ފެބްރުއަރީ މަހު މީރާ އަށް 1.41 ބިލިއަން ރުފިޔާ ބަލައިގެންފި
މި އަދަދަކީ ވޭތުވެދިޔަ އަހަރުގެ މުއްދަތުގައި ލިބުނު އާމްދަނީއަށްވުރެ 40.1 އިންސައްތަ އިތުރު އަދަދެއް
ނިއު ނޯމަލްގައި މީރާއިން މަސައްކަތް ކުރި ގޮތް
މިއަހަރުގެ ފެބްރުއަރީ މަހު 1.41 ބިލިއަން ރުފިޔާ ބަލައިގަނެފައިވާ ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ބުނެފިއެވެ.
މީރާ އިން ބުނީ މި އަދަދަކީ ވޭތުވެދިޔަ އަހަރުގެ މުއްދަތުގައި ލިބުނު އާމްދަނީއަށްވުރެ 40.1 އިންސައްތަ އިތުރު އަދަދެކެވެ. އަދި، ފެބްރުއަރީ 2022 ގައި ލިބޭނެ ކަމަށް އަންދާޒާ ކޮށްފައިވާ އަދަދަށްވުރެ 17.6 އިންސައްތަ އިތުރު އަދަދެކެވެ.
މީރާ އިން ބުނީ ފެބްރުއަރީ 2021 ގައި ލިބުނު އާމްދަނީ އާއި އަޅައިބަލާއިރު ފެބްރުއަރީ 2022 ގައި ލިބިފައިވާ އާމްދަނީ އިތުރުވުމުގެ މައިގަނޑު ސަބަބަކީ ޖީއެސްޓީ، އިންކަމް ޓެކްސް، ގްރީން ޓެކްސް، ޓޫރިޒަމް ލޭންޑް ރެންޓް އަދި އެއަރޕޯޓް ޓެކުހާއި ފީގެ ގޮތުގައި ލިބިފައިވާ ފައިސާ އިތުރުވުމުން ކަމަށެވެ.
ޖަނަވަރީ 2021 އާއި އަޅައިބަލާއިރު، ޖަނަވަރީ 2022 ގައި ދިވެހިރާއްޖެއަށް ޒިޔާރަތްކޮށްފައިވާ ފަތުރުވެރިންގެ އަދަދު 43.1 އިންސައްތަ އިތުރުވެފައިވާ ކަމަށް މީރާ އިން ބުންޏެވެ. ފެބްރުއަރީ 2022 ގައި މީރާއަށް ބަލައިގަތް އާމްދަނީގެ އެންމެ ބޮޑު ބައެއް ހިއްސާ ކުރަނީ ޖީއެސްޓީއެވެ. އެއީ 69.1 އިންސައްތަ ނުވަތަ 972.10 މިލިއަން ރުފިޔާއެވެ. ދެން އެންމެ ބޮޑު އާމްދަނީއެއް ލިބިފައިވަނީ އިންކަމް ޓެކްސުންނެވެ. އެއީ 9.8 އިންސައްތަ ނުވަތަ 138.21 މިލިއަން ރުފިޔާއެވެ.
މީގެ އިތުރުން، ގްރީން ޓެކްސްގެ ގޮތުގައި 91.44 މިލިއަން ރުފިޔާ، އެއަރޕޯޓް ސަރވިސް ޗާޖްގެ ގޮތުގައި 51.99 މިލިއަން ރުފިޔާ، އެއަރޕޯޓް ޑިވެލޮޕްމަންޓް ފީގެ ގޮތުގައި 44.85 މިލިއަން ރުފިޔާ، އަދި އެހެނިހެން ޓެކުހާއި ފީގެ ގޮތުގައި 107.98 މިލިއަން ރުފިޔާ ލިބިފައިވެއެވެ.
ފެބްރުއަރީ 2022 ގައި ބަލައިގަނެފައިވާ އާމްދަނީގެ ތެރޭގައި 63.09 މިލިއަން އެމެރިކާ ޑޮލަރު ހިމެނެއެވެ.
