"ހުޅުމާލޭ ކޯޓު އުފެއްދީ ސިޔާސީ ބޭނުމަކަށް، މި ބޮޑު ބޭއިންސާފު ރަނގަޅު ކުރުމަށް ޤާނޫނު އިސްލާޙު ކުރާނަން"
ޤާނޫނުގައި ނެތް ކަމެއް ޤާނޫނާ އެއްގޮތަށް ނުކުރެވޭނެ
ބަންޑާރަ ނައިބް (އޭޖީ) އިބްރާހިމް ރިއްފަތު - ޤާނޫނުގައި ނެތް ކަމެއް ޤާނޫނާ އެއްގޮތަށް ނުކުރެވޭނެކަމަށް އޭޖީ ވަނީ ވިދާޅުވެފައި
ހުޅުމާލޭ ކޯޓު އުފެއްދީ ސިޔާސީ ބޭނުމަކަށް ކަމަށާއި، އެނިންމުން ނަގަހައްޓާފައިވަނީ ސުޕްރީމް ކޯޓުގެ 2012 ވަނަ އަހަރުގެ ގަޒިއްޔާއެއްގައިކަމަށް ބަންޑާރަނައިބް (އޭޖީ) އިބްރާހިމް ރިއްފަތު ވިދާޅުވެއްޖެއެވެ.
އޭޖީ ކުރެއްވި ޓްވީޓެއްގައި ވިދާޅުވީ، ހުޅުމާލޭ ކޯޓަކީ ސިޔާސީ މަޤްޞަދެއް ޙާޞިލްކުރުމަށް އުފެއްދި ތަނެއް ކަމަށެވެ. އެގޮތުން ޤާނޫނާ ޚިލާފު އެނިންމުން ނަގަހައްޓާފައިވަނީ ސުޕްރީމް ކޯޓުގެ 2012 ވަނަ އަހަރުގެ ގަޒިއްޔާއެއްގައިކަމަށް އޭޖީ ވިދާޅުވިއެވެ.
ޤާނޫނުގައި ނެތް ކަމެއް ޤާނޫނާ އެއްގޮތަށް ނުކުރެވޭނެކަން ފާހަގަ ކުރައްވައި އޭޖީ ވިދާޅުވީ، މިއީ ޤާނޫނީ ބޮޑު ފުށުއެރުމެއް ކަމަށާއި، ފާޅުގައި ފެންނަން އޮތް ބޭއިންސާފެއް ކަމަށެވެ. މިކަން ރަނގަޅުކުރުމަށް ޤާނޫނު އިޞްލާޙު ކުރައްވާނެ ކަމަށްވެސް އޭޖީ ވިދާޅުވިއެވެ.
މިކަމާއި ގުޅޭގޮތުން ޖޭއެސްސީން ނެރުނު ބަޔާނެއްގައި ބުނީ، ހުޅުމާލެ މެޖިސްޓްރޭޓް ކޯޓަކީ ގާނޫނާ ހިލާފަށް އުފައްދާފައިވާ ކޯޓެއް ކަމަށް ވާތީ އެ ކޯޓު އުވާލުމުގެ މަސައްކަތް ކުރިއަށް ގެންދިއުމަށް 04 އޮކްޓޯބަރު 2020 ވަނަ ދުވަހު އެ ކޮމިޝަނުން ނިންމާފައިވާ ކަމަށެވެ.
ޖޭއެސްސީން ބުނީ، ހުޅުމާލެ މެޖިސްޓްރޭޓް ކޯޓު އުވާލުމުގެ މަސައްކަތް ކުރަމުންދާއިރު، އެ ކޯޓު އުފެދިފައިވާ ގޮތުގެ ގާނޫނީ ހައިސިއްޔަތާމެދު ދިވެހިރާއްޖޭގެ ސުޕްރީމް ކޯޓުން 05 ޑިސެމްބަރު 2012 ގައި ނިންމި ގަޒިއްޔާގައި ފައިސަލާކޮށް ނިޔާ ކަނޑައަޅުއްވާފައިވާކަމަށެވެެ. ސުޕްރީމް ކޯޓުގެ އެ ނިންމުމުގައި ބުނެފައިވަނީ ހުޅުމާލޭ މެޖިސްޓްރޭޓް ކޯޓަކީ ގަނޫނީ ގޮތުން ސައްހަ ކޯޓެއް ކަމަށެވެ. އެގޮތުން ހަތަރު ފަޑިޔާރުންގެ އަޣުލަބިއްޔަތުން ސުޕްރީމް ކޯޓުން ކުރި ހުކުމުގައި ބުނެފައިވަނީ ހުޅުމާލެއަކީ އިދާރީ ގޮތުން މާލޭގެ ބައެއްކަމަށް ވިޔަސް، ހުޅުމާލެއަކީ މާލޭގެ ޖުޑީޝަލް ދާއިރާގައި ހިމެނޭ މީހުން ދިރިއުޅޭ ވަކިރަށެއް ކަމަށެވެ.
އަދި މާލޭގައި ގާއިމްވެފައިވާ ސުޕީރިއާ ކޯޓުތަކުގެ ބްރާންޗްތައް ކޯޓުތަކާ ބެހޭ ގާނޫނުގައި ބަޔާންވެފައިވާ ގޮތުގެ މަތިން ހުޅުމާލޭގައި ގާއިމްވެފައި ނުވާތީ ހުޅުމާލޭ މެޖިސްޓްރޭޓް ކޯޓަކީ ގާނޫނީ ގޮތުން ސައްހަ ކޯޓެއް ކަމަށް ސުޕްރީމް ކޯޓުން ނިންމިއެވެ.
