ރާއްޖޭގައި އިތުރު 1،512 މީހުން ބޫސްޓަރ ޑޯޒު ޖަހައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު, އަންގާރަ ދުވަހާ ހަމައަށް ރާއްޖޭގައި ބޫސްޓަރ ޑޯޒު ޖަހާފައިވަނީ 123،315 މީހުންނެވެ. އަންގާރަ ދުވަހު ބޫސްޓަރ ޑޯޒު ޖަހާފައިވަނީ މާލެ ސަރަހައްދުން 358 މީހުންނާއި އަތޮޅުތަކުން 1،154 މީހުންނެވެ.

އަންގާރަ ދުވަހު ދެވަނަ ޑޯޒު ޖަހާފައިވަނީ 42 މީހުންނެވެ. އެއީ މާލެ ސަރަހައްދުން 36 މީހުންނާއި އަތޮޅުތަކުން 6 މީހުންނެވެ. މިއާއެކު ދެ ޑޯޒު ޖެހި މީހުންގެ އަދަދު ވަނީ 370،866ށް އަރާފައެވެ.

ވެކްސިންގެ ފުރަތަމަ ޑޯޒް 17 މީހުން ޖަހާފައިވެއެވެ. އެއީ މާލެ ސަރަހައްދުން 10 މީހުންނާއި އަތޮޅުތަކުން 7 މީހުންނެވެ. މިއާއެކު ފުރަތަމަ ޑޯޒް ޖެހި މީހުންގެ އަދަދު ވަނީ 398،119ށް އަރާފައެވެ.

ޖެނުއަރީ މަހުގެ 15 ވަނަ ދުވަހު އާންމުކޮށް ހުޅުވާލައިގެން ބޫސްޓަރ ޑޯޒު ޖަހަމުންދާއިރު, އެޗްޕީއޭއިން މިހާރު ބުނެފައިވަނީ އެޕޮއިންޓްމެންޓް ނުހައްދައިވެސް ބޫސްޓަރ ޑޯޒު ޖެހޭނެކަމަށެވެ.