ސަރުކާރުން ގޮތެއް ކަނޑަނޭޅިޔަސް އަގުތައް މެންދުރު އެކެއްގެ ފަހުން ބޮޑުވާނެ: ޓެކްސީ ޑްރައިވަރުން
އެއްވެސް ފުލުހަކު ޑްރައިވަރަކާމެދު ޤާނޫނާއި ޚިލާފަށް އަމަލުކޮށްފިނަމަ އެ ފުލުހުންގެ މައްސަލަ ވަކި ވަކިން ނެޝެނަލް އިންޓަރގްރެޓީ ކޮމިޝަނަށް ހުށަހަޅާނެ
ސިނަމާލެ ބްރިޖްމަތިން ވެހިކަލްތަކެއް ދަތުރުކުރާ މަންޒަރު
ސަރުކާރުން ގޮތެއް ކަނޑަނޭޅިޔަސް މިއަދު މެންދުރު އެކެއްގެ ފަހުން އަގުތައް ބޮޑުވެގެންދާނެ ކަމަށް ޓެކްސީ ޑްރައިވަރުން ބުނެފިއެވެ.
ރާއްޖެއެމްވީއަށް މައުލޫމާތު ދެމެން ބައެއް ޓެކްސީ ޑްރައިވަރުން ބުނީ ދަތުރުތަކުގެ އަގު ބޮޑު ކުރުމަށް ކުރިން ނިންމާފައިވާ ގޮތަށް ބޮޑުވެގެންދާނެ ކަމަށެވެ.
އެގޮތުން މާލޭ ސިޓީގެ އެތެރޭގެ ދަތުރަކަށް 30 ރުފިޔާ، ހުޅުމާލެ ފޭސް އެކެއް އަދި ފޭސް ދޭއްގެ އެތެރޭ ދަތުރަކަށް 25 ރުފިޔާ، ހުޅުމާލެ ފޭސް އެކަކުން ހުޅުމާލެ ފޭސް ދޭކަށް 40 ރުފިޔާ ނެގުމަށް ނިންމާފައިވާ ކަމަށެވެ. އަދި ހުޅުމާލެ ފޭސް ދޭކުން މާލެއަށް އަދި މާލެ އިން ހުޅުމާލެ ފޭސް ދޭކަށް 120 ރުފިޔާ، މާލެއިން ހުޅުމާލެއަށް އަދި ހުޅުމާލެއިން މާލެއަށް 100 ރުފިޔާ، އެއާޕޯޓުން މާލެއަށް އަދި މާލެއިން އެއާޕޯޓަށް 80 ރުފިޔާ، ހުޅުމާލެއިން އެއާޕޯޓްގެ ސީޕްލޭން ޓާމިނަލަށް 100 ރުފިޔާ، މާލެއިން ހުޅުލޭ އެއާޕޯޓްގެ ސީޕްލޭން ޓާމިނަލަށް 100 ރުފިޔާ އަދި، ހުޅުމާލެ ފޭސް ދޭކުން ހުޅުލެ ސީޕްލޭން ޓާމިނަލަށް 120 ރުފިޔާ ނަގާނެ ކަމަށެވެ.
އަދި ސެންޓަރުތަކުގެ އިސްވެރިންގެ މެދުގައި ބައްދަލުވުމެއް ކުރިއަށްދާނެ ކަމަށާއި އެބައްދަލުވުމުން މިކަމާއި ގުޅިގެން އިހުތިޖާޖު ކުރަން ނިންމާނީތޯ ނުވަތަ ނޫންތޯ ކަނޑައެޅިގެންދާނެ ކަމަށެވެ. އަދި މި އަގުތައް ނަގަމުންދާއިރު ނުވަތަ އިހުތިޖާޖު ކުރަމުންދާއިރު އެއްވެސް ފުލުހަކު ޑްރައިވަރަކާމެދު ޤާނޫނާއި ޚިލާފަށް އަމަލުކޮށްފިނަމަ އެ ފުލުހުންގެ މައްސަލަ ވަކިވަކިން ނެޝެނަލް އިންޓަރގްރެޓީ ކޮމިޝަނަށް ހުށަހަޅާނެ ކަމަށްވެސް ޑްރައިވަރުން ވަނީ ބުނެފައެވެ.
އިހުތިޖާޖު ކުރިއަށްދާނަމަ ފަށާނީ ހުޅުމާލެ ރުއްގަނޑު ދެއަކުން ކަމަށް ވެސް އެމީހުން ބުންޏެވެ. މި އިހުތިޖާޖަކީ ގެއްލިފައިވާ ބައިވަރު ޑްރައިވަރުން ހައްޤުތައް ހޯދުމަށް ކުރެވޭ މަސައްކަތެއްގެ ގޮތުގައި ވަނީ ސިފަކޮށްފައެވެ. އަދި އެ ހައްޤުތައް ލިބިގެންދެން އިހުތިޖާޖު ފަށައިފިނަމަ، ކުރިއަށްދާނެ ކަމަށް ވެސް ބުންޏެވެ.
ސެންޓަރުތަކުގެ އިސްވެރިން ބުދަ ދުވަހު ޓްރާންސްޕޯޓް މިނިސްޓަރު އައިޝަތު ނަހުލާއާއި ބައްދަލުކޮށްފައިވާއިރު އަގުތަކާއި ގުޅިގެން އޮތް ހައްލަކީ މީޓަރު ހަރުކުރުން ކަމަށް ގިނަ ސެންޓަރުންތަކުގެ އިސްވެރިން ވަނީ ބުނެފައެވެ. އެހެންނަމަވެސް މީޓަރު ހަރުކުރެވެންދެން ވެސް އަގުތަށް ބޮޑުކުރުމަށް ވަނީ ޑިމާންކޮށްފައެވެ.
ޓެކްސީ ޑްރައިވަރުން މިހެން ބުނެފައިވާއިރު ކަނޑައަޅާފައިވާ އަގަށްވުރެ ބޮޑު އަގުތަކެއް ޓެކްސީތަކުން ނަގާނަމަ ޤާނޫނުތަކާއި ޤަވާއިދުތަކުގެ މަތިން ފިޔަވަޅު އެޅޭނެކަމަށް ފުލުހުން ވަނީ ބުނެފައެވެ. ފުލުހުން ވަނީ ޓެކްސީ ޚިދުމަތްތަކަށް ނެގޭ އަގުތައް ބަޔާންކޮށް، އެއަގުތަކުގެ އިތުރަށް ކަސްޓަމަރުންގެ އަތުންނާއި ޓެކްސީތަކަށް އަރުވާ ދާގީނާއަށް އަގު ނެގުން ފަދަ ކަންކަމަކީ މަނާ ކަމެއްކަމަށް ހަނދާންކޮށްދީފައެވެ. އަދި އިތުރަށް އަގު ނަގާނަމަ ޤާނޫނުތަކާއި ޤަވާއިދުތަކުގެ ތެރެއިން ފިޔަވަޅު އެޅޭނެކަމުގެ އިންޒާރުވެސް ފުލުހުން ވަނީ ދީފައެވެ.
ޓްރާސްޕޯޓް މިނިސްޓްރީން ވެސް ބުނެފައިވަނީ މިނިސްޓްރީން ފާސްކޮށް، އިއުލާންކޮށްފައިވާ އަގަށްވުރެ ބޮޑު އަގު ނަގާ ޓެކްސީތަކާއިމެދު ގާނޫނީ ގޮތުން އަޅަންޖެހޭ ފިޔަވަޅު އަޅާނެ ކަމަށެވެ.