އެހެންނަމަވެސް، ސުޕްރީމް ކޯޓުގެ ނިޔާ ބިނާވަނީ ކަނޑައެޅިގެން ގާނޫނާ ހިލާފަށް އަދި ހަގީގަތާ ވެސް ހިލާފު ކަންތައްތަކެއްގެ މައްޗަށްކަން އެ ކޮމިޝަނަށް ފާހަގަ ވާތީ އެ ނިންމުން މުރާޖާކޮށްދިނުމަށް ޖޭއެސްސީން ސްޕްރީމް ކޯޓަށްވެސް ހުށައެޅިއެވެ.
އެ މައްސަލައިގައި ސްޕްރީމް ކޯޓުން 8 ފެބްރުއަރީ 2022 ވަނަ ދުވަހު ނިންމަވާފައި ވަނީ ހަވާލާދެވުނު ގަޒިއްޔާ ނިންމެވުމުގައި ގާނޫނީ ބޮޑު ފުށުއެރުމެއް އަދި ފާޅުކަން ބޮޑު ބޭއިންސާފެއް ފާހަގަވާން ނެތް ކަމަށާއި، އެ ގަޒިއްޔާގެ ނިޔާ މުރާޖާކޮށްދެވެން ނެތް ކަމަށެވެ.
ކޯޓުތަކާ ބެހޭ ގާނޫނުގައި ކަނޑައަޅާފައި ވަނީ މާލޭގައި އުފައްދާނީ ސްޕީރިއާ ކޯޓުތައް ކަމަށެވެ. ރަށްރަށުގައި ހުންނަނީ މެޖިސްޓްރޭޓް ކޯޓުތައް ކަމަށެވެ. ގާނޫނުއަސާސީގައި މާލެ މާނަކޮށްފައި ވަނީ ވިލިނގިއްޔާއި ހުޅުމާލެ ވެސް ހިމެނޭ ގޮތަށްކަން ފާހަގަކޮށް ޖޭއެސްސީން ބުނީ، ހުޅުމާލެއަކީ އަދި ވިލިނގިއްޔަކީ ވެސް އިދާރީ ވަކި ރަށްރަށެއް ނޫން ކަމަށާއި، އެއީ މާލޭގެ އަވަށްއަވަށެވެ. ވީއިރު މާލޭގައި ސްޕީރިއާ ކޯޓުތައް ގާއިމުކޮށްފައި، އަދި ހަމަ މާލޭގެ އަވަށްއަވަށުގައި މެޖިސްޓްރޭޓް ކޯޓުތައް ގާއިމުކުރުމަކީ ގާނޫނާ ހިލާފު ނުވެ ކުރެވޭނެ ކަމެއް ނޫންކަމަށްވެސް ޖޭއެސްސީން ބުނެއެވެ.
މިކަމަކީ އެއްވެސް އޮޅުމެއް ނެތްހާ ސާފުކޮށް އޮތް ކަމެއްކަމަށް އެ ކޮމިޝަނުން ބުނެފައިވެއެވެ.
ހުޅުމާލޭ މެޖިސްޓްރޭޓް ކޯޓު އުފެދިފައިވާ ގޮތާމެދު ދިވެހިރާއްޖޭގެ ސްޕްރީމް ކޯޓުން ކުރައްވާފައިވާ ނިޔާ މުރާޖާކޮށްދެވެން ނެތްކަމަށް އެ ކޯޓުން ނިންމި ނަމަވެސް، ހުޅުމާލޭ މެޖިސްޓްރޭޓް ކޯޓު އުވާލުމައްޓަކައި ކުރަންޖެހޭ މަސައްކަތްތައް ކުރަމުންދާކަމަށްވެސް ޖޭއެސްސީގެ ބަޔާނުގައި ބުނެފައިވެއެވެ.
ސުޕީރިއާ ހަތަރު ކޯޓުގެ ޑިވިޝަންތައް މާލޭގައި ގާއިމްކޮށްފައިވާއިރު މާލޭގެ އަވަށެއް ކަމަށްވާ ހުޅުމާލޭގައި ކޯޓެއް ހިންގުމަކީ ގާނޫނު ހުއްދަ ކުރާކަމެއް ކަމާމެދު ޖޭއެސްސީއާއި ޤާނޫނީ ދާއިރާގައި މަސައްކަތްކުރާ ގިނަ ފަރާތްތަކާމެދު ފާއިތުވި އަހަރުތަކުގައި ބޮޑެތި ހިޔާލުތަފާވުންތަކެއް އުފެދިފައިވާ ދަނޑިވަޅެއްގައެވެ.
އެގޮތުން ކުރީގެ ރައީސް މުހައްމަދު ނަޝީދުގެ މައްސަލަ، ހުޅުމާލެ މެޖިސްޓްރޭޓް ކޯޓަށް ހުށަހަޅައި ބަލަން މަސައްކަތް ފެށި ހިސާބުންވެސް އެ މައްސަލަ ފެންމަތިވެ، ޤާނޫނީ ގިނަ ސުވާލުތަކެއް އުފެދިފައިވެއެވެ.
