މަހުލޫފުއަށް ކުރި ދައުވާ ބާތިލުކޮށްފި
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ މުހައްމަދު މިސްބާހު
މަހްލޫފް ކޯޓަށް ވަދެވަޑައިގަންނަވަނީ
ޔޫތު މިނިސްޓަރު އަހުމަދު މަހުލޫފުގެ މައްޗަށް އެމްއެމްޕީއާރްސީ ޚިޔާނާތާއި ގުޅިގެން އުފުލާފައިވާ ދައުވާ ބާތިލުކޮށްފިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ މުހައްމަދު މިސްބާހުއެވެ.
މި މައްސަލައިގެ ފުރަތަމަ އަޑުއެހުން ކްރިމިނަލް ކޯޓުގައި ކުރިއަށް ގެންގޮސްފައިވަނީ 10 ފެބްރުއަރީ 2022 ގައެވެ. އެ ދުވަހުގެ އަޑުއެހުމުގައި ދައުވާ ސާފުކޮށް، ދައުވާއަށް ޖަވާބުދާރީވުމުގެ ބައި ވަނީ ކުރިއަށް ގެންގޮސްފައެވެ.
އެ ދުވަހުގެ އަޑުއެހުމުގައި މަހުލޫފު ވަނީ ދައުވާއަށް އިންކާރުކުރައްވާފައެވެ. މަހުލޫފު ދައުވާއަށް އިންކާރު ކުރެއްވުމާއި ގުޅިގެން ދެފަރާތުގެވެސް އެދުމުގެ މަތިން ހެކި ހާމަކުރުމުގެ ބައި ވަނީ ކުރިއަށް ގެންގޮސްފައެވެ. އެގޮތުން ދައުލަތުން ޝަފަހީ 6 ހެއްކަކާއި ކިތާބީ 24 ހެއްކެއް ވަނީ ހުށައަޅާފައެވެ. އަދި ދިފާއުން ޝަފަހީ 1 ހެއްކަކާއި، ކިތާބީ 4 ހެއްކެއް ވަނީ ހުށައަޅާފައެވެ.
ދައުލަތުން ހުށައަޅާފައިވާ ހެކިންގެ ތެރޭގައި އެސްއޯއެފްގެ ރިސިޓަކާއި ގުޅިގެން ހުށައަޅާފައިވާ ސްރީލަންކާގެ ރައްޔިތަކާއި، މި މައްސަލައިގެ މޯބައިލް ފޮރެންސިކް ރިޕޯޓު ތައްޔާރު ކުރި ފުލުސް އޮފިސަރަކާއި، އެ ރިޕޯޓު އެނަލައިޒް ކުރި ބޭރުގެ ފަރާތަކާއި، ކުރީގެ ނައިބު ރައީސް އަހުމަދު އަދީބާއި، މ. ސެސްނާ، މުހައްމަދު އައްލާމް ލަތީފު (މޮހޯ), އަދި މ. ލޭންޑްއޮފްގާޑްން، އަހުމަދު އިޝްފާހް އަލީ ހިމެނެއެވެ.
ދިފާއުން ޝަފަހީ ހެކިންގެ ގޮތުގައި ހުށައަޅާފައިވަނީ މަހުލޫފުގެ އާއިލާ މެމްބަރެއްކަމަށްވާ އަލީ މުބީނެވެ.
އެ ދުވަހު ދެފަރާތުން ހެކި ހާމަކުރުމަށްފަހު ތަފްސީލީ ގޮތެއްގައި ހެއްކާއި ގުޅޭގޮތުން ވާހަކަދައްކާފަައިވެސް ވެއެވެ.
މި މައްސަލައިގައި އަންގާރަ ދުވަހު އޮތް އަޑުއެހުމުގައި ގާޒީ ވަނީ މިއީ މަދަނީ މިންގަނޑުން ކުރިއަށް ގެންދެވޭނެ މައްސަލައެއް ނޫންކަމަށް ކަނޑައަޅުއްވައި ދައުވާ ބާތިލު ކުރައްވާފައެވެ.
ޝަރީއަތުން ފާހަގަކުރި ކަންކަން:
1- އަދީބުގެ ބަޔާނުގައި އަޙްމަދު މަހުލޫފްއަށް ރިޝްވަތު ދިންކަމަށް ބުނެފައިވާކަން
2- އަދީބުގެ ބަޔާނުގައި ރިޝްވަތު ދިންކަމަށް ބުނަނީ މުޙައްމަދު އައްލާމް ލަތީފްއާ ޙަވާލާދީ މުޙައްމަދު ޢައްލާމް ލަޠީފް ބުނި ބުނުމެއްގެ މައްޗަށްކަން.
3- މުޙައްމަދު ޢައްލާމް ލަޠީފް މެދުވެރިކޮށް އެއްވެސް ފައިސާއެއް އަދި ޗެކެއްވިޔަސް އަޙްމަދު މަހުލޫފްއަށް ދީފައިވާކަމަށާއި އަދީބު ބުނާ ބުނުމަށް މުޙައްމަދު ޢައްލާމް ލަޠީފް އިންކާރުކޮށް އެކަން ދޮގުކޮށްފައިވާކަން.
