް ބަލާއިރު މާލޭ ސިޓީގެ އެތެރޭގެ ދަތުރަކަށް 30 ރުފިޔާ، ހުޅުމާލެ ފޭސް އެކެއް އަދި ފޭސް ދޭއްގެ އެތެރޭ ދަތުރަކަށް 25 ރުފިޔާ، ހުޅުމާލެ ފޭސް އެކަކުން ހުޅުމާލެ ފޭސް ދޭކަށް 40 ރުފިޔާ ނެގުމަށް ވަނީ ނިންމާފައެވެ. އަދި ހުޅުމާލެ ފޭސް ދޭކުން މާލެއަށް އަދި މާލެ އިން ހުޅުމާލެ ފޭސް ދޭކަށް 120 ރުފިޔާ، މާލެއިން ހުޅުމާލެއަށް އަދި ހުޅުމާލެއިން މާލެއަށް 100 ރުފިޔާ، އެއާޕޯޓުން މާލެއަށް އަދި މާލެއިން އެއާޕޯޓަށް 80 ރުފިޔާ، ހުޅުމާލެއިން އެއާޕޯޓްގެ ސީޕްލޭން ޓާމިނަލަށް 100 ރުފިޔާ، މާލެއިން ހުޅުލޭ އެއާޕޯޓްގެ ސީޕްލޭން ޓާމިނަލަށް 100 ރުފިޔާ އަދި، ހުޅުމާލެ ފޭސް ދޭކުން ހުޅުލެ ސީޕްލޭން ޓާމިނަލަށް 120 ރުފިޔާ ނެގުމަށް ވަނީ ނިންމާފައެވެ.
ސެންޓަރުތަކުގެ އިސްވެރިން ބުދަ ދުވަހު ޓްރާންސްޕޯޓް މިނިސްޓަރު އައިޝަތު ނަހުލާއާއި ބައްދަލުކޮށްފައިވާއިރު އަގުތަކާއި ގުޅިގެން އޮތް ހައްލަކީ މީޓަރު ހަރުކުރުން ކަމުގައި ގިނަ ސެންޓަރުންތަކުގެ އިސްވެރިން ވަނީ ބުނެފައެވެ. އެހެންނަމަވެސް މީޓަރު ހަރުކުރެވެންދެން ވެސް އަގުތަށް ބޮޑުކުރުމަށް ވަނީ ޑިމާންކޮށްފައެވެ. މިކަމާ ގުޅޭގޮތުން ޓްރާންސްޕޯޓު މިނިސްޓްރީން ބުނެފައިވަނީ މަޝްވަރާތައް ކުރިއަށްދާ ކަމަށާއި، އާދީއްތަ ދުވަހަށް ޖަވާބެއް ދެވޭތޯ ބަލާނެކަމަށެވެ.
ޓެކްސީ ޑްރައިވަރުން މިހެން ބުނެފައިވާއިރު ކަނޑައަޅާފައިވާ އަގަށްވުރެ ބޮޑު އަގުތަކެއް ޓެކްސީތަކުން ނަގާނަމަ ޤާނޫނުތަކާއި ޤަވާއިދުތަކުގެ މަތިން ފިޔަވަޅު އަޅާނެކަމަށް ފުލުހުން ވަނީ ބުނެފައެވެ. ފުލުހުން ވަނީ ޓެކްސީ ޚިދުމަތްތަކަށް ނެގޭ އަގުތައް ބަޔާންކޮށް، އެއަގުތަކުގެ އިތުރަށް ކަސްޓަމަރުންގެ އަތުންނާއި ޓެކްސީތަކަށް އަރުވާ ދާގީނާއަށް އަގު ނެގުން ފަދަ ކަންކަމަކީ މަނާ ކަމެއްކަމަށް ހަނދާންކޮށްދީފައެވެ.
