އޮޑިޓަރ ޖެނެރަލްގެ އޮފީހުގެ އައިއެސްއޯ ޑިޕާޓްމެންޓް އައްޑޫ ސިޓީގައި ގާއިމްކޮށްފި

ސަރުކާރުގެ އިދާރާތަކާއި ސަރުކާރު ހިއްސާވާ ކުންފުނިތަކުގެ މާލީކަންކަން ބަލަހައްޓާ އިންފޮމޭޝަން ސިސްޓަމްތައް އޮޑިޓްކުރުމަށްޓަކައި އޮޑިޓަރ ޖެނެރަލްގެ އޮފީހުން އައްޑޫ ސިޓީގައި އާދީއްތަ ދުވަހު އައު ޑިޕާޓްމެންޓެއް ގާއިމްކޮށްފިއެވެ.

މިކަމަށްޓަކައި އައްޑޫ ސިޓީގައި ބޭއްވި ހަފްލާގައި އޮޑިޓަރ ޖެނެރަލް ވާހަކަދައްކަވަމުން ވިދާޅުވީ، ސަރުކާރުގެ މާލީކަންކަން މިއަދު ބަލަހައްޓަމުން ގެންދަނީ އެސްއޭޕީ ޕަބްލިކް އެކައުންޓިންގ ސިސްޓަމްގައިކަމަށެވެ. އަދި ދައުލަތުގެ އާމްދަނީއާއި، ހަރަދު އަދި މިލްކިއްޔާތާއި ދަރަންޔާބެހޭ އެންމެހާ ރެކޯޑްތައް ބަލަހައްޓަމުންދާ ސިސްޓަމްތަކުގެ ޑޭޓާ އިންޓެގްރިޓީއާއި، ސިސްޓަމް ކޮންޓްރޯލްތަކާއި އެސިސްޓަމްތަކުން ޖެނެރޭޓްކުރާ ރިޕޯޓްތަކުގެ ސައްހަކަން ދެނެގަތުމަށްޓަކައި އެސިސްޓަމްތަކުގެ އޮޑިޓްތައް މިއަދު ކުރަންޖެހިފައިވާ ކަމަށެވެ.

އިންފޮމޭޝަން ސިސްޓަމް އޮޑިޓް ޑިޕާޓްމެންޓް އައްޑޫ ސިޓީގައި ގާއިމްކުރީ އޮޑިޓްކުރުމުގެ ހިދުމަތްތައްވެސް ލާމަރުކަޒީ އުސޫލުން ކުރިއަށްގެންދިއުމަށް ދެވޭ އިސްކަމުގެ ސިޔާސަތުގެ ދަށުންނެވެ.

މިއަދުގެ ރަސްމިއްޔާތު ޝަރަފުވެރިކޮށްދެއްވީ އައްޑޫ ސިޓީގެ މޭޔަރ އަލީ ނިޒާރެވެ. މޭޔަރގެ ވާހަކަފުޅުގައި އައްޑޫ ސިޓީގައި މި ޑިޕާޓްމެންޓް ގާއިމްކުރެއްވިކަމަށްޓަކައި އޮޑިޓަރ ޖެނެރަލްއަށް ޝުކުރުއަދާކުރެއްވިއެވެ. މީގެ އިތުރުން ލާމަރުކަޒީ ނިޒާމުގެ މަގްސަދުތައް ހާސިލްކުރުމަށްޓަކައި ދައުލަތުގެ އެންމެހާ އިދާރާތަކުންނާއި ސަރުކާރުގެ ކުންފުނިތަކުންވެސް ލާމަރުކަޒީ އުސޫލުން ހިދުމަތްތައް ދިނުމަށާއި ވިޔަފާރިތައް ފުޅާކުރުމަށް އިތުރު މަސައްކަތްތަކެއް ކުރަންޖެހިފައިވާކަން ފާހަގަކުރެއްވިއެވެ.

އޮޑިޓަރ ޖެނެރަލްގެ އޮފީހުން ވަނީ 2015 ވަނަ އަހަރުގައި އައްޑޫ ސިޓީގައި ދެކުނު ސަރަހައްދީ އޮފީހެއް ގާއިމްކޮށްފައެވެ. މީގެ އިތުރުން 2021 ވަނަ އަހަރު ކުޅުދުއްފުށީ ސިޓީގައި އުތުރު ސަރަހައްދީ އޮފީހެއްވެސް ވަނީ ގާއިމްކޮށްފައެވެ.