ރަޖިސްޓްރީކޮށްދިނީވެސް މުއިއްޒުއެވެ. ބާތިލްކުރަން ދަނީވެސް މުއިއްޒުއެވެ.

މާލެ ސިޓީ ކައުންސިލަށް އަލަށް އިންތިޚާބުވި ކައުންސިލަރުންނާއެކު މިހާރު ކުރިމަތިވެގެން މިއުޅެނީ މުޅިން އައު ކަންތައްތަކެކެވެ. ފަހަރުގައި އެއީ ހަނދާނުގައި އުޅޭ މައްސަލައަކަށްވެސް ވެދާނެއެވެ. ނުވަތަ ގަސްތުގައި ހަމަ ނޭންގޭކަމަށް ހެދިގެން ކުރާ ކަންތައްތަކަށްވެސް ވެދާނެއެވެ. ނޫނީ ލިބޭ އެއްޗެއް މަދުވެގެން އިތުރަށް ބޭނުންވާވަރުގެ ބޮޑުކަމުންވެސް އެޒާތުގެ ކަންކަންކޮށްފާނެއެވެ. ނަމަވެސް 7 އަހަރު ދުވަސްވަންދެން ދައުލަތުގެ ވުޒާރާއެއް ހިންގަވަން ހުންނެވި ބޭފުޅަކު އެޒާތަށް ކަންކަން ކުރައްވާ ވާހަކަދެއްކެވުމުން އެއީ ހަމަ ހަގީގަތުގައިވެސް ވަޒީރުކަން ކުރެއްވި ބޭފުޅެއްތޯވެސް ސުވާލުއުފެދެއެވެ. ދައްކަން މިއުޅެނީ މާލެ ސިޓީގެ ކައުންސިލާއި މޭޔަރުގެ ވާހަކައެވެ. މޭޔަރު ހަތް އަހަރު ވަންދެން ހައުސިންގ މިނިސްޓްރީގައި ހުންނަވާ އޭރު އޮތް ކައުންސިލަށް ދަތިކޮށް ކައުންސިލްގެ ބާރު ކަނޑުވާލެއްވުމަށް ކުރެއްވި އެތައް ކަމެއް މިހާރު އަނެއްކޮޅަށް އަނބުރާލައްވަން އުޅުއްވާތާ ދުވަސްތަކެއްވެއްޖެއެވެ. އެކަންކަމުގެ ތެރެއަށް އިތުރުވި ބޮޅަކީ މާލޭގެ އަވަށެއްގައި އޮތް ހުޅުމާލެއެވެ.

ހުޅުމާލެއަކީ ސިޓީ ކައުންސިލްގެ ބައެއްގެ ގޮތުގައި މޭޔަރ ވިދާޅުވަމުންދިޔަޔަސް އެތަނަކީ އެޗްޑީސީއަށް ރަޖިސްޓްރީކޮށްދީފައިވާ ތަނެކެވެ. އެޗްޑީސީގެ މިލްކެކެވެ. އެކުންފުނީގެ އެސެޓެކެވެ. ހުޅުމާލެ އާއި އެޗްޑީސީގެ އުފެދުމާ ބެހޭ ގޮތުން ނިންމާފައި ހުރި ކަންކަމަށް ބަލާއިރު އެތަނަކީ ސިޓީކައުންސިލްގެ ބައެއް ގޮތަށް ނިންމޭނެ ހަމައެއް އަދި ފެންނާކަށްނެތެވެ. އެތަން އޮތީ އެޗްޑީސީއަށް ރަޖިސްޓްރީކޮށްދީފައެވެ. އަމިއްލަ މީހާ ނިސްބަތްވާ ޕާޓީގެ ހަރަކާތްތެއް ހުޅުމާލެ ފޭސް ދޭއްގައި ހިންގަން ބޭނުންވި ހިސާބުން މައްސަލަ ހޫނުވެ ހުޅުފަޅައިގެންދިޔައިރު ސިޓީ ކައުންސިލުން ވަނީ އެޗްޑީސީއަށް ހައްދައިދީފައިވާ ރަޖިސްޓްރީ ބާތިލުކުރަންވެސް ފާސްކޮށްފައެވެ.

