ހުޅުމާލޭގެ ޕާކިންގ މައްސަލައަށް ހައްލެއް ހޯދުމަށް އިމާރާތްތަކެއް އަޅަން ނިންމައިފިއެވެ.
އެޗްޑީސީން ބުނީ ހުޅުމާލޭގައި ދިރިއުޅޭ ފަރާތްތަކާއި ހުޅުމާލެއަށް އެކި ބޭނުންތަކަށް ޒިޔާރަތްކުރާ ފަރާތްތަކުގެ އުޅަނދުތައް ޕާކްކުރުމުގައި މިހާރު ދިމާވަމުންދާ ދަތިތަކާއި، މަގުތަކުގެ މަތީގައި ޕާކުކޮށްފައި ހުންނަ އުޅަނދުތައް މަދުކުރުމަށް މަސައްކަތްތަކެއް ކުރެވެމުންދާކަމަށެވެ. މިގޮތުން އާދިއްތަ ދުވަހު ވަނީ ހުޅުމާލޭގައި ޕާކިންގ ބިލްޑިންގއެއް ގާއިމުކުރުމަށް ދަމާސް ކޮމްޕެނީ ޕްރައިވެޓް ލިމިޓެޑާއެކު ފްރޭމްވޯރކް އެއްބަސްވުމެއްގައި ސޮއިކޮށްފައިކަމަށެވެ.
މި އެއްބަސްވުމުގައި ދަމާސް ކޮމްޕެނީ ޕްރައިވެޓް ލިމިޓެޑްގެ ފަރާތުން ސޮއި ކުރެއްވީ ކުންފުނީގެ މެނޭޖިންގ ޑިރެކްޓަރ އަބްދުﷲ ސާލިހެވެ. އަދި އެޗް.ޑީ.ސީގެ ފަރާތުން ސޮއި ކުރައްވާފައިވަނީ މެނޭޖިންގ ޑިރެކްޓަރ ސުހައިލް އަހުމަދެވެ. މި އެއްބަސްވުމުގެ ދަށުން ގާއިމުކުރުމަށް ހަމަޖެހިފައިވާ ޕާކިންގ ބިލްޑިންގައި ސައިކަލު އަދި ކާރު ޕާކް ކުރެވޭނެއެވެ. އަދި މި ބިލްޑިންގ ހުންނާނީ ހުޅުމާލެ ފެރީ ޓަރމިނަލް ކައިރީގައި ހުންނަ އޯޝަން ފްރަންޓުގެ ފަހަތުގައެވެ.
ހުޅުމާލޭ ޕާކިންގ މައްސަލަ ހައްލުކުރުމަށް އެޗްޑީސީން މީގެ ކުރިން ވެސް މަސައްކަތްތަކެއްކުރިއެވެ. އެގޮތުން ޕާކިންގގެ މައްސަލަ ހައްލު ކުރަން ފިޔަވަޅު ތަކެއް އަޅަން ފަށައި، އެކަމަށް ހައްލު ގެންނަން މިންގަނޑު ތަކެއް ކަނޑައަޅައި, ކަރުދާހެއް ސަރުކާރަށް ހުށަހަޅާފައިވާ ކަމަށް އެޗްޑީސީން ބުނެފައިވެއެވެ. އަދި ޕާކިންގ މައްސަލަ ހައްލުކުރުމުގެގޮތުން ސަރުކާރާ ގުޅިގެން ޕާކިންގ ސްލޮޓް ހަޔަރކުރެވޭނެ ނިޒާމެއް އެކުލަވާލަން މަސައްކަތް ކުރަމުންދާ ކަމަށްވެސް މީގެ ކުރިން އެޗްޑީސީން ބުނެފައިވެއެވެ.
