ޓެކްސީ ޑްރައިވަރުން ހުޅުމާލެއިން ފެށި މުޒާހަރާ މަލޭގެ ފުޑު ކޯޓް ސަރަހައްދުގައި ބުރާސްފަތި ދުވަހުގެ ރޭ ކުރިއަށް ގެންގޮސްފިއެވެ.

ހުޅުމާލޭގެ ރުއްގަނޑު ދޭއް ސަރަހައްދުގައި ރޭ 9:30 ހާއިރު ވަންދެން މުޒާހަރާ ކުރުމަށްފަހު، ޑްރައިވަރުން ޓެކްސީތަކުގައި މާލެއަށް މިސްރާބު ޖެހީ، ޓްރާންސްޕޯޓް މިނިސްޓްރީގެ މެސެޖެއް އިއްވުމަށްފަހުުގައެވެ. އެ މެސެޖުގައިވާ ގޮތުން ޓެކްސީ ޑްރައިވަރުންގެ ހުށަހެޅުންތަކަށް ޓްރާންސްޕޯޓް މިނިސްޓްރީއަށް ވަކި ޖަވާބެއް ދެވޭނީ އަންނަ ހަފުތާގައެވެ.

ޑްރައިވަރުން އެއް ސަފެއްގައި ރޭ މާލެއަށް މިސްރާބު ޖެހުމުން ފުލުހުން ވަނީ ހުޅުމާލެއިން ހައިވޭއަށް އަރަން އޮންނަ މަގުން ހުރިހާ ޓެކްސީއެއް ހައިވޭއަށް އެރިއަ ނުދީ ހުއްޓުވާފައެވެ. މިއާއެކު މާލެއާއި ހުޅުމާލެއާއި ދެމެދު ދަތުރުކުރާ މީހުންނަށް ބޮޑެތި ދަތިތަކާއި ކުރިމަތިވިއެވެ. އަދި އެމްޓީސީސީން މާލެއާއި ހުޅުމާލެ އަދި ހުޅުލެއަށް ކުރަމުން އަންނަ ޝެޑިއުލް ދަތުރުތަކަށްވެސް ވަނީ ބުރޫ އަރާފައެވެ. ގާތްގަނޑަކަށް 2 ގަޑިއެއްހާއިރު ހައިވޭއަށް އަރަން އޮންނަ މަގު އޮތީ ބަންދުވެފައެވެ.

ރާއްޖެއެމްވީއާއި ވާހަކަ ދެއްކި ޑްރައިވަރަކު ބުނީ، މުޒާހަރާ ހުއްޓާ ނުލާނެ ކަމަށާއި، ހަފްތާއެއްވަންދެން މުޒާހަރާ ދިގު ދަންމަން ޖެހުނަސް ޑްރައިވަރުން ތިބީ ތައްޔާރަށް ކަމަށެވެ. އަދި ޓްރަންސްޕޯޓް މިނިސްޓްރީން ބުނާ މުއްދަތަށް މަޑު ކުރެވެން ނެތް ކަމަށެވެ. މިކަމުގައި ގޮތެއް ނިމެންދެން މުޒާހަރާ ކުރިއަށް ގެންދާނެ ކަމަށެވެ.

ދުނިޔޭގެ ބާޒާރުގައި ތެލުގެ އަގަށް އަންނަމުންދާ ބަދަލާއި، ތަކެތީގެ އަގަށް އަންނަމުންދާ ބަދަލުތަކާއި ގުޅިގެން ޓެކްސީ ސެންޓަރުތަކުން ވަނީ އަގު ބޮޑު ކުރުމަށް ނިންމައި އެކަން މިނިސްޓްރީއަށް އަންގާފައެވެ. އަދި ބުދަ ދުވަހު ޓެކްސީ ޑްރައިވަރުން ވަނީ ޓްރާންސްޕޯޓް މިނިސްޓަރު އައިޝަތު ނަހުލާއާއި ބައްދަލުކޮށް އެމީހުންގެ ހުށަހެޅުންތައް ހުށަހަޅާފައެވެ.

ބުރާސްފަތި ދުވަހު 2:00 ފެށިގެން ޓެކްސީ ސެންޓަރުތަކުން ވަނީ ދަތުރުތައް ހުއްޓާލާފައެވެ.