އެޓަލަންޓާ ބަލިކޮށް، ޔުވެންޓަސް އިން އިޓާލިއަން ކަޕް ކާމިޔާބުކޮށްފި

އިޓާލިއަން ކަޕްގެ ފައިނަލްގައި އެޓަލަންޓާ ބަލިކޮށް، ޔުވެންޓަސް އިން މުބާރާތުގެ ތަށި އުފުލާލައިފި އެވެ.

ބުދަ ދުވަހުގެ ރޭ ސްޓޭޑިއޯ އޮލިމްޕިކޯގައި ކުޅުނު ފައިނަލް މެޗު ޔުވެންޓަސް އިން ކާމިޔާބު ކުރީ 1-0 އިންނެވެ. މެޗުގެ ހަމައެކަނި ލަނޑު ޔުވެންޓަސް އިން ޖެހީ ފުރަތަމަ ހާފުގަ އެވެ.

މެޗު ފަށައިގެން ހަތަރު ވަނަ މިނެޓުގައި ޔުވެންޓަސް އިން ވަނީ ލަނޑު ޖަހައި ލީޑު ނަގައިފަ އެވެ. އެންޑްރިއާ ކަމްބިއާސޯ ތަނަވަސްކޮށްދިން ފުރުސަތެއްގައި ޔުވެންޓަސް އަށް ލަނޑު ޖަހައިދިނީ ޑޫސަން ވްލަހޮވިޗް އެވެ. މިއީ ސާބިއާގެ ފޯވާޑް މި ސީޒަންގައި ޔުވެންޓަސް އަށް ޖަހައިދިން 18 ވަނަ ލަނޑެވެ. މެޗުގެ ދެ ވަނަ ހާފުގައި ވްލަހޮވިޗް އިތުރު ލަނޑެއް ޖެހި ނަމަވެސް، ވީއޭއާރުން ވަނީ އެ ލަނޑު ބަލައި ނުގަންނަން ނިންމައިފަ އެވެ.

މިއީ ޔުވެންޓަސް އިން އިޓާލިއަން ކަޕް ކާމިޔާބު ކުރީ 14 ވަނަ ފަހަރެވެ. އަނެއްކޮޅުން މިއީ ޔުވެންޓަސް އަށް އިރުޝާދު ދެމުން އަންނަ މާސިމިލިއާނޯ އަލެގްރީގެ އިރުޝާދުގެ ދަށުން އެ ޓީމު ކާމިޔާބު ކުރި 12 ވަނަ ތައްޓެވެ. އޭގެ ތެރޭގައި އިޓާލިއަން ލީގު ފަސް ފަހަރު، އިޓާލިއަން ކަޕް ފަސް ފަހަރު އަދި އިޓާލިއަން ސުޕަ ކަޕް ދެ ފަހަރު ކާމިޔާބު ކުރުން ހިމެނެ އެވެ.