4- އަދީބު ރިޝްވަތު ދިނުމަށް ފައިސާ ހަމަޖެއްސީ މުޙައްމަދު ޢައްލާމް ލަޠީފްކަމަށް ބުނި ނަމަވެސް، ފައިސާ ދައުރުކުރިގޮތާއި އެމުޢާމަލާތު ހިނގި ގޮތުގެ އެއްވެސް ތަފްޞީލެއް އަދީބު ކިޔައިދީފައި ނުވާކަން.
5- އަދީބުއަކީ ލާބައެއް ލިބިދާނެކަމުގެ އުންމީދެއްނެތި އަދި ގެއްލުމެއް ލިބިދާނެކަމުގެ ބިރެއްނެތި މި މައްސަލާގައި ހެކިބަސް ދޭން ހުރި މީހެއްކަމަށް ބެލެވެން ނެތްކަން.
6- ބާރުލިބިދޭ ހަރުދަނާ އިތުރު ހެކިޤަރީނާ ނެތި އަދީބުގެ ހެކިބަހަށް އެއްވެސް ބުރަދަނެއް ދެވެން ނެތް އިރު، އެފަދަ އިތުރު ހެކިޤަރީނާއެއް ނެތްކަން.
7- އެސްއީޒެޑް ބިލަށް ވޯޓު ދިނުމަށް ޝަރުތުކޮށް ވޯޓު ދިނުމުގެ ކުރިން އަޙްމަދު މަހުލޫފްއަށް ފައިސާ ދިންކަމަށް ބުނި ނަމަވެސް، އަދީބުއާއި އަޙްމަދު މަހުލޫފްއާ މެސެޖް ބަދަލުކޮށްފައިވަނީ އަދި ކަމަކަށް އެދިފައިވަނީ އެސްއީޒެޑް ބިލަށް ވޯޓު ނަގައި ނިމުނު ފަހުންކަން.
8- މި ދަޢުވާގައި ބުނާ ތެއްތިރީސްހާސް އެމެރިކާ ޑޮލަރުގެ ޗެކު ލިބުނީ ސްޕެޝަލް އިކޮނޮމިކް ޒޯން ބިލަށް ތާއީދުކޮށް ވޯޓުދިނުމުގެ މުޤާބިލުގައިކަން، މި ވާޤީޢާ ވުޖޫދުވެފައި އޮތްކަމަށް ބުރަވެވޭފަދަ ހެކިތަކެއް ހުށަހެޅިފައި ނެތްކަން.
9- މި މައްސަލައިގެ ޝަރީޢަތެއްކޮށް ހެކީންގެ ހެކިބަސް ނެގިކަމުގައި ވިނަމަވެސް، އަދީބު، އެސްއޯއެފްގެ ޗެކު ބޭނުންކޮށްގެން ރިޝްވަތު ދިނުމުން، އަޙްމަދު މަހުލޫފް ރިޝްވަތު ހިފީކަން ސާބިތުކޮށްދެވިދާނެ ފުރުޞަތު އޮތް ހެކިތަކެއް ކަމަށް ބެލެވޭނެ ހެކިތަކެއް ހުށަހެޅިފައި ނެތްކަން.
10- މައްސަލައިގެ ތަހުޤީޤްކޮށްފައިވަނީ ހެކި ހޯދުމަށްވުރެ ބޮޑަށް ދިފާޢީ ހެކި ނަފީކުރުމަށް އިސްކަން ދީގެންކަން.
އެސްއޯއެފްއިން އޭނާގެ އެކައުންޓަށް ޖަމާކޮށްފައިވާ ފައިސާއަކީ ޑޮލަރު ގަތުމުގެ މުއާމަލާތެއްގަައި ޖަމާ ކޮށްފައިވާ ފައިސާ ކަމަށް, އެކަމާއި ގުޅިގެން ނެރުނު ބަޔާނެއްގައި މަހުލޫފް ވަނީ ވިދާޅުވެފައެވެ.
ޓްވީޓަކާއެކު ނެރުއްވި ބަޔާނެއްގައި މަހުލޫފު ވިދާޅުވީ, އެމުއާމަލާތަކީ އޭނާގެ އެއްބަނޑު އެއްބަފާ ކޮއްކޮ މެދުވެރިވެގެން ހިންގި "ސައްހަ ކަރަންސީ އެކްސްޗޭންޖްގެ މުއާމަލާތެއް" ކަމަށެވެ. އަދި އެ ފައިސާ އޭނާގެ އެކައުންޓަށް ޖަމާކުރަން ޖެހުނީ، މުއާމަލާތުގައި ހިމެނޭ "ދަ ޖީންސް" ފިހާރައިގެ ޑޮލަރު އެކައުންޓެއް ނެތުމުން ކަމަށް ވެސް މަހުލޫފު ވަނީ ވިދާޅުވެފައެވެ.
"ދަ ޖީންސް" ފިހާރައަކީ މަހުލޫފުގެ އާއިލީ ވިޔަފާރިއެއް ކަމަށް ބަޔާނުގައި އޭނާ ވަނީ ވިދާޅުވެފައެވެ. އެންމެ ފަހުން ބޭއްވި އަޑުއެހުމުގައިވެސް މަހުލޫފުގެ ފަރާތުން ބުނެފައިވަނީ މިއީ ކަނޑައެޅިގެން ސައްހަ, ޑޮލަރު މާރުކުރުމުގެ މުއާމަލާތަކުން ލިބިފައިވާ ފައިސާ ކަމަށެވެ.
