ސްޓެލްކޯގެ މެނޭޖިންގ ޑިރެކްޓަރަކަށް އިލެކްޝަންސް ކޮމިޝަންގެ ކުރީގެ ރައީސް އަހުމަދު ޝަރީފް ހަމަޖައްސައިފިއެވެ.
ޝަރީފް މި މަޤާމަށް ހަމަޖެއްސެވުމާއި ގުޅިގެން އެ ކުންފުނީގެ ބޯޑު މެމްބަރުންނާއި މެނޭޖްމަންޓް އަދި އެންމެހާ މުވައްޒަފުންގެ ނަމުގައި ވަނީ ހޫނު މަރުހަބާއެއް ދަންނަވާފައެވެ. އަދި އެ ކުންފުނީގެ ކުރީގެ މެނޭޖިންގ ޑިރެކްޓަރ ހަސަން މުއުނީ ފާއިތުވެދިޔަ ތިން އަހަރު ކޮށްދެއްވާފައިވާ ޚިދުމަތްތަކަށް އެ ކުންފުނީގެ ބޯޑު މެމްބަރުންނާއި މެނޭޖްމަންޓާއި އެންމެހާ މުވައްޒަފުންގެ ނަމުގައި ކުންފުނިން ވަނީ ޝުކުރު އަދާކޮށްފައެވެ.
ސްޓެލްކޯގެ މެނޭޖިންގ ޑިރެކްޓަރަކަށް ޝަރީފް ހަމަޖައްސަވާފައިވާއިރު ކުންފުނިތަކުގެ މެނޭޖިންގ ޑިރެކްޓަރުން ބަދަލުކުރަން ސަރުކާރުން ވަނީ ނިންމާފައެވެ. ރާއްޖެއެމްވީއަށް އިތުބާރުހުރި ފަރާތަކުން މައުލޫމާތު ދެމުން ބުނީ, މުޣުނީ، އައްޔަންކުރައްވަނީ އެންވަޔަރުމެންޓް މިނިސްޓްރީގެ ދަށުން ހިންގާ އެނަރޖީ އޮތޯރިޓީއަށެވެ. ވެމްކޯގެ މެނޭޖިން ޑިރެކްޓަރު ކަމުގައި ހުންނެވި އާދަމް މުހައްމަދު ބަދަލުކުރަނީ (އެނގިފައިވާ ގޮތުގައި) ޕޯސްޓް އޮފީހަށެވެ.
ކުންފުނިތަކަށް މި ބަދަލު ގެނައުމަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އަށް ވަނީ ހުށަހަޅައިފައެވެ.
ސަރުކާރު ހިއްސާވާ ކުންފުނިތަކުގެ މެނޭޖިން ޑިރެކްޓަރުން ބަދަލުކުރަން ސަރުކާރުން ނިންމައިފައިވާ ކަމަށް އަޑުތައް ފެތުރުނަމަވެސް ސަރުކާރުން އަދި މިކަން ކަށަވަރުކޮށްދީފައެއް ނުވެއެވެ. އަދި މިހާ ބޮޑު ބަދަލެއް ގެންނަން ނިންމާފައިވާ ސަބަބެއް ވެސް ހާމަކޮށްފައެއްނުވެއެވެ.
