ޔޫވީ ބަލިކޮށް ވެލެންސިއާއިން ފެށުން ރަނގަޅުކޮށްފި

އުރީދޫ ދިވެހި ޕްރިމިއާ ލީގުގައި ބުދަ ދުވަހުގެރޭ ޔުނައިޓެޑް ވިކްޓްރީ (ޔޫވީ) ބަލިކޮށް ކުލަބް ވެލެންސިއާއިން ފެށުން ރަނގަޅުކޮށްފިއެވެ.

ގައުމީ ފުޓުބޯޅަ ދަނޑުގައި ބުދަ ދުވަހުގެރޭ ކުޅުނު މި މެޗު ވެލެންސިއާއިން ކާމިޔާބުކުރީ 2-1 ގެ ނަތީޖާއަކުންނެވެ.

މި މެޗަށް ނުކުތްއިރު، ވެލެންސިއާއިން ވަނީ ސީޒަނުގެ ފުރަތަމަ މުބާރާތް ކަމަށްވާ ޕްރެޒިޑެންޓްސް ކަޕް މެޗަކުން ބަލިނުވެ ކާމިޔާބުކޮށްފައެވެ. އެހެންކަމުން މި މެޗަށް ވެލެންސިއާއިން ނުކުމެފައިވަނީ އިތުބާރާއެކުގައެވެ. އެކަމަކު ވެލެންސިއާގެ ފުރަތަމަ އެގާރައިން ގިނަ ބަދަލުތަކެއް ފެނިގެންދިޔައެވެ. އެގޮތުން އަނިޔާގެ ސަބަބުން، ކެޕްޓަން އަލީ ފާސިރު އަދި އިތުބާރު ފޯވާޑް އަލީ އަޝްފާގު (ދަނގަޑޭ) ކުޅުފައިނުވާއިރު، ޖަލު ހުކުމެއް ކޯޓުން އިއްވައިފައިވާ ކުޅަދާނަ މިޑްފިލްޑަރު އަސްހަދު އަލީ (އަޑުބަރޭ) ކުޅެފައެއް ނުވެއެވެ. މީގެ އިތުރުން ކުޅުން ހުއްޓާލަން އުޅޭކަން އިއުލާން ކޮށްފައިވާ ގައުމީ ޓީމުގެ އެއް ނަމްބަރު ކީޕަރު މުޙައްމަދު ފައިސަލް ވެސް މި މެޗު ކުޅެފައެއް ނުވެއެވެ.

ވެލެންސިއާގެ ފުރަތަމަ އެގާރައަށް ބަލާއިރު، ޕްރެޒިޑެންޓްސް ކަޕަށްފަހު ޓީމާ ގުޅުނު ޒުވާން ތަރި އަބްދުﷲ ޔާމީން (ޔާން) ވަނީ ކުޅެފައެވެ.

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނުނު ނަމަވެސް، ފުރަތަމަ ހާފުގެ ފަހުކޮޅު ވެލެންސިއާއިން ވަނީ ޔޫވީގެ ހާފަށް ބާރުބޮޑުކޮށް ގިނަ ހަމަލާތަކެއް އުފައްދާފައެވެ. އެގޮތުން މެޗުގެ 29 ވަނަ މިނެޓުގައި ވެލެންސިއާއިން ވަނީ ލަނޑު ޖަހާ ލީޑު ނަގައިފައެވެ. މިސްރުގެ މިޑްފިލްޑަރު ހަލީލް ޖަމާލް ތަނަވަސްކޮށްދިން ފުރުސަތެއްގެ ބޭނުން ހިފައި މި ލަނޑު ވެލެންސިއާއަށް ކާމިޔާބު ކޮށްދިނީ ޔާންއެވެ. މިއީ ޔާންގެ ކެރިޔަރުގައި ވެލެންސިއާ ޖާޒީގައި އޭނާ ކާމިޔާބުކުރި ފުރަތަމަ ލަނޑެވެ. އަދި މި ލަނޑާއެކު ވެލެންސިއާ ޖާޒީގައި އޭނާ ކުރިޔަށްދާން އިތުރު ހިތްވަރަކަށްވާނެ އެވެ.

މެޗުގެ 33 ވަނަ މިނެޓުގައި ވެލެންސިއާއަށް ވަނީ ލީޑު ފުޅާކުރަން ފުރުސަތު ލިބި ބޭކާރުވެފައެވެ. ޔާން ޖައްސާލި ބޯޅަ ވެލެންސިއާގެ ސްޕެއިން ފޯވާޑް ބޯހަސް މާޓިން ފޮނުވާލި ނަމަވެސް އެ ހަމަލާ ޔޫވީގެ ޑިފެންޑަރު މޫސާ އަޒީމް ވަނީ ގޯލު ރޮނގުމަތިން ދިފާއުކޮށްފައެވެ.

ފުރަތަމަ ހާފު ނިމުމުގެ ކުރިން ވެލެންސިއާއިން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މިއީ ޔާންގެ އެހީތެރިކަމާއެކު ބޯހަސް ކާމިޔާބުކުރި ލަނޑެކެވެ.

މެޗުގެ ދެވަނަ ހާފުގައިވެސް ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، ޔޫވީން ވަނީ ދެވަނަ ހާފުގައި އެ ޓީމަށް ލިބުނު ފުރަތަމަ ހުސް ފުރުސަތުގެ ބޭނުން ހިފައި ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ލީގަށް އެ ޓީމާއި ގުޅުނު ބެލޫސް ފޯވާޑް އިވާން ވެރާސްއެވެ.

އުރީދޫ ދިވެހި ޕްރިމިއާ ލީގުގައި ބުރާސްފަތި ދުވަހު ދެމެޗެއް ކުޅޭނެއެވެ. ފުރަތަމަ މެޗުގައި ބުރާސްފަތި ދުވަހުގެ ހަވީރު ކުޅޭނީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އާއި ސުޕަ ޔުނައިޓެޑް ސްޕޯޓްސްއެވެ. އަދި ދެވަނަ މެޗުގައި ބުރާސްފަތި ދުވަހުގެރޭ ކުޅޭނީ، ކްލަބް އީގަލްސް އާއި ޓީސީ ސްޕޯޓްސް ކުލަބެވެ.