ރަޖިސްޓްރީ ބާތިލްކުރަން ފާސްކުރި މައްސަލަ އެޗްޑީސީން ސިވިލް ކޯޓަށް ހުށަހެޅުމުން އެ ކޯޓުން ވަނީ ކައުންސިލްގެ ނިންމުމަށް އަމަލުކުރުން ފަސްކޮށްފައެވެ. ކައުންސިލްގެ ނިންމުން ތަންފީޒުކުރުން ކޯޓުން ހުއްޓުވި މައްސަލަ އެ ކައުންސިލުން ވަނީ ހައި ކޯޓުގައި އިސްތިއުނާފްކޮށްފައެވެ. ނަމަވެސް މޭޔަރުގައި ހަނދާނުގައި ނެތީ ހުޅުމާލެ ފޭސް 2 އެޗްޑީސީއަށް ރަޖިސްޓްރީކޮށްދިނީ ހުދު އެމަނިކުފާނު ކަމެވެ. ރަޖިސްޓްރީގައި ސޮއިކޮށްފައިވަނީ ހުދު އެމަނިކުފާނުކަމެވެ. އަމިއްލަފުޅަށް ސޮއިކުރި ރަޖިސްޓްރީއެއް ސައްހަނޫންކަމަށް ވިދާޅުވެ ވުޖޫދުގައިވެސް ނެތްކަމަށް ވިދާޅުވެ ކޯޓުގައި ބޮޑު ޑްރާމާތައް ކުޅެމުން އެގެންދެވަނީ ތިމާ ފޭހުނު އިލޮށި އަނެއްކާވެސް ތިމާގެ ލޮލަށް ހެރިގެންނެވެ.

އެފަދަ މައްސަލައެއް ކޯޓު މަރުހަލާގައި ހިނގާއިރު އެކަމުގެ ސަބަބުން ދިމާވާ އެތައް މައްސަލައެއް ވިސްނުމަށްނުގެނެވޭހާ ވިސްނުންކޮށީބާވައޭވެސް ހިތަށް އަރައެވެ. ނޫނީ ގައިގައި ހަރުލާފައިވާ ޖެއްްސުންކުރުމުގެ އާދައިގެ ދަށުން ކުރަމުންދާ ކަމަކަށްވެސް ވެދާނެއޭ ހިތަށް އަރައެވެ. އެޗްޑީސީގެ ތާރީޚަށް ބަލާއިރު 2010 ވަނަ އަހަރު ހުޅުމާލެ މުނިސިޕަލްޓީގެ ދަށަށް ގެންގޮސް އެ ރަށުގެ ބިމުގެތެރެއިން އެޗްޑީސީގެ އެސެޓްގެ ގޮތުގައި ހިމެނޭ ބިންތަކަށް މާލޭ ސިޓީ ކައުންސިލުން ބޮޑު އެއް ރަޖިސްޓްރީ ހަދައިދިނެވެ. އެ ރަޖިސްޓްރީ ހަދައިދިނީ ހުޅުމާލެ ތަރައްގީކުރުމަށް ޕްލޭންކޮށްފައިވާ ބިންތައް ތަރައްގީކުރަމުންދާ ވަރަކުން ބައެއް ތަންތަން އެ ރަޖިސްޓްރީން އުނިވަމުންދާ ގޮތަށެވެ. ހުޅުމާލޭގެ ބިންތަކަކީ ލޯނު އުސޫލުން އެޗްޑީސީން ހިއްކަމުންދާ ބިންތަކެވެ. އެތާންގައި އިމާރާތްކުރާ ފްލެޓްތަކަކީވެސް އެއުސޫލުން ކުރަމުން އަންނަ ކަމެކެވެ. އެޗްޑީސީއަށް ލޯނު ލިބެނީ އެކުންފުނީގެ އެސެޓެއްގެ ގޮތުގައި ހުޅުމާލެ ބިން އޮތުމުންނެވެ. ރަޖިސްޓްރީ ބާތިލްކޮށްފިނަމަ ނަގާފައިވާ ލޯނުތައް ޑީފޯލްޓްވާ ހިސާބަށްވެސް ކަންތައްދެއެވެ. އެހެންކަމުން މިމައްސަލައިގެ ބޮޑު މަންޒަރަށް ބަލާއިރު މިއީ ދައުލަތަށް އަނެއްކާވެސް ބޮޑު ބުރައެއް އުފުލަންޖެހޭނެ ކަމެކެވެ.

