ބެލްޖިމަށާއި އީޔޫ، އަދި ޖަޕާނަށް އައްޔަންކުރާ ސަފީރުންގެ ނަން ކޮމިޓީން ފާސްކޮށްފި
6 މާރިޗު 2022 | އާދީއްތަ 14:41މި ދެބޭފުޅުން އައްޔަން ކުރެއްވުމަށް ފާސްކޮށްފައިވަނީ 8 މެމްބަރުންގެ ވޯޓުން
ޚާރިޖީ ގުޅުންތަކުގެ ކޮމިޓީގެ ބައްދަލުވުން
ބެލްޖިއަމަށާއި އީޔޫ އަދި ޖަޕާނަށް ރާއްޖެއިން އައްޔަންކުރާ ސަފީރުންގެ ނަންތައް ޚާރިޖީ ގުޅުންތަކުގެ ކޮމިޓީން ފާސްކޮށްފިއެވެ.
ބެލްޖިއަމަށާއި ޔޫރަޕިއަން ޔޫނިއަނަށް ދިވެހިރާއްޖެއިން ކަނޑައަޅާ ސަފީރުކަމަށް އައްޔަންކުރުމަށް ކޮމިޓީން ފާސްކުރީ، ހ. ހިކިފިނިފެންމާގޭ އުމަރު އަބްދުއްރައްޒާގެވެ. އަދި ޖަޕާނަށް ދިވެހިރާއްޖެއިން ކަނޑައަޅާ ސަފީރުކަމަށް އައްޔަން ކުރުމަށް ކޮމިޓީން ފާސްކުރީ ގ. ފިޔާތޮށިގޭ ހަސަން ސޯބިރެވެ.
މި ދެބޭފުޅުން އައްޔަން ކުރެއްވުމަށް ފާސްކޮށްފައިވަނީ 8 މެމްބަރުންގެ ވޯޓުންނެވެ.
އުމަރު އަބްދުއްރައްޒާގު މިހާތަނަށް ހުންނެވީ ރާއްޖެއިން ސްރީލަންކާއަށް ކަނޑައަޅާފައިވާ ސަފީރުކަމުގެ މަގާމުގައެވެ. ހަސަން ސޯބިރު މިހާތަނަށް ހުންނެވީ ބެލްޖިއަމަށާއި ޔޫރަޕިއަން ޔޫނިއަނަށް ދިވެހިރާއްޖެއިން ކަނޑައަޅާފައި ހުންނެވި ސަފީރުކަމުގެ މަގާމުގައެވެ.
އުމަރު އަބްދުއްރައްޒާގަކީ، އޮސްޓްރޭލިއާގެ އެޑިތު ކޮވިން ޔުނިވަރސިޓީއިން މާސްޓަރސް އޮފް ބިޒްނަސް އެޑްމިނިސްޓްރޭޝަން ފުރިހަމަކުރައްވާފައިވާ ބޭފުޅެކެވެ. އަދި މީގެ ކުރިން ސަރުކާރުގެ އިސް ބައެއް މަގާމުތައް ފުރުއްވާފައިވެއެވެ.
ހަސަން ސޯބިރަކީ އޮސްޓްރޭލިއާގެ ޔުނިވަރސިޓީ އޮފް ސައުތު ވޭލްސްއިން މާސްޓަރ އޮފް ބިޒްނަސް އެޑްމިނިސްޓްރޭޝަން ފުރިހަމަ ކުރައްވާފައިވާ ބޭފުޅެކެވެ. އޭނާ ވަނީ އެމެރިކާއިން, ޑިޕްލޮމާ އިން އިކޮނޮމިކް ސްޓެޓިސްޓިކްސް ހާސިލުކުރައްވައި، އިންޑިޔާއިން ބެޗެލަރ އޮފް ކޮމަރސްވެސް ހާސިލްކުރައްވާފައެވެ. އޭނާ ވަނީ ދިވެހި ޚާރިޖިއްޔާގައި ތަފާތު އެކި މަޤާމުތައް ފުރުއްވާފައެވެ.
