ބެލްޖިއަމަށާއި އީޔޫ އަދި ޖަޕާނަށް ރާއްޖެއިން ކަނޑައަޅާ ސަފީރުންނަށް މަޖިލީހުން ރުހުން ދީފި

ބެލްޖިއަމަށާއި އީޔޫ އަދި ޖަޕާނަށް ރާއްޖެއިން ކަނޑައަޅާ ސަފީރު ކަމަށް ރައީސުލްޖުމްހޫރިއްޔާ ފޮނުއްފި ނަންފުޅުތަކަށް ރައްޔިތުންގެ މަޖިލީހުން ރުހުން ދީފިއެވެ.

ބެލްޖިއަމަށާއި ޔޫރަޕިއަން ޔޫނިއަނަށް ދިވެހިރާއްޖެއިން ކަނޑައަޅާ ސަފީރުކަމަށް އައްޔަންކުރުމަށް ރައީސް ފޮނުއްވާފައިވަނީ ހ. ހިކިފިނިފެންމާގޭ އުމަރު އަބްދުއްރައްޒާގުގެ ނަންފުޅެެވެ. އުމަރު ސަފީރުކަމަށް އައްޔަން ކުރުމަށް ފެންނަކަމަށް 57 މެމްބަރުން ވޯޓު ދެއްވިއެވެ.

އަދި ޖަޕާނަށް ދިވެހިރާއްޖެއިން ކަނޑައަޅާ ސަފީރުކަމަށް އައްޔަން ކުރުމަށް ރައީސް ފޮނުއްވާފައިވަނީ ގ. ފިޔާތޮށިގޭ ހަސަން ސޯބިރުގެ ނަންފުޅެވެ. ސޯބިރު ސަފީރުކަމަށް އައްޔަން ކުރުމަށް ފެންނަކަމަށް 58 މެމްބަރުން ވޯޓު ދެއްވިއެވެ.

ބެލްޖިއަމަށާއި އީޔޫ އަދި ޖަޕާނަށް ރާއްޖެއިން އައްޔަންކުރާ ސަފީރުންގެ ނަންފުޅުތައް ޚާރިޖީ ގުޅުންތަކުގެ ކޮމިޓީން ދިރާސާ ކުރުމަށްފަހު އެ ދެބޭފުޅުންނަށް ރުހުން ދިނުމަށް ކޮމިޓީން ވަނީި ނިންމާފައެވެ. ކޮމިޓީން ބެލި ބެލުމުން އެ ދެބޭފުޅުންގެ ސަފީރު ކަމުގައި އެއްވެސް މައްސަލައެއް ދިމާވެފައި ނުވާތީ އެ ދެބޭފުޅުންނަށް ރުހުން ދިނުމަށް ކޮމިޓީން ވަނީ ނިންމާފައެވެ. އަދި ސަފީރު ކަމަށް ދެބޭފުޅުންވެސް ސަފީރު ކަމަށް ޝަރުތުތައް ފުރިހަމަވާކަމަށްވެސް ކޮމިޓީން ވަނީ ނިންމާފައެވެ.

އުމަރު އަބްދުއްރައްޒާގު މިހާތަނަށް ހުންނެވީ ރާއްޖެއިން ސްރީލަންކާއަށް ކަނޑައަޅާފައިވާ ސަފީރުކަމުގެ މަގާމުގައެވެ. ހަސަން ސޯބިރު މިހާތަނަށް ހުންނެވީ ބެލްޖިއަމަށާއި ޔޫރަޕިއަން ޔޫނިއަނަށް ދިވެހިރާއްޖެއިން ކަނޑައަޅާފައި ހުންނެވި ސަފީރުކަމުގެ މަގާމުގައެވެ.

އުމަރު އަބްދުއްރައްޒާގަކީ، އޮސްޓްރޭލިއާގެ އެޑިތު ކޮވިން ޔުނިވަރސިޓީއިން މާސްޓަރސް އޮފް ބިޒްނަސް އެޑްމިނިސްޓްރޭޝަން ފުރިހަމަކުރައްވާފައިވާ ބޭފުޅެކެވެ. އަދި މީގެ ކުރިން ސަރުކާރުގެ އިސް ބައެއް މަގާމުތައް ފުރުއްވާފައިވެއެވެ.

ހަސަން ސޯބިރަކީ އޮސްޓްރޭލިއާގެ ޔުނިވަރސިޓީ އޮފް ސައުތު ވޭލްސްއިން މާސްޓަރ އޮފް ބިޒްނަސް އެޑްމިނިސްޓްރޭޝަން ފުރިހަމަ ކުރައްވާފައިވާ ބޭފުޅެކެވެ. އޭނާ ވަނީ އެމެރިކާއިން, ޑިޕްލޮމާ އިން އިކޮނޮމިކް ސްޓެޓިސްޓިކްސް ހާސިލުކުރައްވައި، އިންޑިޔާއިން ބެޗެލަރ އޮފް ކޮމަރސްވެސް ހާސިލްކުރައްވާފައެވެ. އޭނާ ވަނީ ދިވެހި ޚާރިޖިއްޔާގައި ތަފާތު އެކި މަޤާމުތައް ފުރުއްވާފައެވެ.