ރޯދައާއި ދިމާކޮށް 3 މިސްކިތެއް ހުޅުވާނަން: މިނިސްޓަރު
ރާއްޖޭގެ 3 ސަރަހައްދަކުން މިސްކިތް ހުޅުވަން ވަނީ ނިންމާފައި
އިސްލާމިކް މިނިސްޓަރު، ޑރ. އަހުމަދު ޒާހިރް އަލީ
ރޯދަމަހާއި ދިމާކޮށް 3 މިސްކިތެއް ހުޅުވިގެންދާނެ ކަމަށް އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވިދާޅުވެއްޖެއެވެ.
ރާއްޖެއެމްވީއަށް މައުލޫމާތުދެއްވަމުން މިނިސްޓަރ ވިދާޅުވީ ރޯދަމަހާ ދިމާކޮށް ރާއްޖޭގެ 3 ސަރަހައްދުން 3 މިސްކިތެއް ހުޅުވިގެންދާނެ ކަމަށެވެ. މިގޮތުން މާލެ ސަރަހައްދުން ހުޅުމާލެ ދެވަނަ ފިޔަވަހީގައި ގާއިމްކޮށްފައިވާ ވަގުތީ ދެވަނަ މިސްކިތް ހުޅުވިގެންދާނެ ކަމަށް މިނިސްޓަރ ވިދާޅުވިއެވެ. އަދި ލ. އަތޮޅުގެ މިސްކިތަކާއި، މެދުރާއްޖެތެރޭގައިވެސް މިސްކިތެއް ހުޅުވުމަށް ތައްޔާރުވެފައިވާކަމަށް މިނިސްޓަރ ވިދާޅުވިއެވެ.
މީގެ އިތުރުން މިނިސްޓަރ ވިދާޅުވީ ރާއްޖޭގައި ހުރި ހުރިހާ މިސްކިތްތަކަކީވެސް މިހާރު މަރާމާތުކުރަންޖެހޭ މިސްކިތްތަކެއް ކަމަށެވެ. މިއީ އެތައް އަހަރެއް ވަންދެން ނުކުރެވިހުރި މަރާމާތުތަކެއް ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ މި މަސައްކަތަށް ގާތްގަނޑަކަށް 65 މިލިއަން ރުފިޔާ ޚަރަދުވާނެ ކަމަށެވެ. މިކަން މިހާރު ވާނީ ފިނޭންސް މިނިސްޓްރީއަށް ހުށަހަޅާފައިކަމަށް މިނިސްޓަރ ވިދާޅުވިއެވެ. އެހެންނަމަވެސް މި މަސައްކަތަށް ލިބޭނެ ކަމަށް ބެލެވެނީ 30 ވަރަކަށް މިލިއަން ރުފިޔާ ކަމަށް މިނިސްޓަރ ވިދާޅުވިއެވެ.
ކުރިއަށް އޮތް ރޯދަ މަހަށް ޚާއްސަކޮށްގެން 32 މިސްކިތެއް މަރާމާތު ކުރުމުގެ މަސައްކަތް މާލެ ސިޓީ ކައުންސިލުން ވަނީ ފަށާފައެވެ. މި މަސައްކަތުގެ ތެރެއިން މިސްކިތްތަކުގައި ހަލާކުވެފައި ހުރި ޓައިލްސްތައް ނައްޓައި ޓައިލްސް އައުކުރުމުގެ މަސައްކަތް ކުރާނެ ކަމަށް މާލެ ސިޓީ ކައުންސިލުން ވަނީ ބުނެފައެވެ. އަދި ފަންކާ، ލައިޓް، އޭސީ އަދި ސައުންޑްގެ މައްސަލަ ހުރި ނަމަ އެމައްސަލަތައް ހައްލު ކުރާނެ ކަމަށް ކައުންސިލުން ބުނެއެވެ.
މިމަސައްކަތްތަކާއި ގުޅޭ ގޮތުން މާލެ ސިޓީގެ މޭޔަރ ޑރ. މުހައްމަދު މުއިއްޒު ވިދާޅުވީ މާލޭ ސިޓީގެ 43 މިސްކިތް ބެލެހެއްޓުމަށް ސަރުކާރުން ހަމަޖައްސައިދީފައިވަނީ 1 މިލިއަން ރުފިޔާ ކަމަށާއި ނަމަވެސް މިސްކިތްތަކުގެ މަރާމާތަށް ގާތްގަނޑަކަށް 13 ވަރަކަށް މިލިއަން ރުފިޔާ ހޭދަވާނެ ކަމަށް ބެލެވޭ ކަމަށެވެ. މިސްކިތްތަކުގެ މަރާމާތުގެ މަސައްކަތް ފަށާފައިވަނީ ހަމައެކަނި ސަރުކާރުން ދިން ބަޖެޓަށް ބަލައިގެން ނޫން ކަމަށާއި ކައުންސިލުގެ އާމްދަނީ ބަޖެޓުން ވެސް އެކަމަށް ފައިސާ ބޭނުންކުރާނެ ކަމަށް މޭޔަރު ވިދާޅުވިއެވެ. އަދި ވިދާޅުވީ މިމަސައްކަތް ކުރުމުގައި އާއްމުންގެ އެހީތެރިކަމާއި އެއްބާރުލުން ބޭނުންވާ ކަމަށެވެ.
ރަމަޟާން މަހަށް ޚާއްސަކޮށްގެން މިސްކިތްތައް އާބާތުރަ ފިލުވުމާއި މަރާމާތު ކުރުމުގެ މަސައްކަތްތައް ކުރިއަށްދާއިރު، 32 މިސްކިތެއްގެ މަސައްކަތް ރޯދައިގެ ކުރިން ނިންމުމަށް މިހާރު ވަނީ އަމާޒު ހިފާފައެވެ.
