ފަލަސްތީންގެ މޮޅު ފެޝަން ޑިޒައިނަރު ނާދްޔާ ހަޒްބައުންގެ މަސައްކަތްތައް ފުޅާކޮށް، އެދާއިރާއަށް އިތުރު އަންހެނުން ވެއްދުމުގެ މަސައްކަތް ފަށައިފިއެވެ.

ނާދްޔާއަކީ ފަލަސްތީނުގެ ބެތްލެހަމްއަށް ނިސްބަތްވާ ޒުވާން ޑިޒައިނަރެކެވެ. އޭނާ މިހާރު ދަނީ އެ ސިޓީގެ އަންހެނުންނަށް ފެހުމުގެ ހުނަރުތައް ދަސްކޮށްދެމުންނެވެ. ތަފާތު އެކިއެކި ވައްތަރުގެ ހެދުން ފެހުމަށް ދަސްކޮށްދެމުންދާއިރު، އެކިއެކި ގައުމުތަކުގެ ޓްރެޑީޝަނަލް ހެދުންތައް ފެހުމަށް އިސްކަން ދެއެވެ.

މި މަސައްކަތްކާއި ގުޅޭ ގޮތުން ނާދްޔާ ބުނީ މި މަސައްކަތް ކުރިއަށް ގެންދިޔުމުގައި ޕްރޯޓެރާ ސެންޓަރގެ ބެޓްވުމަން ޕްރޮޖެކްޓްގެ ދަށުން ވަރަށް ބޮޑު އެހީތެރިކަމެއް ލިބެމުންދާ ކަމަށާއި، ގިނަ އަންހެނުންނަށް ތަމްރީންތައް ފޯރުކޮށްދެމުންދަނީ އެޕްރޮޖެކްޓްގެ ފަރާތުން ލިބޭ އެހީތެރިކަމާއެކު ކަމަށެވެ. އަދި މިއީ އަންހެނުން ބާރުވެރިކޮށް، އަންހެނުންނަށް އާމްދަނީ ހޯދޭނެ މަގެއް ފަހިކޮށްދިނުމަށް ފެށުނު ވަރަށް ރަނގަޅު މަސައްކަތެއްގެ ގޮތުގައި އޭނާ ސިފަކުރިއެވެ.

ނާދްޔާ ދަނީ ފަލަސްތީނުގެ އަންހެނުންނަށް އޭނާގެ ހުނަރު ދަސްކޮށްދިނުމުގެ އިތުރުން ވިޔަފާރިގެ މާކެޓަށް އަންހެނުން ނެރުމުގެ މަސައްކަތްތައް ކުރަމުންނެވެ.

ތަމްރީން ޕްރޮގްރާމްގައި ބައިވެރިގެން އުޅޭ 4 ކުދިންގެ މަންމައެއް ގާދާ ހޭނާ ބުނީ ފެހުމަކީ ހަމައެކަނި ވިޔަފާރިއަށް ކުރާ ކަމެއް ނޫން ކަމަށާއި، ފެޝަންއާއި ޑިޒައިން ދަސްކުރުމަކީ އާއްމު ދިރިއުޅުމުގައި މުހިންމު ކަމެއް ކަމަށެވެ.

މި ޕްރޮގްރާމްގައި ބައިވެރިވެގެން އުޅޭ މީހުން ބުނާ ގޮތުގައި މިއީ ކޮވިޑްގެ އުނދަގޫ ހާލަތުގައި ރައްކާތެރިކަމުގެ އައްސޭރިއަކަށް ދިއުމަށް ލިބުނު ފުރުސަތެއް ކަމަށެވެ. އެއީ އަމިއްލަ މަސައްކަތުން ފައިސާ ހޯދާނެ ގޮތްތައް މަގުފަހިވެގެންދާތީއެވެ.