އަނެއްކޮޅުން މިހާރުވެސް ކޯޓުގައި މިމައްސަލަ ހިނގަމުންދާތީ އެކަމުގެ ސަބަބުން އެޗްޑީސީއަށް އަންނަނީ ގެއްލުންތައް ކުރިމަތިވަމުންނެވެ. މިމައްސަލައާ ގުޅޭގޮތުން ވާހަކަދައްކަވަމުން އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވީ ސިޓީ ކައުންސިލުން ރަޖިސްޓްރީ ބާތިލްކުރިއިރު ބޭންކަކަށް ލޯނަކަށް އެދި ހުށަހަޅާފައިވާކަމަށެވެ. ނަމަވެސް މިމައްސަލައާ ގުޅިގެން ބޭންކުން އިތުރު ޑޮކިޔުމެންޓް ބޭނުންވެ ލޯނު ލިބުން ލަސްވަމުންދާކަމަށް ސުހައިލް ވިދާޅުވިއެވެ. މިމައްސަލަ ހަމައެކަނި ދިމާވަނީ އެޗްޑީސީއަކަށްވެސް ނޫނެވެ. ހުޅުމާލޭގައި ފްލެޓްތަކެއް ހަދަމުންދާ އަމިއްލަ ބަޔަކަށްވެސް ލޯނު ލިބުމުގައި ހަމަ މިމައްސަލަ ދިމާވެގެން އުޅޭކަމަށް ސުހައިލް ވިދާޅުވިއެވެ. މިކަމުގެ ސަބަބުން ރައްޔިތުންނަށް ލިބެންޖެހޭ ޚިދުމަތްތައް ލަސްވެ މުޅި ނިޒާމު އޮޅުން ބޮޅުންވަނީއެވެ. އަދި މިކަން ރާއްޖެއިން ބޭރުގެ ފަރާތްތަކަށް ގޮސްފިނަމަ މިއަށްވުރެ އުނދަގޫކަންތައްތަކާއި ކުރިމަތިވާނެކަމަށް ސުހައިލް ވިދާޅުވިއެވެ.

ޕްރޮޖެކްޓްތަކަށް ލޯނު ނަގައިގެން ފައިނޭންސް ހޯދާއިރު އެކަންކަން ލަސްވަމުންދާކަމަށް ވާނަމަ ގެއްލުން ލިބެނީ ރައްޔިތުންނަށެވެ. މޭޔަރު ކުރަން ބޭނުންފުޅުވާ ކަންތައްތަކެއް ނުވުމުން މިއަދު ހުޅުމާލެ އަކީ ތިމަންނަމެންގެ ބިމެކޭ ވިދާޅުވެ ކަންކުރެއްވިޔަސް ހަގީގަތުގައި އޭގެ ގެއްލުންމިވަނީ ހަމަ ރައްޔިތުންނަށެވެ. އަމިއްލަފުޅަށް ސޮއިކުރެއްވި ރަޖިސްޓްރީއެއް ވުޖޫދުގައި ނެތްކަމަށް މިއަދު ކޯޓުގައި ވަކާލާތު ކުރައްވަމުން އެގެންދަވަނީ އަމިއްލަފުޅު އެދުމެއް ހާސިލްކުރަން ނޫން ދެން ކޮންކަމެއްގައި ހެއްޔެވެ.