އިންޓަ އާއި މިލާންގެ ކުރިމަތިލުން އެއްވަރު

އިޓާލިއަން ކަޕުގެ ސެމީ ފައިނަލުގެ ފުރަތަމަ ލެގުގައި އޭސީ މިލާން އާއި އިންޓަ މިލާނުން ކުޅުނު މެޗު އެއްވަރުވެގެން ނިމިއްޖެއެވެ.

އޭސީ މިލާންގެ ދަނޑުގައި އަންގާރަ ދުވަހުގެރޭ ކުޅުނު މި މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހި 0-0 ގެ ނަތީޖާއަކުންނެވެ.

މި މެޗު ފެށުމުގެ ކުރިން ޔޫކްރެއިނާއި ރަޝިޔާއާ ދެމެދު ކުރަމުން އަންނަ ހަނގުރާމަ ނިމުމަކަށް ގެނައުމަށް އެދި މިލާންގެ ދެ ކުލަބުން އެކުގައި ޝުއޫރުފާޅުކޮށްފައިވެއެވެ.

މި މެޗު ފަށައިގެން އޭސީ މިލާނަށް ލަނޑު ޖަހަން އެންމެ ރަނގަޅު ފުރުސަތެއް ލިބުނީ އަލެކްސިސް ސަލަމާކާއަށެވެ. އޭނާ ފޮނުވާލި ނުރައްކާތެރި ހަމަލާ އިންޓަގެ ކީޕަރު ސާމިރް ހަންޑަނޯވިޗް ވަނީ މަތަކޮށްފައެވެ. އޭގެ ފަހުން އެސީ މިލާންގެ ޑިފެންޑަރު ތިއޯ ހެނާންޑޭޒް ފޮނުވާލި ނުރައްކާތެރި ހަމަލާ ގޯލާ އަމާޒުނުވެ ދިޔައީ ބޭރަށެވެ.

މެޗުގެ ދެވަނަ ހާފުގައިވެސް އޭސީމިލާނުން އިންޓަގެ ގޯލަށް ނުރައްކާކުރިއިރު، އެ ޓީމުގެ ފޯޗުގަލް ފޯވާޑް ރަފައެލް ލެއާއޯ އޭރިއާ ރޮނގުކައިރިން ފޮނުވާލި ހަމަލާ އިންޓަގެ ކީޕަރު ހަންޑަނޯވިޗް ވަނީ ހުށިޔާރު ކަމާއެކު ދިފާއުކޮށްފައެވެ. އޭގެ ފަހުން އިންޓަގެ ޑެންޒެލް ޑަމްފްރީސް ގޯލު ކުރިމައްޗަށް ނެގި ނުރައްކާތެރި ހުރަސް އިންޓަގެ ކުޅުންތެރިންނަށް ލިބުމުގެ ކުރިން މިލާނުގެ ކަލޫލޫ ވަނީ ދިފާއުކޮށްފައެވެ.

އިޓާލިއަން ކަޕުގެ ދެވަނަ ސެމީގައި ބުދަ ދުވަހު ކުޅޭނީ ޔުވެންޓަސް އާއި ފިއޮރެންޓީނާއެވެ.