ގައުމަށް ބޭނުންތެރި ދަރިންތަކެއް ބިނާކޮށްދީފައި އޮތުމަކީ އަހުމަދިއްޔާ ސްކޫލްގެ އެންމެ ބޮޑު އެއް ކާމިޔާބު - ރައީސް

ގައުމަށް ބޭނުންތެރި ދަރިންތަކެއް ބިނާކޮށްދީފައި އޮތުމަކީ އަހުމަދިއްޔާ އިންޓަރނޭޝަނަލް ސްކޫލްގެ އެންމެ ބޮޑު އެއް ކާމިޔާބު ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ އަހުމަދިއްޔާ އިންޓަރނޭޝަނަލް ސްކޫލަށް 40 އަހަރު ފުރުން ފާހަގަކުރުމުގެ ގޮތުން ހޯމަ ދުވަހުގެރޭ އެ ސްކޫލުގައި ބޭއްވި ޖަލްސާގައި ވާހަކަފުޅުދައްކަވަމުންނެވެ.

މި މޭރުމުން ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ އަހުމަދިއްޔާ ސްކޫލުން ކިޔެވި ދަރިވަރުން, ރައްޔިތުންގެ މަޖިލީހާއި, ސަރުކާރުގެ މަތީ މަގާމުތަކާއި، ފަންނީ އަދި ހުނަރުވެރި ތަފާތު ދާއިރާތަކުގައި ތިއްބެވިކަން ފާހަގަކުރައްވާފައެވެ.

ރައީސުލްޖުމްހޫރިއްޔާގެ ވާހަކަފުޅުގައި އެމަނިކުފާނު ވަނީ, މީގެ 40 އަހަރު ކުރީން މާލޭގައި ތައުލީމުގެ ކަންކަން އޮތްގޮތުގެ މައްޗަށާއި, އަހުމަދިއްޔާ ސްކޫލްގެ ނަން ނިސްބަތްވެވަޑައިގަންނަވާ, އަލްމަރްހޫމް ޑީ އަހުމަދު ދީދީ އެ ސްކޫލް ފެއްޓެވިގޮތުގެ މައްޗަށްވެސް އަލިއަޅުވާލައްވާފައެވެ. އަހުމަދިއްޔާ ސްކޫލަކީ މިހާރު މާލޭގައި ހުރި ސްކޫލްތަކުގެ ތެރެއިން, ބޭބީ ނާސަރީން ފެށިގެން ގްރޭޑް 12އާ ހަމައަށް ކިޔަވައިދޭ ހަމައެކަނި ސްކޫލުކަމަށާއި, ފާއިތުވި 40 އަހަރުގެ ތެރޭގައި ތައުލީމީ ރޮނގުންނާއި ސްކޫލް ފެންވަރުގައި ވާދަކުރި އިތުރު ހަރަކާތްތަކުގައި އެ ސްކޫލްގެ ދަރިވަރުން ހޯދާފައި ވަނީ ރަން ވަނަތަކެއްކަން ވެސް ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި, އެ ސްކޫލަށް ކުރިމަތިވެފައިވާ އެންމެ ބޮޑު މައްސަލައަކީ ޖާގައިގެ ދަތިކަމާހުރެ، ދަރިވަރުންގެ އިތުރު ހަރަކާތެއް ބާއްވާނެ, ނުވަތަ ތުއްތު ކުދިން ކުޅެން ނުކުމެލާނެ ބިންކޮޅެއް ސްކޫލްގައި ނެތުންކަން ފާހަގަކުރެއްވިއެވެ. އެކަމުގައި ސަރުކާރުން ވެދެވެން އޮތް އެންމެ ފުރިހަމަ އެހީތެރިކަމެއް ވެދިނުމަށް މަސައްކަތް ކުރަމުން އަންނަކަމުގައި ވެސް އެމަނިކުފާނު ވިދާޅުވިއެވެ.

މި ސަރުކާރުން އެންމެ އިސްކަމެއްދޭ އެއްކަމަކީ މީހުން ބިނާކުރުންކަން ފާހަގަކުރައްވައި, އޭގެ ތެރެއިން ވެސް ތައުލީމީ ގޮތުން ހަރުދަނާ ޖީލެއް ބިނާކުރުމަށް ސަރުކާރުން ޚާއްސާ އިސްކަމެއް ދޭކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި ރާއްޖެއާއި ރާއްޖޭން ބޭރުން މަތީ ތައުލީމުގެ އިތުރު ފުރުސަތުތައް ދަރިވަރުންނަށް ސަރުކާރުން ފަހިކޮށްދެނީ ވެސް އެ ބޭނުމުގައިކަން އެމަނިކުފާނު ފާހަގަކުރެއްވިއެވެ.

ސަރުކާރުން ރާއްޖޭގައި ހިންގާ ތަރައްގީގެ ބައެއް މަޝްރޫއުތައް ފުރިހަމަވާއިރު, ފަންނީ ހުނަރުވެރިންނަށް ބޭނުންވާނެ ގިނަ ވަޒީފާތައް އުފެދިގެން ދާނެކަން ފާހަގަކުރައްވަމުން، 5 ސަރަހައްދެއްގައި ތަރައްގީކުރާ ޓާޝަރީ ހޮސްޕިޓަލްތަކާއި, ރަށްރަށުގައި ހިންގާ އިއާދަކުރަނިވި ހަކަތައިން ކަރަންޓު އުފެއްދުމުގެ މަޝްރޫއުތަކާއި, ފެން އުފައްދާ ޕްލާންޓްތައް ފަދަ ތަންތަނުން އެފަދަ ބައެއް ވަޒީފާތައް އުފެދޭނެކަން އެމަނިކުފާނު ފާހަގަކުރެއްވިއެވެ.

އަހުމަދިއްޔާ އިންޓަރނޭޝަނަލް ސްކޫލަށް 40 އަހަރުފުރުން ފާހަގަކުރުމަށް މިރޭ ބޭއްވި ޖަލްސާގައި, އަލްމަރްހޫމް ޑީ އަހުމަދު ދީދީގެ ހަނދާނީ ޚާއްސަ އެވޯޑް ދެއްވައި, އެ ސްކޫލަށް 25 އަހަރަށްވުރެ ދިގު މުއްދަތެއްގައި ޚިދުމަތްކުރައްވާފައިވާ ބޭފުޅުންނަށް ހަނދާނީ ފިލާ ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހެވެ. އަދި މި ޖަލްސާއަށްފަހު ރައީސުލްޖުމްހޫރިއްޔާ ވަނީ އަހުމަދިއްޔާ ސްކޫލުގެ "ހަނދާނީ ގެލެރީ" ބައްލަވާލައްވާފައެވެ.